ຕອນເຊົ້າ ທີ່ 15/04/2020 ຜ່ານມາ ມີທຸລະກິດພາກສ່ວນໜຶ່ງຢູ່ນະຄອນຫລວງວຽງຈັນໄດ້ຕັ້ງເຕັ້ນແຈກຢາຍຂອງກິນໃຫ້ປະຊາຊົນທົ່ວໄປລ້າໆ ເພື່ອສະແດງເຖິງນໍ້າໃຈ ແລະ ຄວາມຫວັງດີຕໍ່ສັງຄົມໃນສະພາບຫຍຸ້ງ ຍາກ ມີພະຍາດຕິດແປດລະບາດ. ປາກົດການຕົວຈິງໄດ້ໃຫ້ເຫັນເຖິງຄວາມສັບສົນ ເມື່ອຄົນຈຳນວນຫລາຍໄປອັ່ງອໍລໍຖ້າຮັບເຄື່ອງໄດ້ລ້າ ຊຶ່ງມີຫລາຍຄົນທີ່ເຫັນພາບຜ່ານສື່ສັງຄົມ ແລະ ຜ່ານໄປເຫັນ… ມີຄວາມເປັນຫ່ວງ, ຢ້ານມີຄວາມສ່ຽງຕໍ່ການຕິດແປດພະຍາດ.
ຄືດັ່ງຮູ້ນໍາກັນ ບຸນປີໃໝ່ລາວປີນີ້ ບໍ່ໃຫ້ມີການຫລິ້ນແບບມວນຊົນ, ທັງຫລິ້ນນໍ້າ ແລະ ກິດຈະກຳມ່ວນຊື່ນ, ນັບທັງການປະຕິບັດຮີດຄອງຫົດສົງນໍ້າພະ, ຍ້ອນວ່າມັນມີຄວາມສ່ຽງຕໍ່ການລະບາດຂອງພະຍາດໂຄວິດ-19 ທີ່ປະເທດເຮົາກໍ່ຫລີກບໍ່ໄດ້ ຊຶ່ງໄລ່ມາຮອດເຊົ້ານີ້ມີຄົນຕິດເຊື້ອ 18 ຄົນ(ຫລຸດລົງ1 ຄົນ ປິ່ນປົວດີ).
ມາດຕະການຕ່າງໆທີ່ລັດວາງອອກແມ່ນໄດ້ມີການຄົ້ນຄວ້າພິຈາລະນາຫລາຍຫລົບຫລາຍຕ່າວເປັນໝູ່ຄະນະ ຈຶ່ງປະກາດອອກມາໃຫ້ທົ່ວສັງຄົມປະຕິບັດໃຫ້ເຄັ່ງຄັດ. ການໃຫ້ຮັກສາໄລຍະຫ່າງລະ ຫວ່າງກັນ 2 ແມັດ ເພື່ອຫລີກເວັ້ນຄວາມສ່ຽງຕິດເຊື້ອ ກໍ່ແມ່ນອີກໜຶ່ງມາດຕະການທີ່ໃຊ້ທົ່ວໂລກ, ບໍ່ແມ່ນລາວເຮົາອຸປະໂຫລກຂຶ້ນເອງ, ມັນເປັນຫລັກການ ເປັນຜົນຈາກການຄົ້ນຄວ້າທາງວິທະຍາສາດ.
ຂໍ້ 7 ຂອງຄຳສັ່ງເລກທີ 06/ນຍ, ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະ ການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ກໍ່ໄດ້ກຳນົດແຈ້ງຄື ຫ້າມຈັດກິດຈະກໍາ, ປະຊຸມ ຫລື ໂຮມຊຸມນຸມຕ່າງໆ ທີ່ມີຜູ້ເຂົ້າຮ່ວມຫລາຍ ກວ່າ 10 ຄົນ ເປັນຕົ້ນ ບຸນປະເພນີ, ບຸນປີໃໝ່ລາວ, ກິດຈະກໍາທາງສາສະໜາ, ງານດອງ ແລະງານ ລ້ຽງສັງສັນຕ່າງໆ; ກໍລະນີຈໍາເປັນຕ້ອງຈັດກິດຈະກໍາ ຫລື ໂຮມຊຸມນຸມເກີນກວ່າ 10 ຄົນ ເປັນຕົ້ນແມ່ນ ງານສົບ, ງານສົ່ງສະການ ແລະ ເຮັດບຸນແຈກທານ ໃຫ້ປະຕິບັດມາດຕະການປ້ອງກັນ ຕາມການແນະນໍາຂອງຄະນະສະເພາະກິດ ເຊັ່ນ: ມີການກວດອຸນຫະພູມ, ແຕ່ລະຄົນຢູ່ຫ່າງກັນຢ່າງໜ້ອຍ 2 ແມັດ, ໃສ່ຜ້າປິດປາກ-ດັງ, ລ້າງມືໃສ່ສະບູ ຫລື ນໍ້າຢາຂ້າເຊື້ອ ຢ່າງເຂັ້ມງວດ.
ແນວຄິດດີ, ແຕ່ບາງທີອາດລືມຄົ້ນຄວ້າວິທີປະຕິບັດໃນການຈັດແຈງແບ່ງປັນແຈກຢາຍໃຫ້ລ້າ. ຄືພວກເຮົາຮູ້ແລ້ວວ່າພື້ນຖານແນວຄິດຂອງມະນຸດອັນໜຶ່ງແມ່ນມັກຂອງໄດ້ລ້າ, ເຖິງວ່າຕົນເອງບໍ່ຈຳເປັນ ຫລືຕ້ອງການ, ແຕ່ກໍ່ຂໍໃຫ້ໄດ້ມາໄວ້ກ່ອນ. ມັນຈຶ່ງເກີດການຍາດແຍ່ງຊີງກັນ ຍ້ອນຄວບຄຸມສະຕິຕົນເອງບໍ່ໄດ້. ມີຄຳເຫັນຈຳນວນໜຶ່ງເວົ້າວ່າ ໃນຄົນຈໍານວນຫລາຍທີ່ໄປຂໍຮັບເຄື່ອງແຈກຢາຍລ້າໆນັ້ນ ອາດຈະມີຄົນທີ່ຂາດເຂີນອີຫລີ ບໍ່ເຖິງເຄິ່ງໜຶ່ງ ເພາະທຸກຄົນລ້ວນຂີ່ລົດໄປ ໝາຍວ່າຄົງບໍ່ທັນຂາດເຂີນເຖິງຂັ້ນຄືກັບຢູ່ບາງປະເທດທຶນນິຍົມທີ່ຂາດທີ່ຢູ່ອາໄສ…
ຈຶ່ງນໍາເອົາບັນຫາມາຍົກຂຶ້ນ ເພື່ອແລກປ່ຽນຄຳເຫັນນໍາບັນດາທ່ານໃຈກວ້າງທັງຫລາຍ.
