ຝັນເປັນຈິງ ໜຸ່ມຊື້ເລກເກົ່າທຸກງວດເປັນເວລາ 30 ປີ ຈົນແຈັກພັອດແຕກ 60 ລ້ານໂດລາ

ສຳນັກຂ່າວຕ່າງປະເທດລາຍງານວ່າ Bon Trong ຊາວແຄນນາດາ ເປັນຜູ້ໂຊກດີທີ່ຖືກລາງວັນລັອດເຕີຣີແຈັກພັອດ 60 ລ້ານໂດລາແຄນາດາ (ປະມານ 395 ຕື້ກວ່າກີບ) ເຊິ່ງເຈົ້າໂຕຮູ້ຜົນຕັ້ງແຕ່ຕອນເຊົ້າຂອງຂອງມື້ຕໍ່ມາ. ທັນທີທີ່ລາວໄດ້ກວດເບິ່ງຜົນລາງວັນທາງອິນເຕີເນັດ ແລະ ເຫັນເລກທີ່ອອກ ກໍຮີບຍ່າງໄປຮ້ານຄ້າ ແລະ ຂໍໃຫ້ພະນັກງານພິມຜົນລາງວັນເພື່ອໃຫ້ໝັ້ນໃຈ. ຈາກນັ້ນ ລາວກໍນຳເຈ້ຍໃບນັ້ນກັບເມືອເຮືອນ, ພະຍາຍາມກວດເບິ່ງເຈ້ຍໃບນັ້ນຄືນຢູ່ຫຼາຍຊົ່ວໂມງ ເພາະບໍ່ຢາກເຊື່ອ ແລະ ເລີ່ມຄິດວ່າເງິນລາງວັນມະຫາສານນີ້ ຈະມີຜົນແນວໃດກັບຄອບຄົວຂອງຕົນ.

ບໍລິສັດຫວຍແຄນນາດາຕາເວັນຕົກ (WCLC) ລະບຸໃນຖະແຫຼງການວ່າ ແທນທີ່ຈະໄປຮັບລາງວັນທັນທີ ແຕ່ຜູ້ໂຊກດີຄົນນີ້ລໍຖ້າເກືອບ 10 ເດືອນ ເຊິ່ງນັ້ນກໍເປັນເພາະລາວຍັງຮູ້ສືກຕົກໃຈ ແລະ ຍັງບໍ່ຢາກຈະເຊື່ອວ່າຕົນຖືກລາງວັນມູນຄ່າຫຼາຍຂະໜາດນັ້ນ.
Bon Trong ເຜີຍວ່າ “ຂ້ອຍຮູ້ວ່າມັນຈະຕ້ອງມີການປ່ຽນແປງຢ່າງໃຫຍ່ຫຼວງເລີຍ, ຂ້ອຍຕ້ອງການຄວາມໝັ້ນໃຈວ່າເຮົາພ້ອມແທ້ໆສຳລັບການປ່ຽນແປງເຫຼົ່ານັ້ນ 10 ເດືອນຜ່ານໄປ ຕອນນີ້ຂ້ອຍພ້ອມແລ້ວ, ສິ່ງທຳອິດທີ່ຄິດແມ່ນ ຂ້ອຍຈະມີເງິນສຳລັບໃຊ້ຈ່າຍທຸກຢ່າງ ແລະ ຈະມີຄວາມສຸກທີ່ໄດ້ເຮັດແບບນັ້ນ”.

ທັງນີ້, ຜົນຫວຍລາງວັນແຈັກພັອດງວດນັ້ນຄື 2 3 4 8 9 20 ແລະ 30 ເຊິ່ງລາວບອກວ່າເປັນການລວມເລກວັນທີ ທີ່ມີຄວາມສຳຄັນ ແລະ ວັນເກີດຂອງຄົນໃນຄອບຄົວ ໂດຍລາວໄດ້ຊື້ຫວຍເລກເກົ່າທຸກງວດມາຕະຫຼອດ 30 ປີ. ສ່ວນເງິນທີ່ໄດ້ມາຈະນຳໄປຊື້ເຮືອນຫຼັງໃໝ່ໃຫ້ກັບຄອບຄົວ ແລະ ວາງແຜນທ່ອງທ່ຽວໃນທຸກໆບ່ອນທີ່ຢາກໄປ.