ອາເມລິກາ ຊັກຊວນປະຊາຊົນມາສັກວັກຊີນ ໂດຍແຈກເບຍເປັນຂອງແຖມ!!

ເຖິງແມ່ນວ່າປະຊາຊົນຂອງສະຫະລັດອາເມລິກາຈະໄດ້ຮັບການສັກວັກຊີນໄປຫຼາຍກວ່າ 253 ລ້ານໂດສແລ້ວກໍຕາມ ແຕ່ຂະບວນການສັກວັກຊີນຕ້ອງໄດ້ຢຸດສະງັກລົງ ເພາະຍັງມີປະຊາຊາຊົນບາງສ່ວນທີ່ບໍ່ເຫັນດີໃນການສັກວັກຊີນ ທາງການຈຶ່ງຕ້ອງຫາວິທີຕ່າງໆເພື່ອມາເປັນສິ່ງກະຕຸ້ນໃຫ້ຄົນຫັນມາສັກວັກຊີນ ບໍ່ວ່າຈະເປັນການໃຫ້ເງິນ ຫຼື ແມ້ແຕ່ການສັກວັກຊີນເພື່ອແລກກັບເບຍ.

ດຣ. ເກລ ເບີສະໄຕ ຜູ້ຊ່ຽງຊານທາງດ້ານສຸຂະພາບໃຫ້ສໍາພາດວ່າ: “ປະຊາຊົນທີ່ມີອາຍຸລະຫວ່າງ 20-30 ປີ ແມ່ນກຸ່ມຄົນທີ່ສ່ວນໃຫຍ່ຍັງບໍ່ທັນໄດ້ຮັບການສັກວັກຊີນປ້ອງກັນໂຄວິດ-19 ແລະ ຍັງເປັນກຸ່ມທີ່ມີການລາຍງານຜູ້ຕິດເຊື້ອລາຍໃໝ່ຫຼາຍທີ່ສຸດ. ດັ່ງນັ້ນ, ເຮົາຕ້ອງຫາກິດຈະກໍາທີ່ມ່ວນ ແລະ ພວກເຂົາໃຫ້ຄວາມສົນໃຈ ຂ້ອຍຈຶ່ງຄິດວ່າການແຈກເບຍນີ້ແຫຼະແມ່ນສິ່ງທີ່ໜ້າຈະເປັນໄປໄດ້ ພວກເຮົາທົດລອງໃຊ້ວິທີການນີ້ໃນອາທິດທີ່ຜ່ານມາ ຜົນປາກົດວ່າ ພວກເຮົາສາມາດສັກວັກຊີນປ້ອງກັນເພີ່ມໄປໄດ້ອີກ 150 ຄົນ”.

ນອກຈາກນີ້ຍັງມີຮ້ານໂດນັດອອກມາໃຫ້ການສະໜັບສະໜຸນໃຫ້ຄົນຫັນມາສັກວັກຊີນປ້ອງກັນໂຄວິດ-19 ພຽງແຕ່ເອົາໃບຢັ້ງຢືນການສັກວັກຊີນມາຍື່ນກັບທາງຮ້ານກໍຈະໄດ້ກິນຟຣີ ແລະ ຍັງມີອີກຫຼາຍບໍລິສັດທີ່ມີຂໍ້ສະເໜີມອບເງິນປະມານ 5,000,000 ກີບ ພ້ອມກັບມື້ພັກວຽກເພື່ອແລກກັບການທີ່ໃຫ້ພະນັກງານໄປສັກວັກຊີນປ້ອງກັນໂຄວິດ-19 ອີກດ້ວຍ.

ຫຼາຍລັດໃນອາເມລິກາໄດ້ອະນຸຍາດໃຫ້ບຸກຄົນທີ່ມີອາຍຸ 18 ປີຂື້ນໄປ ທັງປະຊາຊົນສະຫະລັດ ຫຼື ຊາວຕ່າງຊາດທີ່ຖື Visa ສາມາດມີສິດໄດ້ຮັບການສັກວັກຊີນ ເຊິ່ງການສັກວັກຊີນໃນສະຫະລັດອາເມລິການັ້ນຈະໃຊ້ວັກຊີນ 3 ຍໍ້ຫໍ້ຄື: Pfizer ,Moderna ແລະ Johnson ປະຊາຊົນສາມາດເລືອກສີດວັກຊີນໄດ້ເລີຍ.

ທີ່ມາ: laopost.com