ຜູ້ຖືກກະທົບໜັກຢູ່ເມືອງສະໜາມໄຊ ໄດ້ຮັບເງິນຊົດເຊີຍແລ້ວ 50%

ການແກ້ໄຂ ແລະ ຟື້ນຟູຫຼັງໄພພິບັດຢູ່ເມືອງສະໜາມໄຊ ມີຄວາມຄືບໜ້າຫຼາຍດ້ານ ໂດຍໄດ້ເບີກຈ່າຍເງິນຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບໜັກ ສໍາເລັດແລ້ວ 50%, ສຳເລັດການຈ່າຍເງິນຊົດເຊີຍສຳລັບຜູ້ທີ່ເສຍຊີວິດ ແລະ ຈ່າຍເງິນອຸດໜູນເດັກກຳພ້າ.

ຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ແຂວງອັດຕະປື ໄດ້ຈັດກອງປະຊຸມປຶກສາຫາລື ແລະ ລາຍງານຄວາມຄືບໜ້າການຈັດຕັ້ງປະຕິບັດວຽກງານແກ້ໄຂ ແລະ ຟື້ນຟູຫຼັງໄພພິບັດຢູ່ເມືອງສະໜາມໄຊ ແຂວງອັດຕະປື ຂຶ້ນໃນວັນທີ 30 ມິຖຸນາ 2020 ທີ່ຫ້ອງວ່າການແຂວງອັດຕະປື

ພາຍໃຕ້ການເປັນປະທານຮ່ວມຂອງ ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ຮອງປະທານຜູ້ປະຈຳການ ຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ທ່ານ ເລັດ ໄຊຍະພອນ ເຈົ້າແຂວງອັດຕະປື ໂດຍມີຜູ້ຕາງໜ້າຈາກຂະແໜງການທີ່ກ່ຽວຂ້ອງຈາກສູນກາງ ແລະ ທ້ອງຖິ່ນເຂົ້າຮ່ວມ.

ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື ລາຍງານຕໍ່ທີ່ປະຊຸມວ່າ: ມາຮອດປັດຈຸບັນນີ້ໄດ້ເບີກຈ່າຍເງິນຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບເບົາ ຈຳນວນ 13 ບ້ານ, 3 ຄຸ້ມ ສຳເລັດແລ້ວ 5 ລາຍການ ຄື: ພາຫະນະ, ທຸລະກິດຄົວເຮືອນ, ເຄື່ອງໃຊ້ຄົວເຮືອນ, ສັດລ້ຽງ ແລະ ເຄື່ອງມືກະສິກຳ – ສະບຽງອາຫານ ລວມມູນຄ່າ 28 ຕື້ກວ່າກີບ ແລະ ກໍາລັງສືບຕໍ່ປະເມີນຜົນກະທົບສຳລັບລາຍການທີ 6 ເຊິ່ງເປັນລາຍການສຸດທ້າຍ ຄື: ສິ່ງປຸກສ້າງ ແລະ ວັດຖຸມີຄ່າ.

ຂະນະດຽວກັນ, ກໍໄດ້ເບີກຈ່າຍເງິນຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບໜັກ ຈຳນວນ 6 ບ້ານ, 1 ຄຸ້ມ ສໍາລັບ 5 ລາຍການ ສໍາເລັດແລ້ວ 50% ລວມມູນຄ່າ 50 ກວ່າຕື້ກີບ ແລະ ກະກຽມເບີກຈ່າຍສ່ວນທີ່ເຫຼືອອີກ 44 ຕື້ກວ່າກີບ ໃຫ້ສໍາເລັດໃນໄວໆນີ້; ສ່ວນລາຍການທີ່ 6 ( ສິ່ງປຸກສ້າງ ແລະ ວັດຖຸມີຄ່າ ) ແມ່ນກຳລັງປະເມີນຜົນກະທົບ.

ໄດ້ສຳເລັດການຈ່າຍເງິນຊົດເຊີຍສຳລັບຜູ້ທີ່ເສຍຊີວິດ ຈຳນວນ 71 ສົບ ມູນຄ່າ 6 ຕື້ກວ່າກີບ ແລະ ຈ່າຍເງິນອຸດໜູນເດັກກຳພ້າ ຈຳນວນ 28 ຄົນ ມູນຄ່າ 2,5 ຕື້ກວ່າກີບ. ນອກຈາກນັ້ນ, ໄດ້ສຳເລັດການບຸກເບີກເນື້ອທີ່ທຳການຜະລິດໃໝ່ 2.140 ເຮັກຕາ ພ້ອມຈັດສັນຕອນດິນ ແລະ ມອບໃຫ້ປະຊາຊົນ, ສຳເລັດການຟື້ນຟູ ແລະ ສ້ອມແປງເສັ້ນທາງ – ຂົວຕ່າງໆ, ສໍາເລັດການກໍ່ສ້າງ ແລະ ສ້ອມແປງໂຮງຮຽນປະຖົມ ແລະ ມັດທະຍົມ ເຊິ່ງສາມາດຮັບເອົາລູກຫຼານຜູ້ປະສົບໄພເຂົ້າຮຽນໄດ້ເປັນປົກກະຕິ. ສ່ວນການຈັດຕັ້ງປະຕິບັດວຽກງານດ້ານອື່ນໆ ກໍມີຄວາມຄືບໜ້າເຊັ່ນດຽວກັນ.

ໂອກາດນີ້, ທ່ານ ປອ. ຄຳແພງ ໄຊສົມແພງ ໄດ້ສະແດງ ຄວາມຊົມເຊີຍຕໍ່ກັບຜົນສໍາເລັດທີ່ທາງອໍານາດການປົກຄອງແຂວງອັດຕະປື ກໍຄືຄະນະກໍາມະການຄຸ້ມຄອງໄພພິບັດຂັ້ນ ແຂວງໄດ້ເອົາໃຈໃສ່ຊີ້ນໍາຢ່າງໃກ້ຊິດຕິດແທດ ເຮັດໃຫ້ບັນດາວຽກໃນຫຼາຍໆດ້ານໄດ້ບັນລຸຕາມແຜນການທີ່ກໍານົດໄວ້.

ເຖິງຢ່າງໃດກໍຕາມ, ເພື່ອຮັບປະກັນໃຫ້ວຽກງານການແກ້ໄຂຟື້ນຟູຫຼັງໄພພິບັດ ໂດຍສະເພາະການຊ່ວຍເຫຼືອປັບປຸງຊີວິດການເປັນຢູ່ຂອງຜູ້ປະສົບໄພພິບັດຢູ່ເມືອງສະໜາມໄຊໃຫ້ດີຂຶ້ນ, ທ່ານລັດຖະມົນຕີ ໄດ້ເນັ້ນໃຫ້ເລັ່ງແກ້ໄຂວຽກງານທີ່ຍັງບໍ່ທັນສຳເລັດ ເປັນຕົ້ນ:

ບັນຫາການກໍ່ສ້າງເຮືອນຖາວອນ, ການຈັດສັນ ແລະ ມອບດິນປຸກສ້າງເຮືອນ, ການຈັດສັນດິນ ເພື່ອທໍາມາຫາກິນ, ບັນຫາໄຟຟ້າ ແລະ ລະບົບນໍ້າກິນ – ນໍ້າໃຊ້ທີ່ບໍ່ພຽງພໍ, ບັນຫາການຊົດເຊີຍທີ່ດິນທີ່ເປັນຂອງປະຊາຊົນ ບ່ອນທີ່ລັດໄດ້ບຸກເບີກເພື່ອນໍາໃຊ້ຈັດແບ່ງໃຫ້ຜູ້ປະສົບໄພພິບັດ, ການຍົກລະດັບພື້ນທີ່ຢູ່ບ່ອນສ້າງເຮືອນຖາວອນ, ບັນຫາການຊົດເຊີຍເສດຖະກິດຄົວເຮືອນ, ການຟື້ນຟູສິ່ງແວດລ້ອມ ແລະ ການກໍ່ສ້າງໂຄງລ່າງພື້ນຖານ.

( ຂ່າວ ຮສສ: ເພັດສະໄໝ )