ຍັງພົບເຫັນຮ້ານອາຫານ ແລະ ຮ້ານບັນເທີງ 8 ຮ້ານ ຢູ່ເມືອງຈັນທະບູລີ ທີ່ລະເມີດລະບຽບການ ແລະ ເປີດເຄື່ອງສຽງກາຍກຳນົດ 80 ດີຊີເບວ ວັນທີ 17 ພະຈິກ 2023 ຄະນະຮັບຜິດຊອບຕິດຕາມ ກວດກາ ແລະ ແກ້ໄຂສຽງເນືອງນັນໃນທຸລະກິດຮ້ານອາຫານ ແລະ ຮ້ານບັນເທີງຢູ່ນະຄອນຫຼວງວຽງຈັນ (ນວ) ຈຸທີ 1 ໄດ້ລົງຕິດຕາມກວດກາ ແລະ ແກ້ໄຂສຽງເນືອງນັນໃນຫົວໜ່ວຍທຸລະກິດຮ້ານອາຫານ ແລະ ຮ້ານບັນເທີງຢູ່ຂອບເຂດເມືອງຈັນທະບູລີ.ຜ່ານການລົງຕິດຕາມຕົວຈິງມີຫຼາຍຮ້ານແມ່ນປະຕິບັດໄດ້ດີຕາມລະບຽບການໄດ້ດີ ແຕ່ກໍຍັງພົບເຫັນຮ້ານອາຫານ ແລະ ຮ້ານບັນເທີງ 8 ຮ້ານທີ່ຍັງລະເມີດລະບຽບການດ້ວຍການເປີດບໍລິການກາຍໂມງເວລາທີ່ີກໍານົດໄວ້ ປະກອບມີ ຮ້ານອາຫານຕົ້ນຄູນ, ຮ້ານອາຫານໄວ້ລຸ້ນອາເມລິກາຢູ່ບ້ານຫ້ວຍຫົງ, ຮ້ານອາຫານລີແລກ ບ້ານສີດຳດວນ, ຮ້ານອາຫານຊູກາ, ຮ້ານອາຫານວີນັດ, ຮ້ານກາເຟຊິວເຄ ແລະ ຮ້ານອາຫານຍິນດີ, ຮ້ານບັນເທີງອອດສະກາບ້ານໂພນຕ້ອງ ເຊິ່ງຮ້ານຈຳນວນນີ້ແມ່ນເປີດເຄື່ອງສຽງກາຍກຳນົດ 80 ດີຊີເບວ ແລະ ປິດຮ້ານເກີນໂມງເວລາທີ່ທາງການກໍານົດໃຫ້ຄື: ຮ້ານອາຫານປິດຮັບລູກຄ້າ 23:00 ໂມງ ປິດຮ້ານເວລາ 23:30 ໂມງ ຮ້ານບັນເທີງປິດສຽງປິດຮັບລູກຄ້າ 24:00 ໂມງ ແລະ ປິດຮ້ານ 1:00 ໂມງ ເຊິ່ງຮ້ານຈໍານວນນີ້ຍັງປະຕິບັດບໍ່ທັນໄດ້ ດັ່ງນັ້ນທາງຄະນະຮັບຜິດຊອບຈຶ່ງໄດ້ເຮັດບົດບັນທຶກກ່າວເຕືອນປັບໃໝຕາມລະບຽບ ແລະ ໄດ້ອອກໜັງສືແຈ້ງເຊີນໃຫ້ເຈົ້າຂອງທຸລະກິດໄປເສຍຄ່າປັບໃໝຢູ່ກອງບັນຊາການ ປກສ ນວ ຕາມລະບຽບການ.
