ພຽງ 1 ເດືອນ ໄຊສົມບູນ ດຶງດູດນັກທ່ອງທ່ຽວເຂົ້າມາທ່ຽວຊົມ ໄດ້ 2.325 ເທື່ອຄົນ.ທ່ານ ສຸກສະຫວາດ ວົງພູມເຫລັກ ຮອງເຈົ້າແຂວງໄຊສົມບູນ ລາຍງານໃນກອງປະຊຸມ ສ່ອງແສງລັດຖະບານ ປະຈຳເດືອນ ພະຈິກ 2023, ທີ່ໄດ້ຈັດຂຶ້ນໃນວັນທີ 15 ພະຈິກ 2023ນີ້ ໂດຍຜ່ານວິດີໂອທາງໄກວ່າ: ໃນໄລຍະໜຶ່ງເດືອນຜ່ານມາ ການຈັດເກັບລາຍຮັບເຂົ້າງົບປະມານ ຂອງແຂວງໄດ້ຫຼາຍກວ່າ 15 ຕື້ກີບ, ຄຸ້ມຄອງລາຍຈ່າຍງົບປະມານ ປະຕິບັດໄດ້ຫຼາຍກວ່າ 74 ຕື້ກີບ. ໃນນີ້, ສາມາດດຶງດູດນັກທ່ອງທ່ຽວ ເຂົ້າມາທ່ຽວຊົມ ແຂວງໄຊສົມບູນ ໄດ້ທັງໝົດ 2.325 ເທື່ອຄົນ, ໃນນັ້ນຈາກ ພາຍໃນ 1.375 ເທື່ອຄົນ, ຕ່າງປະເທດ 950 ເທື່ອຄົນ.ໂອກາດນີ້, ທ່ານ ຮອງເຈົ້າແຂວງໄຊສົມບູນ ຍັງໄດ້ສະເໜີຂໍການພິຈາລະນາ ໃຫ້ລັດຖະບານຊ່ວຍແກ້ໄຂບາງບັນຫາ ໂດຍສະເພາະ ເລື່ອງການສະໜອງທຶນ 50 ຕື້ ໃຫ້ກອງທຶນພັດທະນາ ແຂວງໄຊສົມບູນ, ພ້ອມທັງເລື່ອງທຶນກະຕຸ້ນເສດຖະກິດ ຕາມແຈ້ງການຂອງນາຍົກ ເລກທີ 93/ນຍ, ສະເໜີໃຫ້ທະນາຄານກາງແກ້ໄຂທຶນກະຕຸ້ນເສດຖະກິດ ໃຫ້ກອງທຶນພັດທະນາ ແຂວງໄຊສົມບູນ ແລະ ບັນຫາອື່ນໆ ຕື່ມອີກ. ຂ່າວ: ແຂວງໄຊສົມບູນ
