ສປປ ລາວ ສືບຕໍ່ເຂັ້ມງວດກັ້ນກອງຄົນເຂົ້າເມືອງ ຢູ່ບັນດາດ່ານສາກົນ

ຄະນະ​ສະ​ເພາະ​ກິດປ້ອງ​ກັນ, ຄວບ​ຄຸມ ​ແລະ ​ແກ້​ໄຂ​ການລະບາດ​ຂອງ​ພະຍາດ ​ໂຄ​ວິດ-19 ​ໄດ້​ເຂັ້ມ​ງວດ​ ໃນ​ການ​ເຝົ້າ​ລະວັງ​ກວດ​ຄົນ​ເຂົ້າ​ເມືອງ ຢູ່​ບັນດາ​ດ່ານ​ສາກົນ​ຕ່າງໆ ​ເຊິ່ງມາ​ຮອດ​ວັນ​ທີ 17 ມິຖຸນາ 2020 ​ມີຜູ້ເດີນທາງເຂົ້າມາທັງໝົດ 1.930ຄົນ, ​​ໃນ​ນັ້ນ​ຜ່ານ​ດ່ານ​ລາວ-​ໄທ 1.348 ຄົນ, ຜ່ານ​ດ່ານ ລາວ-​ຈີນ 49 ຄົນ, ດ່ານ​ລາວ-​ຫວຽດນາມ 527 ຄົນ, ສະໜາມບິນ​ວັດ​ໄຕ​ສາກົນ 6 ຄົນ, ທັງໝົດ​ໄດ້ແທກອຸນຫະພູມຮ່າງກາຍ, ບໍ່ມີອາການເປັນໄຂ້ ແລະ ໄດ້ເກັບຕົວຢ່າງທັງໝົດມາກວດ ​ເພື່ອ​ຊອກ​ຫາ​ເຊື້ອ​ໂຄ​ວິດ-19 (ຍົກ​ເວັ້ນແຕ່​ຜູ້​ຂັບ​ລົດ​ຂົນ​ສົ່ງ ​ແລະ​ ຜູ້​ຕິດ​ຕາມ​).

ທ່ານ ນາງ ພອນ​ປະ​ເສີດ ​ໄຊ​ຍະ​ມຸງຄຸນ ຮອງ​ຫົວໜ້າກົມ​ຄວບ​ຄຸມພະ​ຍາດຕິ​ດຕໍ່, ກະຊວງ​ສາທາ ລະນະ​ສຸກ ​ໄດ້​ກ່າວ​ໃນ​ພິທີ​ຖະ​ແຫລ​ງຂ່າວ ​ໃນ​ວັນ​ທີ 18 ມິຖຸນາ 2020 ວ່າ: ປັດຈຸບັນ ລາວ ຍັງ​ບໍ່​ພົບ​ຜູ້​ຕິດ​ເຊື້ອ​ໂຄ​ວິດ-19 ​ເພີ່ມ​ຂຶ້ນ​ເປັນ​ມື້​ທີ 67, ໃນ​ຄະນະ​ທີ່ ບັນດາ​ປະ​ເທດ​ທີ່​ມີ​ຊາຍ​ແດນ ​ຕິດ​ກັບ​ລາວ ມີການຢັ້ງຢືນຜູ້ຕິດເຊື້ອພະຍາດ​ໂຄ​ວິດ-19 ​ເຊິ່ງມາຮອດເວລາ 6:00 ໂມງເຊົ້າ ຂອງວັນທີ 17 ມິຖຸນາ ຢູ່​ປະ​ເທດ​ຈີນ ມີ​ຜູ້​ຕິດ​ເຊື້ອ​ໂຄ​ວິດ-19 ທັງໝົດ 83.276, ​ເສຍ​ຊີວິດ 4.634 ຄົນ, ຫວຽດນາມ ກໍລະນີ​ສະ​ສົມ 335 ຄົນ, ກຳປູ​ເຈຍ ກໍລະນີ​ສະ​ສົມ 128 ຄົນ, ມຽນມາ ກໍລະນີ​ສະ​ສົມ 262 ຄົນ, ​ເສຍຊີວິດ 6 ຄົນ ​ແລະ ​ໄທ 3.135 ຄົນ ​​ເສຍ​ຊີວິດ 58 ຄົນ.

​ເຖິງ​ແມ່ນ​ວ່າ ສປປ ລາວ ຈະ​ບໍ່​ພົບ​ຜູ້​ຕິ​ດ​ເຊື້ອ​ໃໝ່​ເພີ່ມ​​ເ​ປັນ​ເວລາ 2​ ເດືອນ​ປາຍ​ແລ້ວກໍຕາມ, ແຕ່ຂໍຮຽກຮ້ອງໃຫ້​ປະຊາຊົນ​​ລາວ ໃນ​ຂອບ​ເຂ​ດທົ່ວ​ປະ​ເທດ ສືບ​ຕໍ່​ເອົາ​ໃຈ​ໃສ່ປະຕິບັດ​ມາດ​ຕະການ​ ຂອງ​ຄະນະ​ສະ​ເພາະ​ກິດ​ວາງ​ອອກ ​ໃນ​ແຕ່ລະ​ໄລຍະ​ຢ່າງ​ເຂັ້ມ​ງວດ ​ເພື່ອ​ປ້ອງ​ກັນບໍ່​ໃຫ້​ເກີດ​ມີ​ຜູ້​ຕິດ​ເຊື້ອພະຍາດດັ່ງ​ກັບ​ຄືນ​ມາ​ລະບາດ​ເປັນ​ຄັ້ງ​ທີສອງ.

ຂ່າວ: ກິດ​ຕາ

ທ່ານບໍ່ມີສິດສຳເນົາ ບົດຄວາມນີ້ໄດ້ ສົນໃຈບົດຄວາມຕິດຕໍ່ ຜູ້ດູແລລະບົບຖ້າສົນໃຈບົດຄວາມນີ້