ປະຊຸມປຶກສາຫາລືໄກ່ເກ່ຍ ແກ້ໄຂ ຄ່າຊົດເຊີຍຜົນກະທົບ ໂຄງການກໍ່ສ້າງທາງລົດໄຟລາວ – ຈີນ ຊ່ວງຜ່ານແຂວງຫຼວງນໍ້າທາ

ວັນທີ 17 ກໍລະກົດ 2020 ຢູ່ທີ່ຫ້ອງປະຊຸມຫ້ອງວ່າການແຂວງຫຼວງນໍ້າທາ , ຄະນະຮັບຜີດຊອບໂຄງການກໍ່ສ້າງທາງລົດໄຟລາວ – ຈີນຊ່ວງຜ່ານແຂວງຫຼວງນໍ້າທາ ຂອງສອງຝ່າຍລາວ – ຈີນ ໄດ້ຈັດກອງປະຊຸມປຶກສາຫາລືແຜນໃນການຈັດຕັ້ງປະຕິບັດອັນຮີບດ່ວນໃນການຈັນສັນທີ່ຢູ່ໃໝ່ໃຫ້ປະຊາຊົນ ແລະ ເບີກຈ່າຍເງີນຊົດເຊີຍໃຫ້ແກ່ຜູ້ທີ່ໄດ້ຮັບຜົນກະທົບໃຫ້ສໍາເລັດຕາມລະດັບຄາດໝາຍ.

ໂດຍການເປັນປະທານຂອງທ່ານ ບຸນຈັນ ສິນທະວົງ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ຮອງຫົວໜ້າຄະນະຊີນໍາລວມໂຄງການກໍ່ສ້າງທາງລົດໄຟລາວ – ຈີນ , ເຂົ້າຮ່ວມມີ ທ່ານ ຄໍາໄຫຼ ສີປະເສີດ ຮອງເຈົ້າແຂວງໆຫຼວງນໍ້າທາ, ມີ ທ່ານ ຊຽວຊານ ເຫິວນ ອໍານວຍການໃຫຍ່ບໍລິສັດ ທາງລົດໄຟລາວຈີນຈໍາກັດ,ມີຄະນະຊີ້ນໍາລວມຂັ້ນແຂວງ, ຄະນະກໍາມະການໄກ່ເກ່ຍແກ້ໄຂຜົນກະທົບ, ຄະນະຮັບຜິດຊອບເບີກຈ່າຍຄ່າຊົດເຊີຍຜົນກະທົບໂຄງການກໍ່ສ້າງທາງລົດໄຟລາວ – ຈີນຊ່ວງຜ່ານແຂວງຫຼວງນໍ້າທາ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ທອງແດງ ສິດທິສົນ ຫົວໜ້າຄະນະໄກ່ເກ່ຍຜົນກະທົບທາງລົດໄຟລາວ – ຈີນຊວ່ງຜ່ານແຂວງຫຼວງນໍ້າທາໄດ້ລາຍງານການຈັດຕັ້ງປະຕິບັດວຽກງານຂອງໂຄງການກໍ່ສ້າງທາງລົດໄຟລາວ – ຈີນ, ຊ່ວງຜ່ານແຂວງຫຼວງນໍ້າທາ ໂດຍຫຍໍ້ໃຫ້ທ່ານ ລັດຖະມົນຕີ ພ້ອມດ້ວຍຄະນະຮັບຜີດຊອບໄດ້ຮັບຊາບ. ຈາກນັ້ນຄະນະຮັບຜິດຊອບທັງສອງຝ່າຍລາວ – ຈີນ ກໍໄດ້ປືກສາຫາລື ແລະ ແລກປ່ຽນຄໍາຄິດຄໍາເຫັນຮ່ວມກັນໃນບັນດາໜ້າວຽກອັນຮີບດ່ວນເປັນຕົ້ນແມ່ນວິທີການແກ້ໄຂເຊັ່ນ:

ປຶກສາຫາລືການກໍານົດປັກຫຼັກຂອບເຂດ 80 ເຮັກຕາ, ທີ່ລັດຖະບານໄດ້ຮັບຮອງເພື່ອຈັດສັນໃຫ້ປະຊາຊົນອອກຈາກຂອບເຂດດັ່ງກ່າວ, ປຶກສາຫາລືແກ້ໄຂຈຸດທີ່ຖືກແລວທາງກໍສ້າງທາງລົດໄຟລາວ – ຈີນໃນຈໍານວນ 37 ຄອບຄົວ, ແກ້ໄຂແລ້ວ 3 ຄອບຄົວ, ຍັງເຫຼືອ 34 ຄອບຄົວທີ່ຈະໄດ້ແກ້ໄຂໃຫ້ສໍາເລັດໃນທ້າຍເດືອນກໍລະກົດນີ້ ແລະ ປືກສາຫາລືທາງເວັ້ນທີ່ຕັດໃໝ່ຈາກເຂດສະຖານີໄປຫາທາງຊິງຊັ່ງທີ່ຈະໄດ້ດໍາເນີນການກໍ່ສ້າງໃຫ້ມີຄວາມສະດວກສະບາຍ ແລະ ວ່ອງໄວທັນການ ເພື່ອໃຫ້ສໍາເລັດໂຄງການດັ່ງ ກ່າວ ແລະ ຈະໃຫ້ໄດ້ມອບຮັບໃນວັນທີ 2 ທັນວາ ປີ 2021 ນີ້.

ຜ່ານການປືກສາຫາລືທັງສອງຝ່າຍລາວ – ຈີນ ຕົກລົງເຫັນດີເປັນເອກະພາບກັນຮ່ວມກັນແກ້ໄຂໃນ 3 ບັນຫາທີ່ໄດ້ນໍາມາປຶກສາຫາລືໃນຄັ້ງນີ້, ພ້ອມກັນຈັດຕັ້ງປະຕິບັດບັນດາໜ້າວຽກທີ່ຍັງຄົງຄ້າງ ແລະ ເອົາໃຈໃສ່ເຮັດໃຫ້ສໍາເລັດຕາມລະດັບຄາດໝາຍທີ່ວາງໄວ້ ແລະ ກໍ່ໄດ້ເຊັນບົດບັນທຶກຮ່ວມກັນຕື່ມອີກ.

ຂ່າວ: ສົມພອນ