ຈີນ ໃຊ້ງົບປະມານກວ່າ 70%ປັບປຸງຊີວິດການເປັນຢູ່ຂອງປະຊາຊົນ
ຕາມຂ່າວຈາກ ຊີອາໄອຂອງຈີນ,ເມື່ອບໍ່ດົນມານີ້, ງົບປະມານ ຫລາຍກວ່າ 70%ຂອງເຂດປົກຄອງ ຕົນເອງ ຊົນເຜົ່າ ຊິນຈຽງຂອງຈີນ ໃຊ້ໄປກັບ ການຄຸ້ມຄອງ ແລະ ປັບປຸງ ຊີວິດການເປັນຢູ່ ຂອງປະຊາຊົນ ໃຫ້ດີຂຶ້ນ ເພື່ອຊຸກຍູ້ ໂຄງການ ສ້າງປະໂຫຍດ ແກ່ປະຊາຊົນ ທີ່ສຳຄັນຕ່າງໆ ເຊັ່ນ ການມີວຽກເຮັດ ງານທຳ, ການສຶກສາ, ການປິ່ນປົວ, ການປະກັນສັງຄົມ ແລະ ການດຳລົງຊີວິດ ທີ່ຈະເລີນຮຸ່ງເຮືອງ.ນອກນີ້ ຍັງມີການຈັດຕັ້ງ ຮູບແບບ ການຫາວຽກ ເຮັດງານທຳ ເສີມສ້າງ ການຝຶກອົບຮົບ ທັກສະວິຊາຊີບ ແລະ ສ້າງຕຳແໜ່ງງານ ໃຫ້ແກ່ຄອບຄົວ ໃນຕົວເມືອງ ແລະ ໝູ່ບ້ານ ທີ່ບໍ່ມີວຽກເຮັດ ເພື່ອພະຍາຍາມ ໃຫ້ທຸກຄອບຄົວ ທີ່ມີຄວາມສາມາດ ມີວຽກເຮັດຢ່າງໜ້ອຍ 1 ຄົນ.
ຊິນຈຽງ ປະສົບ ຜົນສຳເລັດ ໃນການຈັດການ ສຶກສາ ພາກບັງຄັບ 9 ປີ ຂະນະທີ່ພາກໃຕ້ຂອງ ຊິນຈຽງ ສາມາດ ຮຽນໄດ້ເຖິງ 15 ປີໂດຍບໍ່ເສຍຄ່າ ເພື່ອຄຸ້ມຄອງ ໃຫ້ເດັກທຸກຄົນ ໃຫ້ເຂົ້າເຖິງ ການສຶກສາ ທີ່ມີຄຸນນະພາບ ຢ່າງເທົ່າທຽມກັນ. ນອກຈາກນີ້ ລະດັບ ການຄຸ້ມຄອງ ຊີວິດການເປັນຢູ່ ຂັ້ນພື້ນຖານ ຂອງປະຊາຊົນ ໃນໝູ່ບ້ານ ເພີ່ມຂຶ້ນຢ່າງຕໍ່ເນື່ອງ ໂດຍປີນີ້ ການແຈກເງິນອຸດໜູນ ປະກັນຊີວິດ ຄວາມເປັນຢູ່ຂັ້ນພື້ນຖານ 2.680 ລ້ານຢວນ ຄຸ້ມຄອງ ຄອບຄົວ ທີ່ມີລາຍໄດ້ຕ່ຳ ຈຳນວນ 1.810.000 ຄອບຄົວ ຢ່າງຈິງຈັງ.
ຮຽບຮຽງຂ່າວໂດຍ: ສະໄຫວ ຂປລ