ວັນທີ 17 ພະຈິກ 2023, ພິທີມອບ-ຮັບ ແລະ ເປີດນໍາໃຊ້ສູນບໍາບັດ, ຟື້ນຟູສຸຂະພາບຜູ້ຕິດຢາເສບຕິດ ໂດຍມີ ພົອ ວິໄລ ຫລ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ເຫລັກໄຫລ ສີວິໄລ ເຈົ້າແຂວງເຊກອງ.ພັອ ຄໍາບານ ພົມມະນີວົງ ຫົວໜ້າກອງບັນຊາການປກສ ແຂວງເຊກອງ ລາຍງານວ່າ: ໂຄງການກໍ່ສ້າງ ແລະ ສ້ອມແປງສູນບໍາບັດ-ຟື້ນຟູສຸຂະພາບຜູ້ຕິດຢາເສບຕິດ ແມ່ນໂຄງການໜຶ່ງທີ່ມີຄວາມສໍາຄັນ, ຈໍາເປັນ ແລະ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເພື່ອເປັນບ່ອນບໍາບັດ ແລະ ຟື້ນຟູສຸຂະພາບໃຫ້ແກ່ລູກ-ຫລານຂອງພໍ່ແມ່ປະຊາຊົນຜູ້ຕິດຢາເສບຕິດທຸກປະເພດ, ທັງເປັນການກອບກູ້ເອົາຊີວິດອັນມືດມົນ ໄປສູ່ຊີວິດອັນແຈ່ມໃສ ແລະ ມີອານາຄົດທີ່ດີ, ມີອາຊີບການທໍາມະຫາກິນທີ່ໝັ້ນຄົງ ເພື່ອໃຫ້ກາຍເປັນຊາວໜຸ່ມ-ໄວໜຸ່ມທີ່ມີອານາຄົດສົດໃສຂອງພໍ໋-ແມ່ ກໍຄື ປະເທດຊາດຕະຫລອດໄປ.ສູນບໍາບັດ-ຟື້ນຟູສຸຂະພາບຜູ້ຕິດຢາເສບຕິດ ຕັ້ງຢູ່ບ້ານທົ່ງຫວາຍ ເມືອງທ່າແຕງ ແຂວງເຊກອງ ຫ່າງຈາກເທສະບານແຂວງປະມານ 68 ກິໂລແມັດ; ການກໍ່ສ້າງສູນດັ່ງກ່າວ ແມ່ນໄດ້ຮັບການສະໜັບສະໜູນງົບປະມານຈາກການນໍາແຂວງ ແລະ ກະຊວງປ້ອງກັນຄວາມສະງົບ, ເລີ່ມລົງມືກໍ່ສ້າງ ໃນວັນທີ 20 ກຸມພາ 2023 ເປັນຕົ້ນມາ ໂດຍນໍາໃຊ້ເນື້ອທີ່ດິນທັງໝົດ 21.363 ຕາແມັດ ຊຶ່ງປະກອບມີ 7 ຕຶກອາຄານ, ສາມາດຮອງຮັບ ແລະ ບັນຈຸຜູ້ຕິດຢາເສບຕິດໄດ້ 500 ຄົນ.
