ລັດຖະບານ ຣາຊະອານາຈັກລຸກຊໍາບວກ ໄດ້ສືບຕໍ່ໃຫ້ການສະໜັບສະໜູນທຶນເພີ່ມອີກ 1,2 ລ້ານເອີໂຣ ເພື່ອນຳໃຊ້ເຂົ້າວຽກງານບົ່ງມະຕິພະຍາດ, ຫລຸດຜ່ອນກໍລະນີຕິດເຊື້ອ ແລະ ປ້ອງກັນການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ, ມາຮອດປັດຈຸບັນ ການຊ່ວຍເຫລືອຈາກລັດຖະບານລຸກຊໍາບວກ ເພື່ອຕ້ານການລະບາດຂອງພະຍາດໂຄວິດ-19 ມີເຖິງ 5,2 ລ້ານເອີໂຣ.

ພິທີມອບ-ຮັບ ທຶນຊ່ວຍເຫລືອໃນຄັ້ງນີ້, ໄດ້ຈັດຂຶ້ນ ໃນວັນທີ 10 ທັນວາ 2021 ຢູ່ກະຊວງສາທາລະນະສຸກ ຕາງໜ້າມອບໂດຍ ທ່ານ Sam Schreiner ອຸປະທູດແຫ່ງຣາຊະອານາຈັກລຸກຊຳບວກ ແລະ ຮັບໂດຍ ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ. ມີ ຜູ້ຕາງໜ້າຈາກກົມເອີຣົບ-ອາເມລິກາ ກະຊວງການຕ່າງປະເທດ, ກົມຮ່ວມມືສາກົນ ກະຊວງແຜນການ ແລະ ການລົງທຶນ, ອົງການ LuxDev ປະຈຳລາວ, ອົງການ WHO, ອົງການ CHAI ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໂດຍປະສານງານຮ່ວມມືກັບກະຊວງສາທາລະນະສຸກ, ອົງການຮ່ວມມືພັດທະນາຂອງລຸກຊຳບວກ ຈະໃຫ້ທຶນເພີ່ມເຕີມແກ່ ອົງການອາຫານໂລກ (WFP), ສູນວິເຄາະ ແລະ ລະບາດວິທະຍາແຫ່ງຊາດ, ສະຖາບັນປັດສະເຕີລາວ ແລະ ໂຄງການສະໜັບສະໜູນຂະແໜງສາທາລະນະສຸກ ໄລຍະ 2 ຊຶ່ງມີຈຸດປະສົງ ເພື່ອຮັບປະກັນວຽກງານສະໜອງອາຫານ ແລະ ສິ່ງຂອງທີ່ຈຳເປັນ ໃຫ້ແກ່ບັນດາແຮງງານລາວ ທີ່ຢູ່ໃນບັນດາສູນກັກກັນບໍລິເວນ ໂດຍຜ່ານອົງການອາຫານໂລກ (WFP) ຈຳນວນ 481.000 ເອີໂຣ; ປະກອບສ່ວນເຂົ້າໃນການສ້າງຄວາມອາດສາມາດ ທາງດ້ານກວດວິເຄາະ, ບົ່ງມະຕິພະຍາດໂຄວິດ-19 ໂດຍຜ່ານ ສະຖາບັນປັດສະເຕີລາວ (iPL) ຈຳນວນ 350.000 ເອີໂຣ; ສະໜັບສະໜູນວຽກງານຕອບໂຕ້ການລະບາດຂອງພະຍາດໂຄວິດ-19 ຢູ່ສູນກາງ ແລະ ແຂວງ ໂດຍຜ່ານ ໂຄງການສະໜັບສະໜູນຂະແໜງສາທາລະນະສຸກ ໄລຍະ 2 (LAO/027) ຈຳນວນ 369.000 ເອີໂຣ.

ດັ່ງ ນັ້ນ ໂຄງການ LAO/027 ຈະສືບຕໍ່ເຮັດວຽກຮ່ວມມືຄຽງຄູ່ກັບ ພະນັກງານຜູ້ໃຫ້ບໍລິການດ້ານສຸຂະພາບ ທັງຢູ່ຂັ້ນສູນກາງ ແລະ ຂັ້ນແຂວງ ເພື່ອສຸມໃສ່ວຽກງານຮັກສາສຸຂະພາບຂອງແມ່ ແລະ ເດັກ-ເດັກເກີດໃຫມ່ (MNCH) ທີ່ຖືກສະດຸດໄປຍ້ອນພະຍາດໂຄວິດ-19 ເພື່ອເຮັດໃຫ້ບັນລຸຕາມເປົ້າໝາຍທີ່ທາງລັດຖະບານໄດ້ວາງໄວ້.

ໂຄງການສະໜັບສະໜູນຂະແໜງສາທາລະນະສຸກ ລາວ-ລຸກຊຳບວກ ໄລຍະ 2 (LAO/027) ແມ່ນການລົງທຶນຮ່ວມ ລະຫວ່າງລັດຖະບານ ສປປ ລາວ ແລະ ຣາຊະອານາຈັກລຸກຊຳບວກ ຊຶ່ງຈັດຕັ້ງປະຕິບັດໂດຍກະຊວງສາທາລະນະສຸກ ແລະ ອົງການຮ່ວມມືພັດທະນາຂອງລຸກຊໍາບວກ.