ຈັງແມ່ນບໍ່ດີ! ເລາະຫຼີ້ນໄພ້ຫຼິ້ນເກມຈົນເດິກດື່ນ ແລ້ວກໍ່ເຫດຫາຂຶ້ນເຮືອນຄົນ ລັກເງິນໄປໄດ້ 5ແສນກວ່າບາດ

ໃນເວລາ 7 ໂມງຂອງວັນທີ22/5/ 2021 ທາງເຈົ້າໜ້າທີ່ວິຊາສະເພາະກອງບັນຊາການ ປກສ ນະຄອນ ໄກສອນ ພົມວິຫານ ແຂວງສະຫວັນນະເຂດ ໄດ້ຮັບແຈ້ງຄວາມຈາກຜູ້ເສຍຫາຍ ນາງ ພູເງິນ ພູມສະຫວັນ ອາຍຸ 62ປີ ອາຊີບຄ້າຂາຍ ຢູ່ບ້ານຈອມແກ້ວ ນະຄອນ ໄກສອນ ພົມວິຫານ, ໃນຄໍ່ຳຄືນຂອງວັນທີ່ 21 ພຶດສະພາ2021ນີ້, ໄດ້ມີຄົນຮ້າຍເຂົ້າລັກເອົາເງິນຂອງຜູ້ກ່ຽວໃສ່ໃນກະເປົາແລ້ວເອົາປະໄວ້ໃນຫ້ອງນອນໄດ້ເສຍຫາຍທີ່ຄົນຮ້າຍລັກໄປເຊິ່ງມີເງິນບາດຈຳນວນ 570.000 ບາດ(ຫ້າແສນເຈັດສິບພັນບາດ)ກັບເງິນກີບຈຳນວນ8.445.000(ແປດລ້ານສີ່ແສນສີ່ສິບຫ້າພັນກີບ).

ດັ່ງນັ້ນທາງຄະນະພັກ-ຄະນະບັນຊາການເຈົ້າໜ້າທີ່ວິຊາສະເພາະຈື່ງໄດ້ສົມທົບປກສ ກຸ່ມບ້ານທີ3 ບ້ານຈອມແກ້ວ ລົງກວດກາສະຖານທີ່ເກີດເຫດ ພົບອາວຸດປະຢູ່ຂ້າງປະຕູໃຫຍ່, ພົບເຫັນຂີ້ກົ່ວ 1 ກ້ອນ(ສີ່ລ່ຽມຂະໜາດ 3,5×5×7cm) ວາງຢູ່ແຈເຮືອນຂ້າງກະເປົາ ແລະ ພົບເຫັນເກີບຄີບສີດຳ 1 ຄູ່ວາງຢູ່ຂ້າງກຳແພງ ເກັບກໍາຂໍ້ມູນຫຼັກຖານ ແລະຂັດຈ້ອນຂື້ນບັນຊີເປົ້າຫມາຍ ຈື່ງສາມາດຮູ້ຜູ້ກໍ່ເຫດ ທ້າວ ຈັນສະໜອນ ຫຼື ຫຳນ້ອຍ ອາຍຸ 25 ປີ ອາຊີບກຳມະກອນ(ຮັບແບກເຄື່ອງຂື້ນທ່າ) ຢູ່ບ້ານ ສຸນັນທາ ຢູ່ນະຄອນ ໄກສອນ ພົມວິຫານ ແຂວງ ສະຫວັນນະເຂດ.

ຜ່ານການສຶບສວນ-ສອບສວນຜູ້ກ່ຽວໄດ້ຮັບສາລະພາບວ່າ : ຜູ້ກ່ຽວເປັນຄົນໄດ້ເຂົ້າລັກເອົາເງິນຂອງນາງ ພູເງິນ ຢ່າງແທ້ຈິງ; ໂດຍໃນເວລາ9ໂມງຂອງວັນທີ18/5/2021 ເຊິ່ງຜູ້ກ່ຽວແມ່ນອອກຈາກເຮືອນລົງໄປທ່າແຄມຂອງຂື້ນກັບບ້ານຈອມແກ້ວ ນະຄອນ ໄກສອນ ພົມວິຫານ ເຊິ່ງບ່ອນທີ່ຜູ້ກ່ຽວໄປຫຼີ້ນເປັນປະຈຳຢູ່ເຮືອນຂອງທ້າວ ແຫຼ້(ອ້າຍຮັກ)ແລະວັນດຽວກັນຜູ້ກ່ຽວແມ່ນໄດ້ເກັບກ້ອນຂີ້ກົ່ວໄດ້ 1ກ້ອນ(ສີ່ລ່ຽມ)ຢູ່ແຄມຂອງແລະກໍ່ໄດ້ເອົາໃສ່ຖົງໂສ້ງໄດ້ຕິດຕົວຕະຫຼອດ.

ໃນເວລາ23ໂມງ30ນາທີ ຂອງວັນທີ21/5/2021 ໄດ້ຍ່າງລົງໄປທ່າແຄມຂອງ ຈຶ່ງໄດ້ພົບກັບໜູ່ທີ່ເປັນກຳມະກອນດ້ວຍກັນກຳລັງນັ່ງຫຼີ້ນໄພ້ຢູ່ ຜູ້ກ່ຽວຈຶ່ງໄດ້ເຂົ້ານັ່ງຫຼີ້ນໄພ້ນຳ ຈົນຮອດເວລາ1ໂມງກາງຄືນ ຕົກເປັນວັນທີ22/5/2021ຈຶ່ງໄດ້ພາກັນເຊົາຫຼີ້ນໄພ້ແລ້ວໄດ້ເມືອໃຜເມືອລາວ ສ່ວນຜູ້ກ່ຽວເອງຫຼັງຈາກເຊົາຫຼີ້ນໄພ້ແມ່ນຍ່າງກັບໄປນອນຢູ່ເຮືອນຂອງ ແຫຼ້ ໄດ້ນອນຫຼີ້ນເກມ ຈົນຮອດເວລາ3ໂມງເຊົ້າຈຶ່ງໄດ້ອອກຈາກຫ້ອງນອນ ຍ່າງເລາະຕາມບ້ານຈອມແກ້ວ.

ຜູ້ກ່ຽວບ່າງອອກໄປເພື່ອ ໄປເລາະຫາລັກຊັບຂອງປະຊາຊົນ ພໍຍ່າງໄປຮອດເຮືອນຂອງ ນາງ ພູເງິນ ຈຶ່ງໄດ້ສັງເກດເບີ່ງບໍລິເວນອ້ອມຂ້າງ ຈາກນັ້ນຜູ້ກຽ່ວໄດ້ກໍ່ໄດ້ປີນຂື້ນກຳແພງ ແລ້ວປົດເກີບຄີບສີດຳໄວ້ຢູ່ຂ້າງກຳແພງ ແລະ ຍ່າງໄປປະຕູເຮືອນ ໄດ້ງັດປະຕູອອກ ຈາກນັ້ນຜູ້ກ່ຽວຈຶ່ງເຂົ້າໄປໃນເຮືອນຂອງນາງ ພູເງິນ ໄດ້ຊອກຫາຊັບສິນທີ່ມີຄ່າ ເມືອບໍ່ພົບຊັບສິນຜູ້ກ່ຽວຈຶ່ງລີ້ຊ່ອນຢູ່ໃນເຮືອນ ຈົນຮອດເວລາປະມານ5ໂມງ.

ຜູ້ກ່ຽວເຫັນນາງ ພູເງິນ ແລະ ຜົວ ຍ່າງອອກມາຈາກຫ້ອງນອນ ແລະ ຜູ້ກ່ຽວຈຶ່ງໄດ້ເຂົ້າໄປໃນຫ້ອງນອນ ຊອກຫາລັກຊັບສິນ ໄດ້ພົບເຫັນກະເປົາສີດຳ(ໃສ່ກະແຈຊິບໄວ້)ປະໄວ້ຢູ່ຂ້າງຫົວຕຽງນອນ ໄດ້ຈັບເອົາກະເປົາດັ່ງກ່າວແລ້ວອອກໄປຈາກຫ້ອງນອນ ໄປລີ້ຢູ່ແຈເຮືອນບ່ອນທີ່ມີເຄື່ອງຂອງກັ້ງບັງ ແລ້ວຫາວິທີອອກຈາກເຮືອນໄປ.

ເມື່ອກັບໄປເຮືອນທ້າວແຫຼ້ ຜູ້ກ່ຽວກໍ່ຖອດເອົາເງິນໃນມັດໜຶ່ງຈຳນວນ4000ບາດເຫຼືອນັ້ນແມ່ນເອົາໃສ່ກະເປົາພາຍສີແດງເອົາເຊື່ອງໄວ້ໃນແກັດເຄື່ອງທີຢູ່ຫ້ອງນອນຂອງທ້າວ ແຫຼ້ ໂດຍທີ່ບໍ່ທັນໄດ້ນັບ ແລະຕົກມາ ຮອດເວລາ9ໂມງຂອງວັນດຽວກັນກໍ່ຖືກເຈົ້າທີ່ນຳຕົວເຂົ້າມາສຶບສວນ-ສອບສວນ.

ທັ້ງນີ້ ສໍາລັບເງີນທີ່ຜູ້ກ່ຽວໄປລັກເອົາຢູ່ເຮືອນຂອງ ນາງ ພູເງິນ ໃນຄັ້ງນີ້, ທາງເຈົ້າຫນ້າທີ່ໄດ້ເກັບກູ້ຄືນມາໄດ້ຕົວຈິ່ງຈຳນວນ 510.000 ບາດ(ຫ້າແສນສິບພັນບາດ)ກັບເງິນກີບ 8.445.000 ກີບ(ແປດລ້ານສີ່ແສນສີ່ສິບຫ້າພັນກີບ)ແລະໄດ້ສົ່ງມອບເງິນຄືນໃຫ້ແກ່ຜູ້ເສຍຫາຍ ນາງ ພູເງິນ ພູມສະຫວັນ, ສ່ວນວ່າທ້າວ ຈັນສະໜອນ ຫຼື ຫຳນ້ອຍ ຜູ້ກະທຳຜິດ ເຊິ່ງທງເຈົ້າໜ້າທີ່ ປກສ ນະຄອນ ໄກສອນ ພົມວິຫານ ແມ່ນຈະໄດ້ປະກອບສຳນວນຄະດີໃຫ້ຮອບດ້ານ,ພາວະວິໄສ ເພື່ອສະຫຼຸບສົ່ງໃຫ້ອົງການໄອຍະການ ສັ່ງຟ້ອງໃຫ້ສານຕັດສິນລົງໂທດຕາມກົດໜາຍ.

error: ເນື້ອຫາໄດ້ຮັບການປົກປ້ອງ !!