ຂໍ້ມູນດັ່ງກ່າວ, ໄດ້ຮັບການຖະແຫລງຂ່າວ ຈາກ ທ່ານ ດຣ.ລັດສະໝີ ວົງຄໍາຊາວ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໃນວັນທີ 8 ມິຖຸນານີ້ ວ່າ: ສະພາບການເຝົ້າລະວັງພະຍາດ COVID-19 ຢູ່ ສປປ ລາວ ຮອດ 5 ໂມງແລງຂອງວັນທີ 7 ມິຖຸນາ 2020 ເຊິ່ງມີຜູ້ເດີນທາງຈາກຈຸດຜ່ານແດນຕ່າງໆ ຄື: ຈຸດຜ່ານດ່ານລາວ-ໄທ ຈໍານວນ 737 ຄົນ, ຈຸດຜ່ານດ່ານ ລາວ-ຈີນ ຈໍານວນ 37 ຄົນ, ຈຸດຜ່ານດ່ານ ລາວ-ຫວຽດນາມ 639 ຄົນ ແລະ ມີ ຜູ້ເດີນທາງຜ່ານສະໜາມບິນສາກົນວັດໄຕ 6 ຄົນ. ໃນນັ້ນ, ມີຄົນຈີນ 5 ຄົນ ແລະ ຄົນການາດາ 1 ຄົນ, ໂດຍທຸກຄົນໄດ້ຮັບ ການກວດວັດ ແທກ ອຸນຫະພູມຮ່າງກາຍ, ກວດຫາອາການຜິດປົກກະຕິ, ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກ​ໆຄົນມາກວດ (ຍົກ​ເວັ້ນແຕ່​ຜູ້​ຂັບ​ລົດ​ຂົນ​ສົ່ງ​ ແລະ ​ຜູ້​ຕິດ​ຕາມ​) ແລ້ວຈຶ່ງນຳສົ່ງໄປ​ຫາ ສະຖານທີ່ຈຳກັດບໍລິເວນ ທີ່ກຳນົດໄວ້ ຈົນກວ່າຈະຄົບກຳນົດ 14 ວັນ ແລະ ຜ່ານການເກັບ ຕົວຢ່າງມາກວດວິເຄາະທັງໝົດ 300 ຄົນ, ໃນນັ້ນແຮງງານລາວ ກັບມາແຕ່ໄທ 297 ຄົນ, ກໍລະນີສົງໄສ 2 ຄົນ ແລະ ຜູ້ຕິດເຊື້ອນອນປິ່ນປົວ ຢູ່ໂຮງໝໍມິດຕະພາບ 1 ຄົນ. ໃນນີ້, ຜົນກວດແຮງງານລາວ ທີ່ກວດໃນວັນທີ 7 ມິຖຸນາ 2020 ແມ່ນບໍ່ມີຜູ້ຕິດເຊື້ອໃໝ່.

   ທ່ານ ຮອງຫົວໜ້າກົມດັ່ງກ່າວ,  ໃຫ້ຮູ້ຕື່ມວ່າ:​ ປັດຈຸບັນ, ທົ່ວປະເທດມີສູນຈໍາກັດ ບໍລິເວນທັງໝົດ 80 ສູນ, ມີຜູ້ຈຳກັດບໍລິເວນຢູ່ສູນ 3.050 ຄົນ, ໄດ້ເກັບຕົວຢ່າງ ມາກວດວິເຄາະທັງໝົດ ແລະ ບໍ່ພົບຜູ້ຕິດ ເຊື້ອ. ສ່ວນການຕິດຕາມປີ່ນປົວ ຄົນເຈັບຢູ່ໂຮງໝໍມິດຕະພາບ 1 ຄົນ ເພດຊາຍ ແມ່ນຈະໄດ້ສືບຕໍ່ຕິດຕາມ ຢູ່ໂຮງໝໍດັ່ງກ່າວຕື່ມ. 

  ມາຮອດເວລາ 6:00 ໂມງເຊົ້າຂອງວັນທີ 8 ມິຖຸນາ 2020, ທົ່ວໂລກມີການລາຍງານ ການລະບາດທັງໝົດ 213 ປະເທດ ແລະ ເຂດແຄ້ວນ ແລະ ມີຜູ້ຕິດເຊື້ອພະຍາດ COVID-19 ຈໍານວນ 7.078.580 ຄົນ, ໃນນີ້ມີຜູ້ຕິດເຊື້ອໃໝ່ ຈໍານວນ 116.137 ຄົນ, ປີ່ນປົວຫາຍດີ 3.453.052 ຄົນ ແລະ ມີຜູ້ເສຍຊີວິດຫລາຍກວ່າ 404.960 ຄົນ. ຕໍ່ສະພາບດັ່ງກ່າວ, ຂໍຮຽກຮ້ອງໃຫ້ ປະຊາຊົນບັນດາເຜົ່າ, ທຸກພາກສ່ວນໃນສັງຄົມ ຈົ່ງສືບຕໍ່ປະຕິບັດແຈ້ງການ ແລະ ຄຳແນະນຳ ຂອງຂະແໜງການຕ່າງໆ ດ້ວຍຄວາມຮັບຜິດຊອບສູງ ຈົນກວ່າຈະມີການປ່ຽນແປງໃໝ່, ໂດຍໃຫ້ບັນດາທ່ານຕິດຕາມຂ່າວ ຈາກພາກປົກກະຕິຂອງໂທລະພາບ, ວິທະຍຸກະຈາຍສຽງ, ໜັງສືພິມ ແລະ ສື່ຕ່າງໆທີ່ເປັນທາງການ.ຂ່າວ: ສຸພາສະຫວັນ ສີຊະນະມຸງຄຸນ.

ເນື້ອໃນ: ຂປລ