ເມື່ອວັນທີ 6 ກໍລະກົດ 2020 ເວັບໄຊເດລີ່ເມວ ລາຍງານວ່າ: ພາບເດັກນ້ອຍເກີດໃໝ່ຖືຮ່ວງຄຸມກໍາເນີດຢູ່ໃນມື ໄດ້ກາຍເປັນພາບໄວຣັລທີ່ແຊໄປທົ່ວສັງຄົມອອນລາຍຂອງຫວຽດນາມ ຊາວເນັດຕ່າງຮືຮາ ແລະ ເອັນດູໃນຄວາມໜ້າຮັກ ພ້ອມຊື່ນຊົມວ່າເດັກນ້ອຍຄົນນີ້ແຂງແກ່ງຫຼາຍ ແມ່ຄຸມດໍາເນີດແລ້ວ ແຕ່ເອົາບໍ່ຢູ່ ຈຶ່ງຈັບຮວ່ງດັ່ງກ່າວອອກມານໍາໃຫ້ແມ່ໄດ້ເຫັນແບບຊັດເຈນໄປເລີຍ.
ເດັກຄົນນີ້ເປັນເພດຊາຍ ນໍ້າໜັກຕົວຢູ່ທີ່ 3,17 ກິໂລກຣາມ ຮ່າງກາຍແຂງແຮງສົມບູນດີຫຼາຍ ມືນຕາເບິ່ງໂລກຢູ່ທີ່ໂຮງໝໍໄຮຟອງອິນເຕີເນັດເຊິນແນລ ໃນເມືອງໄຮຟອງ ທາງຕອນເໜືອຂອງປະເທດຫວຽດນາມ ເມື່ອວັນທີ 30 ມິຖຸນາ 2020.
ເດັກນ້ອຍ ແລະ ຮ່ວງຄຸມກໍາເນີດເກີດອອກມາໃນເວລາດຽວກັນ ແຕ່ແຍກກັນ ເດັກນ້ອຍບໍ່ໄດ້ຖືຮ່ວງອອກມາຈາກທ້ອງແມ່ ແຕ່ຫຼັງຈາກເກີດບໍ່ພໍເທົ່າໃດອຶດໃຈ ລະຫວ່າງກໍາລັງດີ້ນໄປດີ້ນມາ ເດັກນ້ອຍຄົນນີິ້ກໍ່ຄວ້າເອົາຮ່ວງດັ່ງກ່າວມາກໍາໄວ້ໃນມື ເຊິ່ງທ່ານໝໍທີ່ຊ່ວຍໃນການເກີດຂອງເດັກນ້ອຍຄົນນີ້ແນມເຫັນວ່າພາບເດັກນ້ອຍທີ່ຫາກໍ່ເກີດຖືຮ່ວງຄຸມກໍາເນີດໃນມືເປັນໂມເມັ້ນແຫ່ງຄວາມຊົງຈໍາ ຈຶ່ງໄດ້ຖ່າຍຮູບເກັບໄວ້ ແລະ ໂພສແຊລົງເຟສບຸກຂອງໂຮງໝໍ ພ້ອມລະບຸແຄັບເຊິນວ່າ: ໂມເມັ້ນອາເມດຊິງ ເດັກນ້ອຍຜູ້ກ້າຫານຄົນນີ້ ຜ່າການຄຸມກໍາເນີດຂອງແມ່ມາໄດ້ຢ່າງຢອດຢ່ຽມ ເຂົາພ້ອມຜະຈົນໄພໃນໂລກອັນວຸ່ນວາຍໃບນີ້ແລ້ວ.
ດ້ານແມ່ຂອງເດັກນ້ອຍຄົນນີ້ເຜີຍວ່າ: ຕົນເອງມີລູກມາແລ້ວ 2ຄົນ ຈົນກະທັ້ງເມື່ອ 2 ປີກ່ອນໄດ້ວາງແຜນຄອບຄົວກັບຜູ້ເປັນສາມີວ່າພໍແລ້ວ ແລະ ຕັດສິນໃຈຄຸມກໍາເນີດດ້ວຍການໃຊ້ຮ່ວງຄຸມກໍາເນີດ ຫຼື ຮ່ວງອະນາໄມ ຫຼື ທີ່ເອີ້ນກັນວ່າ IUD (Intrauterine Device) ເພື່ອປ້ອງກັນການຕັ້ງຄັນ ເຊິ່ງຮ່ວງດັ່ງກ່າວໃຊ້ງານໄດ້ 3ປີ ແຕ່ເບິ່ງແລ້ວຮ່ວງັ່ງກ່າວອາດເຊື່ອມຄຸນນະພາບກ່ອນເຖິງເວລາ ຫຼື ສາເຫດໃດກໍ່ບໍ່ຮູ້ແນ່ຊັດ ແຕ່ທັງນີ້ທັງນັ້ນເດັກນ້ອຍຄົນນີ້ຄືຫຼັກຖານຢືນຢັນວ່າຮ່ວງຄຸມກໍາເນີດນີ້ນີ້ໃຊ້ບໍ່ໄດ້ຜົນ.
ທີ່ມາ: ທີວີພູ
