ກອງປະຊຸມດັ່ງກ່າວໄດ້ຈັດຂຶ້ນຢູ່ຫ້ອງປະຊຸມ ກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ ໂດຍການເປັນປະທານຂອງທ່ານ ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ, ຫົວໜ້າຄະນະຮັບຜິດຊອບວຽກງານກໍ່ສ້າງຮາກຖານ ນະຄອນຫຼວງວຽງຈັນ, ມີບັນດາຄະນະກົມໃຫຍ່, ກອງເສນາກໍ່ສ້າງຮາກຖານ ປກສ ນວ, ກອງບັນຊາການ 9 ເມືອງ ແລະ ພະນັກງານກໍ່ສ້າງຮາກຖານ 188 ຄົນເຂົ້າຮ່ວມ.
ສະເພາະການຫັນລົງກໍ່ສ້າງຮາກຖານການເມືອງໃນຊຸດນີ້ແມ່ນໄດ້ເພີ່ມກຳລັງລົງກໍ່ສ້າງຮາກຖານການເມືອງຕື່ມອີກ 3 ເມືອງ ຈາກເດີມ 6 ຕົວເມືອງ ລວມເປັນ 9 ເມືອງ, ເພື່ອສືບຕໍ່ແກ້ໄຂປະກົດການຫຍໍ້ທໍ້ຕ່າງໆໃຫ້ຫຼຸດໜ້ອຍຖອຍລົງເທື່ອລະກ້າວ ເພື່ອເຮັດໃຫ້ນະຄອນຫຼວງວຽງຈັນ ມີຄວາມສະຫງົບໂດຍພື້ນຖານ ພ້ອມກັນສືບຕໍ່ຈັດຕັ້ງປະຕິບັດຕາມແຜນແມ່ບົດຂອງກະຊວງປ້ອງກັນຄວາມສະຫງົບ ວາງອອກຕາມ 4 ເນື້ອໃນ 4 ຄາດໝາຍ
ໂດຍປະຕິບັດນັບແຕ່ບາດກ້າວ 1-2-3-4 ໃນການກະກຽມຂຶ້ນແຜນ, ເກັບກໍາຂໍ້ມູນ, ແກ້ໄຂ ແລະ ສະຫຼຸບຖອດຖອນບົດຮຽນ; ສຳລັບ 6 ເມືອງ ທີ່ຈັດຕັ້ງຜ່ານມາກ່ອນແມ່ນໃຫ້ສືບຕໍ່ຈັດຕັ້ງປະຕິບັດບາດກ້າວທີ່ 3 ຄື: ແກ້ໄຂວຽກທີ່ຍັງຄົງຄ້າງເປັນຕົ້ນ ການແກ້ໄຂວຽກງານສຳມະໂນຄົວ ແລະ ອອກບັດປະຈຳຕົວ, ວຽກງານແກ້ໄຂຄົນຕ່າງປະເທດ ແລະ ວຽກງານແກ້ໄຂປະກົດການຫຍໍ້ທໍ້ທາງອາຍາເປັນຕົ້ນ ການປຸ້ນຈີ້, ຊີງຊັບ ລັກຊັບ ແລະອື່ນໆ.
ໃນກອງປະຊຸມເຜີຍແຜ່ແຜນຫັນລົງກໍ່ສ້າງຮາກຖານການເມືອງຕິດພັນການຈັດສັນຄວາມເປັນລະບຽບຮຽບຮ້ອຍ ປຸກລະດົມກໍາລັງແຮງທົ່ວປວງຊົນເຂົ້າຮ່ວມຂະບວນການແຂ່ງຂັນ “ ຮັກຊາດ-ພັດທະນາ ” ຕິດພັນກັບວຽກງານ 3 ສ້າງ ຢູ່ ນະຄອນຫຼວງວຽງຈັນ ສົກປີ 2020-2021 ທີ່ຈັດຂຶ້ນໃນວັນທີ 16 ມິຖຸນາ 2020, ພົຕ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ຫົວໜ້າຄະນະຮັບຜິດຊອບວຽກງານກໍ່ສ້າງຮາກຖານ ນະຄອນຫຼວງວຽງຈັນ,
ໄດ້ກ່າວເນັ້ນໃຫ້ກອງກໍ່ສ້າງຮາກຖານ ປກສ ນະຄອນຫຼວງວຽງຈັນ ໃນປີ 2020-2021 ນີ້ ຕ້ອງສຸມໃສ່ແກ້ໄຂວຽກງານສຳມະໂນຄົວຜູ້ທີ່ຍັງຕົກຄ້າງ, ຍົກຍ້າຍມາຢູ່ໃໝ່, ເດັກເກີດໃໝ່ ທີ່ບໍ່ທັນຂຶ້ນສຳມະໂນຄົວໃຫ້ໄດ້ 50 ສ່ວນຮ້ອຍ. ນອກຈາກນີ້ໃຫ້ເອົາໃຈໃສ່ຄຸ້ມຄອງກວດກາຄືນບັນດາຄົນຕ່າງປະເທດ ທີ່ມາພັກເຊົາ ແລະ ປະກອບອາຊີບຖືກຕ້ອງ ແລະ ບໍ່ຖືກຕ້ອງ,
ກໍາໃຫ້ໄດ້ເປົ້າໝາຍ ເພື່ອສະກັດກັ້ນການກໍ່ອາຊະຍາກຳທາງດ້ານຄອມພິວເຕີ, ທາງອິນເຕີເນັດ ທີ່ແອບແຝງລີ້ຊ້ອນເພື່ອສ້າງຄວາມບໍ່ສະຫງົບໃນທຸກຮູບແບບ, ນອກຈາກນີ້, ໃຫ້ເອົາໃຈໃສ່ເຜີຍແຜ່ໂຄສະນາລະບຽບກົດໝາຍໃຫ້ປະຊາຊົນເຂົ້າໃຈ ແລະ ໃຫ້ເຂົາເຈົ້າມີສ່ວນຮ່ວມເຂົ້າໃນວຽກງານປ້ອງກັນຄວາມສະຫງົບ ເພື່ອເຮັດໃຫ້ບັນຫາປະກົດການຫຍໍ້ທໍ້ຕ່າງໆໄດ້ຮັບການແກ້ໄຂ ແລະ ຫຼຸດລົງຢ່າງຂາດຕົວ.
