ໃນວັນທີ 5 ມິຖຸນາ 2020 ຫ້ອງວ່າການສຳນັກງານ ນາຍົກລັດຖະມົນຕີ (ຫສນຍ) ໄດ້ຈັດພິທີປະກາດການຈັດຕັ້ງ ແລະ ສະຫລຸບວຽກງານ ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ພາຍໃຕ້ການ ເປັນປະທານຂອງ ສະຫາຍ ເພັດ ພົມພິພັກ, ກຳມະການສູນກາງພັກ, ເລຂາຄະ ນະພັກ ຫສນຍ, ມີບັນດາ ສະຫາຍ ຄະນະພັກ ຫສນຍ, ຄະນະພັກຮາກຖານ, ຄະນະໜ່ວຍພັກ ແລະ ສະມາຊິກພັກ-ພະນັກງານ ທີ່ກ່ຽວຂ້ອງ ເຂົ້າຮ່ວມ.
ການປະກາດ ການຈັດຕັ້ງໃນຄັ້ງນີ້, ສະຫາຍ ຄົມສັນ ໄຊຍະສານ ກຳມະການຄະນະພັກ ຫສນຍ ໄດ້ຂຶ້ນຜ່ານມະຕິຕົກລົງ ຂອງຄະນະເລຂາ ທິການສູນ ກາງພັກ ວ່າດ້ວຍການບົ່ງຕົວແຕ່ງຕັ້ງ ຮອງເລຂາ ແລະ ກຳມະການຄະນະພັກ ຫສນຍ ປະກອບ ມີ: ການບົ່ງຕົວແຕ່ງຕັ້ງ ສະຫາຍ ຄຳລາວັນ ຈັນທະລາວັນ, ຮອງລັດຖະມັນຕີ, ຮອງຫົວໜ້າຫ້ອງວ່າການ ເປັນຮອງເລຂາຄະນະພັກ ຫສນຍ, ສະຫາຍ ນາງ ທິບພະກອນ ຈັນທະວົງສາ ຮອງລັດ ຖະມົນຕີ, ຮອງຫົວໜ້າຫ້ອງວ່າການ ເປັນກຳມະການຄະນະພັກ ຫສ ນຍ, ພ້ອມຜ່ານຂໍ້ຕົກລົງ ຂອງລັດຖະມົນຕີ, ຫົວໜ້າຫ້ອງວ່າການ ສຳນັກງານນາຍົກ ລັດຖະມົນຕີ ຄື: ຊັບ ຊ້ອນພະນັກງານຂັ້ນຮອງກົມ 2 ທ່ານ, ແຕ່ງຕັ້ງຮັກສາການ ຫົວໜ້າພະແນກ ເປັນຫົວໜ້າພະແນກ 2 ທ່ານ, ແຕ່ງຕັ້ງຮອງ ຫົວໜ້າພະແນກ ເປັນຫົວໜ້າພະແນກ 1 ທ່ານ, ແຕ່ງຕັ້ງຮອງຫົວໜ້າພະແນກ ເປັນຮັກສາ ການຫົວໜ້າພະແນກ 2 ທ່ານ, ແຕ່ງຕັ້ງວິຊາການ ເປັນຮອງຫົວໜ້າພະແນກ 11 ທ່ານ.
ສຳລັບການສະຫລຸບ ວຽກງານກໍ່ສ້າງໜ່ວຍພັກປອດໃສ ເຂັ້ມແຂງ, ໜັກແໜ້ນ ປະຈຳປີ 2019 ເຫັນວ່າ: ອົງຄະນະພັກຫ້ອງວ່າການ ສຳນັກງານ ນາຍົກລັດຖະມົນຕີ ປະກອບມີ 2 ຄະນະພັກຮາກຖານ ແລະ 6 ໜ່ວຍພັກຂຶ້ນກັບ. ຜ່ານການກວດກາ, ປະເມີນຜົນບັນດາ ຄະນະພັກຮາກຖານ ແລະ ບັນດາໜ່ວຍພັກ ໃນການຈັດຕັ້ງປະຕິບັດ ແຜນການກໍ່ສ້າງໜ່ວຍພັກປອດໃສ ເຂັ້ມແຂງ, ໜັກແໜ້ນ ໂດຍສະ ເພາະ ບັນດາຂໍ້ແຂ່ງຂັນ ຂອງແຕ່ລະ ພາກສ່ວນ ໂດຍອີງໃສ່ຄຳສັ່ງ ຂອງກົມການເມືອງ ສູນກາງພັກ ສະບັບເລກທີ 01/ກມສພ, ລົງວັນທີ 3 ມັງກອນ 2018, ຄໍາແນະນໍາ ຂອງຄະນະຈັດ ຕັ້ງສູນກາງ ພັກ ສະບັບເລກທີ 291/ຄຈສພ, ລົງວັນທີ 26 ເມສາ 2018 ແລະ ອີງໃສ່ສະພາບການຕົວຈິງ ໃນການນໍາພາ-ຊີ້ນຳຂອງບັນດາ ຄະນະ ພັກຮາກຖານ ແລະ ບັນດາໜ່ວຍພັກ ໃນໄລຍະ 1 ປີຜ່ານມາ. ດັ່ງນັ້ນ, ຈຶ່ງສາມາດຈັດ ແລະ ຢັ້ງຢືນປະເພດແຂງໄດ້ຈຳນວນ 2 ຄະນະພັກຮາກຖານ ແລະ 4 ໜ່ວຍພັກ.
ໃນຕອນທ້າຍ, ສະຫາຍ ປະທານກອງປະຊຸມ ໄດ້ໃຫ້ກຽດໂອ້ລົມ ໂດຍໄດ້ກ່າວຍ້ອງຍໍຊົມເຊີຍ ຕໍ່ຜົນສຳເລັດ ທີ່ບັນດາຄະນະພັກຮາກຖານ, ບັນດາ ໜ່ວຍພັກ ແລະ ບຸກຄົນ ສາມາດປະຕິບັດໄດ້, ຊຶ່ງໄດ້ຮັບການປະກາດ ການຢັ້ງຢືນໃນຄັ້ງນີ້. ພ້ອມກັນນັ້ນ, ຍັງໄດ້ໃຫ້ທິດຊີ້ນຳ ຕໍ່ບັນດາສະຫາຍ ທີ່ໄດ້ຮັບການແຕ່ງຕັ້ງ ແລະ ຊັບຊ້ອນ ກໍ່ຄື ສະມາຊິກ, ພະນັກງານ-ລັດຖະກອນ ຂອງ ຫສນຍ ຈົ່ງຍົກສູງຄວາມຮັບຜິດຊອບ ຕໍ່ໜ້າທີ່ວຽກງານ, ສຸມສະຕິ ປັນຍາ ແລະ ຄວາມຮູ້ຄວາມສາມາດຂອງຕົນ ປະຕິບັດໜ້າທີ່ ທີ່ການຈັດຕັ້ງມອບໝາຍ ໃຫ້ມີຜົນສຳເລັດເປັນຢ່າງດີ, ສືບຕໍ່ບຸກບືນ, ຖອດຖອນບົດຮຽນ ແລະ ຝຶກຝົນຫລໍ່ຫລອມຕົນເອງ ໃຫ້ມີຄວາມຮູ້ຄວາມສາມາດ, ມີຄຸນສົມບັດສິນທຳປະຕິວັດ ແລະ ມີຄວາມກ້າວໜ້າຢູ່ສະເໝີ. ສຳລັບວຽກງານ ກໍ່ສ້າງໜ່ວຍພັກ, ສະຫາຍ ປະທານກອງປະຊຸມ ໄດ້ເນັ້ນໜັກ ໃຫ້ບັນດາຄະນະພັກຮາກຖານ ແລະ ບັນດາໜ່ວຍພັກ ສືບຕໍ່ຈັດຕັ້ງຜັນຂະຫຍາຍ ແຜນດຳເນີນງານກໍ່ສ້າງ ໜ່ວຍພັກປອດໃສ, ເຂັ້ມແຂງ, ໜັກແໜ້ນຂອງຕົນ ໃຫ້ເປັນກິດຈະກຳ ຫລື ໂຄງການລະອຽດ, ຈັດວາງບຸລິມະສິດ ໃນການດຳ ເນີນງານແຕ່ລະວຽກ ແລະ ແຕ່ລະໄລຍະຢ່າງຄັກແນ່ ໂດຍຕິດພັນ ແລະ ກົມກຽວ ກັບການຈັດຕັ້ງປະຕິ ບັດວຽກງານວິຊາສະເພາະ ກໍ່ຄື ຄຳຂວັນ ທີ່ ແຕ່ລະຄະນະພັກຮາກຖານ ແລະ ໜ່ວຍພັກ ໄດ້ປະກາດຂໍ້ແຂ່ງຂັນຮ່ວມກັນ, ສຳຄັນແມ່ນໃຫ້ກາຍເປັນ ຂະບວນການທີ່ພົ້ນເດັ່ນ ເກີດຂຶ້ນຢ່າງຈະແຈ້ງ ແລະ ສາມາດປະເມີນຕີລາຄາ ຜົນສຳເລັດໄດ້ງ່າຍ.
