ລາຄານ້ຳມັນດິບ ໃນຕະຫລາດ ເວສເທັກຊັດສ ປັບເພີ່ມຂຶ້ນ 85 ເຊັນ ຫລື 2,15% ມາຢູ່ທີ່ 40,40 ໂດລາ ສະຫະລັດ ຕໍ່ຖັງ ຫລັງຈາກ ກຸ່ມປະເທດ ຜູ້ສົ່ງອອກ ນ້ຳມັນ(OPEC)ແລະ ຊາດພັນທະມິດ ຫລື(OPEC Plus) ບັນລຸຂໍ້ຕົກລົງ ຂະຫຍາຍເວລາ ປັບຫລຸດ ກຳລັງການຜະລິດ ນ້ຳມັນ 9,7 ລ້ານຖັງຕໍ່ວັນ ອອກໄປຈົນເຖິງ ເດືອນກໍລະກົດນີ້ ຈາກເມື່ອກ່ອນ ທີ່ມີກຳນົດສິ້ນສຸດ ໃນເດືອນມິຖຸນານີ້. ໃນຖະແຫລງການຈາກ ໂອເປັກ ພັດສ ລະບຸວ່າ: ຜູ້ເຂົ້າຮ່ວມ ກອງປະຊຸມ ເມື່ອບໍ່ດົນມານີ້ ໄດ້ຕົກລົງເຫັນດີ ຂະຫຍາຍເວລາ ປັບຫລຸດ ການຜະລິດ ອອກໄປອີກ 1ເດືອນ ແລະ ປະເທດ ທີ່ຜະລິດ ນ້ຳມັນເກີນໂຄຕາ ໃນເດືອນພຶດສະພາ ແລະ ເດືອນມິຖຸນາ ຈະຊົດເຊີຍ ດ້ວຍການປັບ ກຳລັງ ການຜະລິດ ເພີ່ມກວ່າທີ່ຕົກລົງ ໃນເດືອນກໍລະກົດ ແລະ ເດືອນກັນຍາ.
ດັ່ງນັ້ນ ເພື່ອກວດສອບ ຕະຫລາດ ພະລັງງານ ແລະ ສັງເກດ ການປັບໃຊ້ ຂໍ້ຕົກລົງ ຢ່າງໃກ້ຊິດ ເຮັດໃຫ້ຄະນະ ກຳມະການ ກວດສອບ ການປະຕິບັດ ຕາມຂໍ້ຕົກລົງ ປັບຫລຸດ ກຳລັງ ການຜະລິດ (JMMC)ຈະຈັດກອງປະຊຸມກັນ ທຸກເດືອນຈົນເຖິງ ເດືອນທັນວາ ທ້າຍປີນີ້ ໂດຍກອງປະຊຸມ ຄັ້ງຕໍ່ໄປ ຖືກກຳນົດໄວ້ ເປັນວັນທີ 18 ມິຖຸນາ. ນອກນີ້ ຍັງກຳນົດ ກອງປະຊຸມ ລັດຖະມົນຕີ ກຸ່ມໂອເປັກ ພັດສ ຄັ້ງຕໍ່ໄປ ໃນວັນທີ 1 ທັນວາປີນີ້ ທີ່ນະຄອນຫລວງ ວຽນ ຂອງປະເທດ ໂອຕຣິດ.
ຮຽບຮຽງຂ່າວໂດຍ ສະໄຫວ
ເນື້ອໃນ: ຂປລ
