ໃນວັນທີ 23 ກັນຍາ 2020 ທີ່ນະຄອນຫລວງວຽງຈັນ, ທ່ານ ຂຽງຄຳ ພຸດຈັນທະວົງສາ ຮອງອຳນວຍການບໍລິສັດ ຮ່ວມລົງທຶນລາວ-ຈີນ ເຂດພັດທະນາ ກວມລວມໄຊເຊດຖາ ໄດ້ໃຫ້ສຳພາດ ມີບາງຕອນສຳຄັນວ່າ: ປັດຈຸບັນ, ໂຄງການເຂດພັດທະນາ ກວມລວມໄຊເຊດຖາ ສໍາເລັດການລົງທຶນ 1,2 ຕື້ໂດລາສະຫະລັດ. ໃນນັ້ນ, ລວມທັງການລົງທຶນ ພື້ນຖານໂຄງລ່າງ 530 ລ້ານໂດລະສະຫະລັດ, ມີຫົວໜ່ວຍວິສາຫະກິດ ທີ່ຈົດທະບຽນເຂົ້າມາ ລົງທຶນໃນເຂດ ລວມທັງໝົດ 82 ຫົວໜ່ວຍ ແລະ ເປັນວິສາຫະກິດທີ່ມາຈາກ 7 ປະເທດ ໃນພາກພື້ນທົ່ວໂລກ, ສາມາດສ້າງວຽກເຮັດງານທໍາໄດ້ 1.500 ຄົນ ໃນນັ້ນຄົນລາວ ກວມ 80%.
ການພັດທະນາຂອງໂຄງການ ແມ່ນຈັດຕັ້ງປະຕິບັດ ຕາມແຜນທິດສະດີ ພັດທະນາສຸມໃສ່ການພັດທະນາ ຂະແໜງການອຸດສາຫະກໍາ ພັດທະນາ ເປັນຕົວເມືອງ ແບບກົມກຽວກັນ, ໂດຍການແບ່ງວຽກງານ ກໍ່ສ້າງອອກເປັນ 3 ໄລຍະ ໃນການພັດທະນາ. ໄລຍະທີ 1 ແມ່ນສຸມໃສ່ໃນການພັດທະນາ ໃນຂະແໜງ ການອຸດສາຫະກໍາ, ໄລຍະທີ 2 ແລະ 3 ແມ່ນພັດທະນາ ໃນຂະແໜງການຂົນສົ່ງ, ເຂດການຄ້າ, ເຂດທີ່ຢູ່ອາໃສ, ເຂດທ່ອງທ່ຽວ ແລະ ຈະພະຍາຍາມສ້າງ ເປັນຕົວເມືອງໃໝ່ ຂອງນະ ຄອນຫລວງວຽງຈັນ.
ໃນປັດຈຸບັນ, ທາງໂຄງການ ໄດ້ສໍາເລັດການພັດທະນາ ພື້ນຖານໂຄງລ່າງ ກວມເອົາເນື້ອທີ່ 400 ເຮັກຕາ, ລວມທັງຜົນສໍາເລັດ ການກໍ່ສ້າງໃນໄລຍະທີ 1 ເຊັ່ນ: ບັນດາເສັ້ນທາງເຊື່ອນຈອດ, ເຂດສີຂຽວ, ລະບົບທໍ່ນໍ້າລວມ, ໂຄງການສະຖານີໄຟຟ້າ 115 ກິໂລວັດ. ສໍາເລັດການກໍ່ສ້າງ ໂຮງງານມາດຕະຖານ ໂດຍມີເນື້ອທີ່ 80.000 ຕາແມັດ, ສໍາເລັດການກໍ່ສ້າງຕຶກ ຫໍພັກພະນັກງານ ເພື່ອຮັບຮອງ ແລະ ສາມາດຕອບສະໜອງ ການບໍລິການ ພື້ນຖານຄວາມ ຕ້ອງການດ້ານການບໍລິການ ໃຫ້ບັນດາວິສາ ຫະກິດຕ່າງໆໃນເຂດ. ເຊິ່ງໃນປັດຈຸບັນ, ໂຄງການເຂດພັດທະນາພວກເຮົາ ກໍາລັງດໍາເນີນວຽກງານ ການພັດທະນາໂຄງການ ໃນໄລຍະທີ 2 ແລະ 3 ຄື: ການກໍ່ສ້າງພື້ນຖານໂຄງລ່າງ ແລະ ການກໍ່ ສ້າງເຂດລິເລີ່ມຕົວເມືອງໃໝ່.
ທ່ານ ຂຽງຄຳ ພຸດຈັນທະວົງສາ ໃຫ້ຮູ້ຕື່ມວ່າ: ເຂດພັດທະນາກວມລວມ ໄຊເຊດຖາ ຕັ້ງຢູ່ໃຈການເມືອງ ຂອງນະຄອນຫລວງວຽງຈັນ, ເຊິ່ງກວມ ເນື້ອທີ່ທັງໝົດ 1.149 ເຮັກຕາ, ແຜນການລົງທຶນທັງໝົດ 5 ຕື້ໂດລາສະຫະລັດ. ເປັນໂຄງການທີ່ກຸ່ມບໍລິສັດກໍ່ສ້າງ ແລະ ລົງທຶນ ແຂວງຢູນານ ຫຸ້ນສ່ວນຈໍາກັດ ກັບອົງການ ນະຄອນຫລວງວຽງຈັນ ຮ່ວມທຶນກັນສ້າງຕັ້ງຂຶ້ນ ແລະ ເປັນໂຄງການຮ່ວມມືລະດັບປະເທດ ທີ່ສອງລັດຖະບານລາວ-ຈີນ ໄດ້ຮັບຮູ້ຮ່ວມກັນ, ຍັງເປັນ ເຂດເສດຖະກິດ ການຄ້າຕ່າງ ປະເທດໜຶ່ງດຽວຂອງຈີນ ຢູ່ໃນ ສປປ ລາວ.
ປັດຈຸບັນ, ເຂດພັດທະນາກວມລວມ ໄຊເຊດຖາ ເປັນເຂດໜຶ່ງ ທີ່ເປັນແຫລ່ງດຶງດູດ ນັກລົງທຶນຕ່າງປະເທດ ເຂົ້າມາລົງທຶນຢູ່ໃນປະເທດລາວ ຂອງພວກເຮົາ ໃຫ້ນັບມື້ນັບຫລາຍຂຶ້ນ, ໂດຍມີຫລາຍຫົວໜ່ວຍ ທີ່ເຂົ້າມາລົງທຶນແລ້ວ ຄື: ບໍລິສັດໂຮຢາ ຂອງຍີ່ປຸ່ນ, ບໍລິສັດ ເປໂຕຣ ເຄມີລາວ ຈໍາກັດ, ບໍລິສັດຢາສູບ ລາວ-ຈີນ, ບໍລິສັດ ຄວາມຫວັງໃໝ່, ບໍລິສັດ ໂກເດີນ ລາວ ແລະ ບໍລິສັດອື່ນໆ ທີ່ມີຊື່ສຽງໃນ ພາກພື້ນ ແລະ ໄດ້ສ້າງເງື່ອນໄຂໜຶ່ງ ໃນການພັດທະນາໃຫ້ວຽກງານ ຂະແໜງອຸດສາຫະກໍາຂອງ ສປປ ລາວ ໃຫ້ມີຄວາມອຸດົມ ສົມບູນຂຶ້ນກວ່າເກົ່າ.
ປັດຈຸບັນໂຄງການດັ່ງກ່າວ, ໄດ້ສ້າງວຽກເຮັດງານທຳປະມານ 1.500 ຄົນ ແລະ ໃນທ້າຍປີນີ້ ຈະສາມາດ ສ້າງວຽກເຮັດງານທໍາຕື່ມອີກ ຫລາຍກວ່າ 5.000 ກວ່າຄົນ.
ຂ່າວ: ສົມຫວັງ ພາບ: ອ່າຍຄຳ
