ທ່າແຕງ ທຸ້ມເງິນ 2 ຕື້ກ່ວາລ້ານກີບກໍ່ສ້າງເສັ້ນທາງດິນແດງສຳເລັດ 100%

ໂຄງການກໍ່ສ້າງສ້ອມແປງເສັ້ນທາງດິນແດງສອງເສັ້ນແຕ່ບ້ານກົກພຸງເໜືອ ຫາ ບ້ານຕະກຽວ ແລະ ບ້ານຈຸນລາ (ຄຸ້ມບ້ານປາຍ) ເຂົ້າເຂດການຜະລິດຂອງປະຊາຊົນ ເມືອງທ່າແຕງ ແຂວງເຊກອງສຳເລັດແລ້ວ 100 ສ່ວນຮ້ອຍໂດຍແມ່ນບໍລິສັດສອນກໍ່ສ້າງ ແລະ ສ້ອມແປງຂົວ-ທາງ ແລະ ບໍລິສັດສຸກປະສົງ ກໍ່ສ້າງ ແລະ ສ້ອມແປງຂົວ-ທາງຈຳກັດເປັນຜູ້ຮັບເໝົາກໍ່ສ້າງລວມມູນຄ່າທັງໝົດ 2 ຕື້ 570 ລ້ານກ່ວາກີບ.


ທ່ານ. ບົວໄຂ ໄຊຍະວົງ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງທ່າແຕງກ່າວໃນໂອກາດລົງຕິດຕາມ ແລະ ກວດກາຜົນສຳເລັດຂອງການກໍ່ສ້າງເສັ້ນທາງດັ່ງກ່າວໃນວັນທີ 29 ພຶດສະພາ ຜ່ານມາວ່າ: ເສັ້ນທາງແຕ່ບ້ານກົກພຸງເໜືອ ຫາ ບ້ານຕະກຽວ ແລະ ເສັ້ນທາງບ້ານຈຸນລາ ( ຄຸ້ມບ້ານປາຍ ) ເຂົ້າຫາເຂດການຜະລິດຂອງປະຊາຊົນໄດ້ຮັບທຶນອະນຸມັດ100ສ່ວນຮ້ອຍຂອງລັດຖະບານບ້ວງຟື້ນຟູໄພພິ

ບັດປີ 2020ໂດຍການກໍ່ສ້າງແມ່ນຍົກລະດັບດິນແດງຢຽບແໜ້ນດ້ວຍລະບົບກົນຈັກ ທັງນີ້ເສັ້ນທາງແຕ່ບ້ານກົກພຸງເໜືອ ຫາ ບ້ານກະກຽວມີຄວາມຍາວ 3,4 ກິໂລແມັດ ແລະ ເສັ້ນທາງບ້ານຈຸນລາ ( ຄຸ້ມບ້ານປາຍ )ຍາວ 2,3 ກິໂລແມັດ ກ້ວາງ 6 ແມັດ ເຊິ່ງປະກອບມີໜ້າວຽກຈົກດິນເກົ່າອອກຈາກໜ້າທາງພ້ອມຖົມຄືນ,ກວດປັບຮູບທາງຈົກຮ່ອງລະບາຍນໍ້າຂ້າງທາງ,ຖົມດິນຍົກລະດັບຄືນໃໝ່ໝົດຊ້ວງ ແລະ ຖົມດິນຊັ້ນຮອງພື້ນດ້ວຍວັດສະດຸຈາກບໍ່ ແລະ ກໍ່ສ້າງຂົວຈົມພ້ອມດ້ວຍກໍ່ສ້າງທໍ່ລະບາຍນໍ້າເສັ້ນລະ 2 ຈຸດ.ເຊິ່ງເສັ້ນທາງດັ່ງກ່າວຈະເຮັດໃຫ້ການສັນຈອນໄປ-ມາມີຄວາມສະດວກສະບາຍຂຶ້ນກ່ວາເກົ່າທັງລະດູແລ້ງ ແລະ ລະດູຝົນ.

ຂ່າວ: ສະຫຍາມ ຈັນທະສອນ 020 55175490,030 5436832.
ພາບ: ລັດຕະນາ ຄຳສົມພູ
ເພື່ອນຮ່ວມງານ 1/6/2020

ທ່ານບໍ່ມີສິດສຳເນົາ ບົດຄວາມນີ້ໄດ້ ສົນໃຈບົດຄວາມຕິດຕໍ່ ຜູ້ດູແລລະບົບຖ້າສົນໃຈບົດຄວາມນີ້