ນະຄອນຫຼວງວຽງຈັນກໍາລັງຕິດຕັ້ງໄຟເຍືອງທາງໃໝ່


ຫຼາຍຄົນກໍາລັງສົງໄສວ່າ ເຈົ້າໜ້າທີ່ພັດທະນາຕົວເມືອງກໍາລັງຂຸດ ແລະເຈາະລຽບຕາມທາງຫຼາຍເສັ້ນ ເຊິ່ງບາງບ່ອນສ້າງຄວາມບໍ່ສະດວກໃນການຈະລາຈອນເຂົ້າ-ອອກຂອງສໍານັກງານຕ່າງໆ ແລະລຽບທາງຍ່າງ, ນັ້ນເປັນຍ້ອນວ່າ ປັດຈຸບັນນີ້ ອຳນາດການປົກຄອງນະຄອນຫຼວງວຽງຈັນກຳລັງຕິດຕັ້ງໄຟເຍືອງທາງໃໝ່ ຕາມຖະໜົນສາຍຫລັກຕ່າງໆໃນຕົວເມືອງ ໂດຍໄດ້ຮັບທຶນຊ່ວຍເຫລືອລ້າຈາກລັດຖະບານ ສປ ຈີນ ເຊິ່ງເປັນອີກການປະກອບສ່ວນອີກຢ່າງໜຶ່ງ ໃນການສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 45 ປີ.

ຕາມຂໍ້ມູນໃຫ້ຮູ້ວ່າ: ໂຄງການພັດທະນາໄຟເຍືອງທາງນີ້ ຈະປັບປຸງລະບົບນ້ຳພຸ ແລະແສງສະຫວ່າງຢູ່ອະນຸສາວະລີປະຕູໄຊ. ນອກຈາກນັ້ນ, ພາກສ່ວນກ່ຽວຂ້ອງກໍາລັງຕິດຕັ້ງສາຍໄຟໃໝ່ຢູ່ 7 ເສັ້ນທາງ ເຊິ່ງໄດ້ເລີ່ມຈາກຈຸດສູນກາງຂອງຖະໜົນໄກສອນພົມວິຫານ ລະຫວ່າງໄຟຈະລາຈອນຖະໜົນ 450 ແລະອະນຸສາວະລີປະຕູໄຊ ເຂົ້າສູ່ຖະໜົນລ້ານຊ້າງ ແລະຖະໜົນ 23 ສິງຫາ ແລະຈາກອະນຸສາວະລີປະຕູໄຊ ໄປຈົນເຖິງວົງວຽນທີ່ທາດຫຼວງ.

ນອກນັ້ນ, ໃນເຂດອື່ນໆຂອງໃຈກາງເມືອງ ກໍ່ຈະມີການຕິດຕັ້ງໄຟເຍືອງທາງໃໝ່ເຊັ່ນກັນຄື: ຖະໜົນໜອງບອນ ຈາກໄຟຈະລາຈອນໜອງບອນໄປຕາມຖະໜົນ 23 ສິງຫາ ຖະໜົນມະໂຫສົດ ຈາກທາງແບ່ງສຳນັກງານປະທານປະເທດໄປຫາໂຮງໝໍມະໂຫສົດ; ຖະໜົນລຽບແຄມຂອງ ຈາກທາງແຍກສວນເຈົ້າອານຸວົງຫາວົງວຽນປາກປ່າສັກ ແລະຖະໜົນເຊດຖາທິລາດຈາກວົງວຽນປາກປ່າສັກ ໄປຫາທາງແຍກເຂົ້າສູ່ຖະໜົນມະໂຫສົດ.

ສາຍໄຟຟ້າທີ່ຈະໃຊ້ຕິດຕັ້ງໄຟເຍືອງທາງໃໝ່ນີ້ ສ່ວນຫລາຍຈະຕິດຕັ້ງໄວ້ໃຕ້ດິນ, ສ່ວນບັນດາສາຍໄຟຟ້າທີ່ມີຢູ່ແລ້ວນັ້ນ ຍັງຈະປັບປຸງໃຫ້ໄດ້ມາດຕະຖານຂຶ້ນກວ່າເກົ່າ. ໂຄງການປັບປຸງລະບົບນໍ້າພຸ ແລະໄຟເຍືອງທາງຄັ້ງນີ້ ຄາດວ່າຈະໃຫ້ສຳເລັດກ່ອນວັນຊາດ ທີ 2 ທັນວາ.

ຕາມຂໍ້ມູນຍັງແຈ້ງຕື່ມວ່າ: ທຶນໂຄງການຊ່ວຍເຫລືອລ້າຈາກລັດຖະບານ ສປ ຈີນ ທັງໝົດ 300 ລ້ານຢວນ. ແຕ່ປີນີ້ ຈະອະນຸມັດໃຫ້ກ່ອນ ຈໍານວນ 87,5 ລ້ານຢວນ ເພື່ອຍົກລະດັບລະບົບນໍ້າພຸ ແລະແສງໄຟໃນຂອບເຂດປະຕູໄຊ ແລະໄຟເຍືອງທາງໃໝ່ຢູ່ຕາມຖະໜົນ 7 ເສັ້ນໃນນະຄອນຫຼວງວຽງຈັນ.

ຂ່າວ: Vientiane Time
ພາບ: ສອນປະເສີດ/ CRI

ທ່ານບໍ່ມີສິດສຳເນົາ ບົດຄວາມນີ້ໄດ້ ສົນໃຈບົດຄວາມຕິດຕໍ່ ຜູ້ດູແລລະບົບຖ້າສົນໃຈບົດຄວາມນີ້