ຂປລ. ແຫລ່ງຂ່າວຈາກ ແຂວງວຽງຈັນ ໃຫ້ຮູ້ວ່າ: ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບມະຫາວິທະຍາໄລແຫ່ງຊາດ ແລະ ອົງການປົກຄອງແຂວງວຽງຈັນ ຈັດກອງປະຊຸມເຜີຍແຜ່ ແຜນພັດທະນາການທ່ອງທ່ຽວ ເມືອງເຟືອງ ສຳລັບປີ 2023-2033 ຢູ່ເມືອງເຟືອງ ແຂວງວຽງຈັນ ໂດຍການເຂົ້າຮ່ວມຂອງທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງ ຖວທ, ທ່ານ ດາວເຮືອງ ນັນທະວົງ ຮອງເຈົ້າແຂວງວຽງຈັນ, ທ່ານ ຮຸ່ງເພັດ ຈັນທະວົງ ຮອງອະທິການບໍດີມະຫາວິທະຍາໄລແຫ່ງຊາດ ພ້ອມດ້ວຍຜູ້ປະກອບການ, ທຸລະກິດຮ້ານອາຫານ-ການ ທ່ອງທ່ຽວພາຍໃນເມືອງເຟືອງເຂົ້າຮ່ວມ.

ທ່ານ ອຸ່ນທວງ ຂາວພັນ ໄດ້ກ່າວວ່າ: ຈຸດປະສົງຂອງກອງປະຊຸມຄັ້ງ ເພື່ອນຳເອົາແຜນພັດທະນາການທ່ອງທ່ຽວ ເມືອງເຟືອງ ສຳລັບປີ 2023-2033 ລົງເຜີຍແຜ່ໃຫ້ແກ່ບັນດາຊາວເມືອງເຟືອງ ໄດ້ຮັບຮູ້ ແລະ ເຂົ້າໃຈເນື້ອໃນ ແລະ ຈຸດປະສົງຂອງແຜນການພັດທະນາ ແຫລ່ງທ່ອງທ່ຽວໃນເມືອງເຟືອງແບບຍືນຍົງ. ພ້ອມກັນນີ້, ຜູ້ເຂົ້າຮ່ວມກອງປະຊຸມ ໄດ້ຮັບຟັງການນຳສະເໜີແຜນພັດທະນາການທ່ອງທ່ຽວເມືອງເຟືອງ, ເຊິ່ງຍົກໃຫ້ເຫັນເຖິງສະພາບເສດຖະກິດ-ສັງຄົມ ໂດຍລວມ, ທ່າແຮງດ້ານການທ່ອງທ່ຽວຂອງເມືອງເຟືອງ, ວິເຄາະຈຸດດີ-ຈຸດອ່ອນ ສິ່ງທ້າທາຍຕ່າງໆ, ຈຸດໝາຍລວມຂອງການພັດທະນາການທ່ອງທ່ຽວຂອງເມືອງ, ຄາດໝາຍສູ້ຊົນ ແລະ ຮັບຟັງການສະເໜີແນວຄວາມຄິດໃນການພັດທະນາ ແລະ ການກຳນົດກິດຈະກຳການທ່ອງທ່ຽວໃນແຕ່ລະຂົງເຂດ ເພື່ອໃຫ້ສອດຄ່ອງ ແທດເໜາະກັບເຂດດັ່ງກ່າວ.

ທ່ານ ດາວເຮືອງ ນັນທະວົງ ໄດ້ມີຄຳເຫັນວ່າ: ການສ້າງແຜນພັດທະນາການທ່ອງທ່ຽວ ຂອງເມືອງເຟືອງ ກໍແມ່ນໜຶ່ງໃນຍຸດທະສາດ ຂອງການພັດທະນາທີ່ເປັນລະບົບ ເພື່ອຄຸ້ມຄອງ ແລະ ຄວບຄຸມການຂະຫຍາຍຕົວ ຂອງວຽກງານການທ່ອງທ່ຽວໃນຕໍ່ໜ້າ ໃຫ້ມີຄວາມຍືນຍົງ ແລະ ຮັກສາໄດ້ດ້ານນຳໃຊ້ຊັບພະຍາກອນການທ່ອງທ່ຽວຢ່າງເໝາະສົມ, ການຮັກສາສິ່ງແວດລ້ອມ-ວັດທະນະທຳສັງຄົມ ທີ່ເປັນເອກະລັກ ໄວ້ກັບທ້ອງຖິ່ນຕະຫລອດໄປ,

ສາມາດດຶງດູດໃຫ້ມີນັກທ່ອງທ່ຽວເຂົ້າມາທ່ຽວ ເມືອງເຟືອງ ກໍຄືແຂວງວຽງຈັນໃຫ້ຫລາຍຂຶ້ນ. ເພື່ອເຮັດໃຫ້ແຜນພັດທະນາດັ່ງກ່າວນີ້ ໃຫ້ໄດ້ຮັບການຈັດຕັ້ງປະຕິບັດຢ່າງມີຮູບປະທຳນັ້ນ ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງ ຈົ່ງເປັນເຈົ້າການໃນການຈັດຕັ້ງປະຕິບັດ ການພັດທະນາ ແລະ ຄຸ້ມຄອງວຽກງານທ່ອງທ່ຽວ ຂອງເມືອງເຟືອງ ໃຫ້ໄປຕາມແຜນແມ່ບົດຢ່າງເຂັ້ມງວດ ພ້ອມທັງນຳເອົາແຜນພັດທະນາດັ່ງກ່າວນີ້ ໄປຈັດຕັ້ງເຜີຍແຜ່ໃຫ້ພໍ່ແມ່ປະຊາຊົນ, ບັນດານັກທຸລະກິດ-ຜູ້ປະກອບການຢູ່ພາຍໃນເມືອງ ໃຫ້ຮັບຊາບ ແລະ ປະຕິບັດຕາມ ພ້ອມທັງເອົາເຂົ້າເປັນສ່ວນໜຶ່ງ ຂອງແຜນພັດທະນາ ເສດຖະກິດ-ສັງຄົມຂອງເມືອງເຟືອງ ຕາມແຕ່ໄລຍະ.