ສໍານັກຂ່າວ ບີບີຊີ ລາຍງານວ່າ ທ້າວ ຣາຟາເອລ ຊາມູເອລ ນັກທຸລະກິດຊາວອິນເດຍໃນນະຄອນມຸມໃບ ກຽມທີ່ຈະຟ້ອງຮ້ອງພໍ່ແມ່ຂອງຕົນເອງ ໂທດຖານທີ່່ໃຫ້ກໍາເນີດເຂົາໂດຍທີ່ເຂົາບໍ່ຍິນຍອມ ແລະ ວ່າການໃຫ້ກໍາເນີດເດັກໆຂື້ນມາເທິງໂລກເປັນເລື່ອງທີ່ຜິດ ເພາະພວກເຂົາຕ້ອງສູ້ທົນກັບຄວາມທຸກທໍລະມານໄປຕະຫຼອດຊີວິດ
ທ້າວ ຊາມູເອລບອກກັບບີບີຊີວ່າ ເຂົາເຂົ້າໃຈວ່າຄົນເຮົາບໍ່ສາມາດສະແດງຄວາມຍິນຍອມໃດໆ ໄດ້ກ່ອນທີ່ຈະເກີດມາ ແຕ່ເຂົາຢືນຢັນວ່າ ການທີ່ເຮົາເກີດມາບໍ່ແມ່ນການຕັດສິນໃຈຂອງເຮົາ ດັ່ງນັ້ນ ເມື່ອເຮົາບໍ່ໄດ້ຂໍທີ່ຈະເກີດມາ ເຮົາກໍ່ຄວນໄດ້ຮັບຄ່າຊົດເຊີຍໄປຕະຫຼອດຊີວິດຂອງເຮົາ
ຢ່າງໃດກໍ່ຕາມ ແນວຄິດແບບນີ້ຂອງທ້າວ ຊາມູເອລ ບໍ່ໄດ້ເຮັດໃຫ້ເກີດຮອຍແຕກແຍກໃນຄອບຄົວຂອງເຂົາແຕ່ຢ່າງໃດ ໂດຍໜຸ່ມໄວ 27 ປີຄົນນີ້ເຜີຍວ່າເຂົາສະໜິດກັບພໍ່ແມ່ເຊິ່ງເປັນທະນາຍຄວາມທັງຄູ່ ແລະ ເບິ່ງຄືວ່າພວກເຂົາຈະຮັບມືເລື່ອງນີ້ດ້ວຍອາລົມຕະລົກຫຼາຍກວ່າ
ນາງ ຄາວິຕາ ຄາຣນາດ ຊາມູເອລ ມານດາຂອງ ຣາຟເອລ ອອກຖະແຫຼງການລະບຸວ່າ ນີ້ເປັນຄວາມວຸ້ນວາຍລ່າສຸດທີ່ລູກຊາຍຂອງເຂົາສ້າງຂື້ນມາ “ຂ້ອຍຕ້ອງຂໍຍົກຍ່ອງໃນຄວາມຖືດີຂອງລູກຊາຍຂອງຂ້ອຍ ທີ່ຕ້ອງການນໍາຕົວພໍ່ແມ່ຂື້ນສານ ທັງທີ່ຮູ້ວ່າທັງຄູ່ເປັນທະນາຍຄວາມ ແລະ ຖ້າຮາຟາເອລຫາຄໍາອະທິບາຍຢ່າງເປັນເຫດເປັນຜົນວ່າ ເຮົາສາມາດຖາມຫາຄວາມຍິນຍອມຈາກເຂົາໄດ້ຢ່າງໃດ ມາໄດ້ ຂ້ອຍກໍ່ຈະຮັບຜິດຊອບ”.
ທັງນີ້ ຄວາມເຊື່ອຂອງທ້າວ ຊາມູເອລ ມີຮາກຖານແນວຄິດຕໍ່ຕ້ານການເກີດ (anti-natalism) ລະບຸວ່າຊີວິດເຕັມໄປດ້ວຍຄວາມທຸກ ແລະ ຜູ້ຄົນຄວນຢຸດສືບພັນໃນທັນທີ ໂດຍ ທ້າວຊາມູເອລກ່າວວ່າ ການເຮັດແບບນີ້ຈະເຮັດໃຫ້ມະນຸດຊະຍະຊາດຄ່ອຍໆຫາຍໄປຈາກໂລກ ເຊິ່ງເປັນເລື່ອງທີ່ດີສໍາລັບດາວດວງນີ້ຫຼາຍກວ່າ
“ການມີມະນຸດຢູ່ມັນບໍ່ມີຄວາມໝາຍ ຄົນຫຼວງຫຼາຍກໍາລັງທຸກທໍລະມານ ຫາກມະນຸດສູນພັນ ໂລກ ແລະ ສັດຈະມີຄວາມສຸກຍິ່ງຂື້ນ ມະນຸດຄວນຈາກໄປດີກວ່າ ຈະຕ້ອງບໍ່ໄດ້ມີມະນຸດທີ່ຕ້ອງເຈັບປວດ ການມີຢູ່ຂອງມະນຸດໄຮ້ຄວາມໝາຍໂດຍສິ້ນເຊີງ” (ທ້າວຊາມູເອລກ່າວ).
