ລັດຖະສະພາສະຫະລັດອາເມລິກາ ໄດ້ອະນຸມັດເງິນຈໍານວນ 37,5 ລ້ານໂດລາສະຫະລັດ ເພື່ອຊ່ວຍເຫລືອວຽກງານ ເກັບກູ້ລະເບີດບໍ່ທັນແຕກ ຕົກຄ້າງແຕ່ປາງສົງຄາມຢູ່ ສປປ ລາວ ໃນປີ 2020 ແລະ ນັບແຕ່ລັດຖະບານ ຂອງທ່ານປະທານາທິບໍດີ ໂດໂນ ທໍາ ແມ່ນໄດ້ໃຫ້ການຊ່ວຍເຫລືອ ວຽກງານເກັບກູ້ລະເບີດຢູ່ລາວແລ້ວ 35 ລ້ານໂດລາສະຫະລັດ.
ບັນຫາດັ່ງກ່າວ, ໄດ້ຮັບການລາຍງານ ຈາກ ທ່ານ ປີເຕີ ເຮມ໋ອນ ເອກອັກຄະລັດຖະທູດຜູ້ມີອໍານາດເຕັມແຫ່ງ ສະຫະລັດອາເມລິກາ ປະຈໍາ ສປປ ລາວ ເມື່ອບໍ່ດົນມານີ້, ໂດຍ ທ່ານ ກ່າວວ່າ: ສະຫະ ລັດອາເມລິກາ ໃຫ້ຄວາມສໍາຄັນຕໍ່ວຽກງານ ເກັບກູ້ລະເບີດບໍ່ທັນແຕກ ຕົກຄ້າງແຕ່ປາງສົງຄາມ ຢູ່ລາວ ເພື່ອຊ່ວຍເຫລືອ ສປປ ລາວ ບັນລຸເປົ້າໝາຍຄວາມປອດໄພ ຈາກລະເບີດດັ່ງກ່າວຮອດ ປີ 2030 ແລະ ຜ່ານມາ ການຊ່ວຍເຫລືອວຽກງານນີ້ ເຫັນວ່າມີລັກສະນະເພີ່ມຂຶ້ນທຸກປີ ແລະ ໃນໂອກາດທີ່ ທ່ານ ບາຣັກ ໂອບາມາ ອະດີດປະທານາທິບໍດີສະຫະລັດ ອາເມລິກາ ໄດ້ມາຢ້ຽມຢາມ ສປປ ລາວ ຢ່າງເປັນທາງການເມື່ອປີ 2016 ຜ່ານມານັ້ນ, ທ່ານ ບາຣັກ ໂອບາມາ ໄດ້ປະກາດຊ່ວຍເຫລືອວຽກງານ ເກັບກູ້ລະເບີດຢູ່ລາວ ຈໍານວນ 90 ລ້ານໂດລາສະຫະລັດໃນໄລຍະ 3 ປີ (2016-2019) ແລະ ໃນໄລຍະລັດຖະບານຂອງທ່ານປະທານາທິບໍດີ ໂດໂນ ທໍາ ກໍໄດ້ສືບຕໍ່ໃຫ້ເງິນຈໍານວນ 35 ລ້ານໂດລາສະຫະລັດ ຊ່ວຍເຫລືອວຽກງານແກ້ໄຂລະເບີດ ບໍ່ທັນແຕກຢູ່ລາວ. ຕາມການລາຍງານຂອງອົງການ ເລກາຊີ ອອຟ ວໍລ (Legacy of War) ແມ່ນສະພາຄອງເກຣສ (Conggress) ໄດ້ອະນຸມັດເງິນຈໍານວນ 37,5 ລ້ານໂດລາສະຫະລັດ ສໍາລັບການຊ່ວຍເຫລືອການ ກວດກູ້ລະເບີດບໍ່ທັນແຕກໃນປີ 2020 ແລະ ຈະເລີ່ມຈັດຕັ້ງປະຕິບັດໃນປີ 2021.
ນັບແຕ່ ປີ 1996-2019 ລັດຖະບານສະຫະລັດອາເມລິກາ ໄດ້ປະກອບທຶນສະໜັບສະໜູນ ເຂົ້າໃນວຽກງານແກ້ໄຂ ບັນຫາລະເບີດບໍ່ທັນແຕກຢູ່ ສປປ ລາວ ໃນຮູບແບບການຮ່ວມມືສອງຝ່າຍ ລວມມີມູນຄ່າຫລາຍກວ່າ 140 ລ້ານໂດລາສະຫະລັດ, ຊຶ່ງຕີລາຄາໄດ້ວ່າ ເປັນປະເທດຫລັກ ໃນການສະໜັບສະໜູນ ວຽກງານດັ່ງກ່າວຢູ່ລາວ, ການຊ່ວຍເຫລືອຂອງລັດຖະບານ ສະຫະລັດອາເມລິກາ ແມ່ນຜ່ານອົງການຈັດຕັ້ງສາກົນ ທີ່ບໍ່ສັງກັດລັດຖະບານ ແລະ ສະໜັບສະໜູນຄະນະ ກໍາມະການແຫ່ງຊາດ ເພື່ອແກ້ໄຂບັນຫາລະ ເບີດບໍ່ທັນແຕກທີ່ຕົກຄ້າງຢູ່ລາວ (ຄຊກລ) ແລະ ໂຄງການເກັບກູ້ລະເບີດແຫ່ງຊາດ (ຄກລ) ໂດຍມີບໍລິ ສັດ ຂອງເອກະຊົນອາເມລິກາ ຕິດຕາມການຈັດຕັ້ງປະຕິບັດ ແລະ ບໍລິຫານຈັດການທຶນ.
ຂ່າວ: ສຸພາສະຫວັນ ສີຊະນະມຸງຄຸນ.
