ຕາມຂໍ້ມູນໃນກອງປະຊຸມຄະນະຮັບຜິດຊອບກຽມພ້ອມເປີດປະເທດ ເພື່ອຕ້ອນຮັບນັກທ່ອງທ່ຽວ ໃນວັນທີ 15 ທັນວາ ທ່ານ ນາງ ສວນສະຫວັນ ວິຍະເກດ ໃຫ້ຮູ້ວ່າ: ເພື່ອເປັນບ່ອນອີງໃຫ້ແກ່ບັນດາກະຊວງ ທີ່ກ່ຽວຂ້ອງ ແລະ ພາກທຸລະກິດ ໃນການກະກຽມແຜນການເປີດປະເທດ ເພື່ອຕ້ອນຮັບນັກທ່ອງທ່ຽວໃຫ້ມີຄວາມປອດໄພຈາກໂຄວິດ-19 ຕາມທິດຊີ້ນຳຂອງລັດຖະບານ ໃນວັນທີ 9 ທັນວາ 2021 ຜ່ານມາ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຈັດກອງປະຊຸມລະຫວ່າງພາກລັດ ແລະ ພາກທຸລະກິດ ຮ່ວມກັບບັນດາແຂວງທີ່ຢູ່ໃນເປົ້າໝາຍການທ່ອງທ່ຽວສີ ຂຽວ, ຊຶ່ງປະກອບ ມີ: ນະຄອນຫລວງວຽງຈັນ, ແຂວງວຽງຈັນ, ແຂວງຫລວງພະບາງ, ແຂວງຈໍາປາສັກ, ແຂວງຄໍາມ່ວນ, ແຂວງຊຽງຂວາງ, ແຂວງອຸດົມໄຊ ແລະ ແຂວງໄຊຍະບູລີ.

ຜ່ານການຮັບຟັງການລາຍງານຂອງບັນດາແຂວງ ຮັບຮູ້ໄດ້ວ່າ ບັນດາແຂວງໄດ້ມີການກະກຽມຄວາມພ້ອມ ເຊັ່ນ: ການເຮັດອະນາໄມ ປັບປຸງແຫລ່ງທ່ອງທ່ຽວຈໍານວນໜຶ່ງ, ບາງແຂວງ ກໍໄດ້ນໍາສະເໜີການນໍາແຂວງແຕ່ງຕັ້ງຄະນະກະກຽມການເປີດປະເທດ ເພື່ອຕ້ອນຮັບນັກທ່ອງທ່ຽວ, ໄດ້ມີການຝຶກອົບຮົມການ ບໍລິການຈໍານວນໜຶ່ງ ໂດຍສະເພາະແມ່ນໂຄງການ LaoSafe ໄດ້ມີການຝຶກອົບຮົມຄູຝຶກ (ແຕ່ຍ້ອນການລະບາດຂອງພະຍາດໂຄວິດ-19) ຈຶ່ງໄດ້ມີການຝຶກອົບຮົມຜ່ານລະບົບທາງໄກ ກັບບັນດາແຂວງ, ເພື່ອເປັນການສະໜັບສະໜູນວຽກງານດັ່ງກ່າວຕາມພາລະບົດບາດ.

ຫຼ້າສຸດສໍານັກງານນາຍົກລັດຖະມົນຕີ ໄດ້ອອກແຈ້ງການສະບັບເລກທີ 1656/ຫສນຍ ນະຄອນຫຼວງວຽງຈັນ, ວັນທີ 15 ທັນວາ 2021 ເຊິ່ງເຫັນດີຮັບຮອງການປະເມີນ ແລະ ແຜນປະຕິບັດງານ ສໍາລັບເຂດທ່ອງທ່ຽວລາວສີຂຽວ ເພື່ອການທ່ອງທ່ຽວທີ່ປອດໄພຈາກພະຍາດ COVID-19 ໃນ ສປປ ລາວ ແລະ ຮັບຮອງແຜນຈັດຕັ້ງປະຕິບັດເພື່ອກະກຽມຕ້ອນຮັບນັກທ່ອງທ່ຽວ ຊຶ່ງມີ 7 ໜ້າວຽກຫຼັກ ແລະ 34 ຫນ້າວຽກຍ່ອຍ ແລະ ອະນຸມັດ ອອກຂໍ້ຕົກລົງ ແຕ່ງຕັ້ງຄະນະຮັບຜິດຊອບກະກຽມແຜນເປີດປະເທດ ເພື່ອຕ້ອນຮັບນັກທ່ອງທ່ຽວ ຕາມການສະເຫນີຂອງກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ.

ເຫັນດີກໍານົດເອົາວັນທີ 17 ທັນວາ 2021 ເປັນມື້ຖະແຫຼງຂ່າວແຜນການຕ້ອນຮັບນັກທ່ອງທ່ຽວ ແລະ ກໍານົດເອົາວັນທີ 01 ມັງກອນ 2022 ເປັນມື້ເປີດຕ້ອນຮັບນັກທ່ອງທ່ຽວ, ເພື່ອຄວາມເປັນເອກະພາບສູງ ແລະ ເປັນເຈົ້າການໃນການຈັດຕັ້ງປະຕິບັດຕົວຈິງ ໃຫ້ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເປັນໃຈກາງ ສົມທົບກັບພາກສ່ວນກ່ຽວຂ້ອງ ສືບຕໍ່ກະກຽມ ແລະ ລາຍງານການກະກຽມຄວາມພ້ອມຕ່າງໆ ຕໍ່ກອງປະຊຸມ ລັດຖະບານສະໄຫມວິສາມັນ ໃນທ້າຍເດືອນ ທັນວາ 2021.