ທຸກໆປີ ທົ່ວປະເທດມີຜູ້ຕິດເຊື້ອ ພະຍາດໄຂ້ຍຸງລາຍ ແລະ ເຮັດໃຫ້ມີຜູ້ເສຍຊີວິດ ຈາກເຊື້ອພະຍາດດັ່ງກ່າວ ເປັນຈຳນວນ ຫລວງຫລາຍ, ເຊິ່ງປີຜ່ານມາ ສປປ ລາວ ມີຜູ້ຕິດເຊື້ອ 39.000 ຄົນ ແລະ ເສຍຊີວິດ 76 ຄົນ. ສຳລັບປີນີ້ກໍເປັນອີກປີໜຶ່ງ ທີ່ເກີດການລະບາດ ຂອງເຊື້ອພະຍາດ ນີ້ເຊັ່ນດຽວກັນ, ໂດຍອີງຕາມການລາຍງານ ສູນຂ່າວສານການແພດສຸຂະສຶກສາ ກະຊວງສາທາລະນະສຸກ ກ່ຽວກັບການ ເຝົ້າລະວັງ ພະຍາດໄຂ້ຍຸງລາຍ ປະຈໍາວັນທີ 11 ມິຖຸນາ 2020 ມີຜູ້ຕິດເຊື້ອເພີ່ມ 25 ກໍລະນີ. ກໍລະນີສະສົມທັງໝົດ ແຕ່ວັນທີ 28 ທັນວາ 2019-11 ມິຖຸນາ 2020 ມີ 1.733 ກໍລະນີ ແລະ ເສຍຊີວິດ 5 ກໍລະນີ.
ຜູ້ຕິດເຊື້ອໄຂ້ຍຸງລາຍ ຫລາຍກວ່າໝູ່ແມ່ນ ນະຄອນຫລວງວຽງຈັນ ຈຳນວນຜູ້ຕິດເຊື້ອມີ 403 ກໍລະນີ, ເສຍຊີວິດ 2 ຄົນ, ຮອງລົງມາແມ່ນ ແຂວງ ວຽງຈັນ 241 ກໍລະນີ, ອັດຕະປື 213 ກໍລະນີ, ບໍລິຄຳໄຊ 178 ກໍລະນີ, ເສຍຊີວິດ 1 ກໍລະນີ, ຄຳມ່ວນ 154 ກໍລະນີ, ເສຍຊີວິດ 1 ກໍລະນີ, ສະຫວັນນະເຂດ 122 ກໍລະນີ, ສາລະວັນ 103 ກໍລະນີ, ໄຊຍະບູລີ 99 ກໍລະນີ, ເສຍຊີວິດ 1 ຄົນ, ເຊກອງ 49 ກໍລະນີ, ຫລວງນໍ້າທາ 40 ກໍລະນີ, ອຸດົມໄຊ 34 ກໍລະນີ, ໄຊສົມບູນ 32 ກໍລະນີ, ຫລວງພະບາງ 31 ກໍລະນີ, ບໍ່ແກ້ວ 18 ກໍລະນີ, ຈຳປາສັກ 10 ກໍລະນີ, ຜົ້ງສາລີ 5 ກໍລະນີ ແລະ ຫົວພັນ 1 ກໍລະນີ. ມີພຽງແຕ່ແຂວງຊຽງຂວາງ ທີ່ຍັງບໍ່ພົບກໍລະນີ ຜູ້ຕິດເຊື້ອໄຂ້ຍຸງລາຍດັ່ງກ່າວ.
ພ້ອມນີ້, ຈຶ່ງໄດ້ຮຽກຮ້ອງໃຫ້ທຸກພາກສ່ວນ ຕ້ອງມີສ່ວນຮ່ວມພ້ອມໃຈ ກັນສະກັດກັ້ນ ແລະ ຕ້ານພະຍາດໄຂ້ຍຸງລາຍ ໂດຍການນຳໃຊ້ ມາດຕະການທີ່ສຳຄັນ ໃນການຄວບຄຸມພະຍາດ ກໍຄື ການຫັນເອົາຊຸມຊົນເປັນກຸນແຈ ສຳຄັນໃນການປ້ອງກັນ ແລະ ຄວບຄຸມພະຍາດດັ່ງກ່າວ ເປັນຕົ້ນ ການມີສ່ວນຮ່ວມຂອງບຸກຄົນ, ຄອບຄົວ ໃນການປະຕິບັດມາດຕະການ 5ປ ດ້ວຍຕົນເອງ, ໂດຍຂະແໜງສາທາລະນະສຸກເປັນຜູ້ເຜີຍແຜ່ ແລະ ແນະນຳວິທີການປະຕິບັດ ສໍາລັບການປະຕິບັດຕົວຈິງ ແມ່ນພາລະໜ້າທີ່ຂອງທຸກຄອບຄົວ ຕ້ອງເປັນເຈົ້າການໃນການປະຕິບັດດ້ວຍຕົນເອງ ເພາະຍຸງລາຍເກີດ ແລະ ແຜ່ພັນຢູ່ນຳເຮືອນປະຊາຊົນ “ບໍ່ມີ ໜອນນ້ຳ ກໍຈະບໍ່ມີຍຸງລາຍ”.
ຂ່າວ: ມະນີທອນ
