ປີ2020 ເສຍຊີວິດເທິງຖະໜົນ 1 ພັນກວ່າຄົນ.

ອຸບັດເຫດເກີດຂຶ້ນຕາມເສັ້ນທາງໃນປີ 2020 ມີຄົນເສຍຊີວິດ 1.031 ຄົນ ຊຶ່ງເປັນຕົວເລກທີ່ໜ້າເສົ້າ ແລະສະເທືອນໃຈອາດໂຮມຫຼາຍບັ້ນຮົບເຂົ້າກັນໃນບາງສົງຄາມກໍ່ບໍ່ເທົ່າຍ້ອນມີສາເຫດຕົ້ນໆແມ່ນນັກຂັບຂີ່ບໍ່ນັບຖືກົດຈະລາຈອນ, ຖັດມາແມ່ນສຸຂະພາບຄົນ-ລົດ ແລະເສັ້ນທາງ, ນອກນີ້ຍັງມີການຈອດລົດຊະຊາຍຕາມແຄມທາງ, ມີລົດສັນຈອນຢ່າງແອອັດຕາມເສັ້ນທາງໃນຕົວເມືອງໃຫຍ່ໂດຍສະເພາະໃນເວລາຮີບດ່ວນເປັນຕົ້ນໃນຍາມເຂົ້າ-ເລີກການ, ຍາມບຸນ ຫຼື ເທສະການຕ່າງໆ, ເຂດຊຸມຊົນ ຫຼື ນັກຂັບຂີ່ຈໍານວນບໍ່ໜ້ອຍບໍ່ຜ່ານການຮຽນຂັບຂີ່, ບໍ່ປະຕິບັດລະບຽບກົດໝາຍຈະລາຈອນທາງບົກແລະການຂະຫຍາຍເສັ້ນທາງບາງຈຸດບໍ່ໄດ້ມາດຕະຖານ.

ສະເພາະຕົວເລກໃນປີ 2017 ຜ່ານມາ ມີອຸບັດເຫດເກີດຂຶ້ນໃນຂອບເຂດທົ່ວປະເທດທັງໝົດ 5.868 ເລື່ອງ, ພາຫະນະເປ່ເພ 10.739 ຄັນ, ບາດເຈັບ 9.640 ຄົນ ແລະເສຍຊີວິດ 1.053 ຄົນ ສະເລ່ຍມື້ໜຶ່ງເສຍຊີວິດ 3 ຄົນ, ສະເພາະນະຄອນຫຼວງວຽງຈັນເກີດຂຶ້ນທັງໝົດ 1.521 ເລື່ອງ, ພາຫະນະເປ່ເພ 3.129 ຄັນ, ບາດເຈັບ 2.385 ຄົນ ແລະເສຍຊີວິດ 251 ຄົນ, ແຂວງທີ່ເກີດອຸບັນເຫດຫຼາຍກ່ວາໝູ່ຄື: ນະຄອນຫຼວງວຽງຈັນ,ສະຫວັນນະເຂດ, ຈໍາປາສັກ,ຫຼວງພະບາງ ແລະອຸດົມໄຊ; ພາຫະນະທີ່ເກີດອຸບັດເຫດຫຼາຍສ່ວນໃຫຍ່ແມ່ນປະເພດລົດຈັກ ແລະວັນເວລາທີ່ມັກມີອຸບັດເຫດເກີດຂຶ້ນຫຼາຍກ່ວາໝູ່ຄື: ວັນສຸກ ຫາ ວັນອາທິດ, ແຕ່ເວລາປະມານ 17:00 ໂມງ ຫາ 21:30 ໂມງ.

ອີງຕາມຂໍ້ມູນຈາກກົມຕຳຫຼວດຈະລາຈອນ, ກົມໃຫຍ່ຕຳຫຼວດ, ກະຊວງປ້ອງກັນຄວາມສະຫງົບແຈ້ງຜ່ານເວັບໄຊລາວພັດທະນາວ່າ: ປີ 2020 ທົ່ວປະເທດມີອຸບັດ ເຫດບົນຖະໜົນແລະເສັ້ນທາງໃນທົ່ວປະເທດທັງໝົດ 6.774 ຄັ້ງ, ມີຜູ້ເສຍຊີວິດ1.031 ຄົນທຽບໃສ່ປີ 2019 ເພີ່ມຂຶ້ນ 89 ຄົນ, ບາດເຈັບ 10.027 ຄົນ ແລະພາຫະນະເປ່ເພທັງໝົດ 12.007 ຄັນ, ສໍາລັບ, ສາເຫດທີ່ເກີດອຸບັດເຫດສ່ວນໃຫຍ່ມາຈາກດື່ມສິ່ງມືນເມົາ 1.564 ຄັ້ງ, ໃຊ້ຄວາມໄວເກີນຂອບເຂດ 1.463 ຄັ້ງ, ແຊງບໍ່ຮັບປະກັນ 478 ຄັ້ງ, ລ່ວງປ້າຍຫ້າມ 249 ຄັ້ງ, ປ່ຽນທິດທາງ 644 ຄັ້ງ, ບໍ່ປ່ອຍສິດ 493 ຄັ້ງ ແລະອື່ນໆ; ສ່ວນພາຫະນະທີ່ຮ່ວມກໍ່ເຫດເກີດອຸບັດເຫດຫຼາຍກວ່າໝູ່ແມ່ນລົດຈັກຕໍາລົດຈັກ 1.575 ຄັ້ງ, ຮອງລົງມາລົດໃຫຍ່ຕໍາລົດໃຫຍ່ 1.319 ຄັ້ງ, ລົດຈັກຕໍາລົດບັນທຸກ 355 ຄັ້ງ, ລົດໃຫຍ່ຕໍາລົດບັນທຸກ 180 ຄັ້ງ ແລະອື່ນໆ.

ສະເພາະແຕ່ເດືອນມັງກອນ 2021 ທົ່ວປະເທດມີອຸບັດເຫດເກີດຂຶ້ນທັງໝົດ 713 ກໍລະນີ, ມີພາຫະນະເປ່ເພ 1.286 ຄັນ, ບາດເຈັບ 1.076 ຄົນ, ເສຍຊີວິດ 106 ຄົນ, ມູນຄ່າຄວາມເສຍຫາຍທັງ ໝົດ 11 ຕື້ກວ່າກີບ, ສາເຫດແມ່ນຂັບຂີ່ໄວເກີນກໍານົດ, ມີການແຊງຊ້າຍ-ແຊງຂວາບໍ່ຮັບປະກັນ ແລະເມົາແລ້ວຂັບຂີ່.

ການແກ້ໄຂບັນຫາອຸບັດເຫດທີ່ເກີດຂຶ້ນໃນທ້ອງຖະໜົນບໍ່ແມ່ນເລື່ອງງ່າຍເພາະຕົ້ນເຫດ ແລະເກີດຜົນສ່ວນໃຫຍ່ກໍ່ມາຈາກກະໂຕນັກຂັບຂີ່ເອງທີ່ລະເມີດກົດຈະລາຈອນແລະການເກີດອຸບັດເຫດທີ່ຕິດອັນດັບ 1 ກໍ່ມາຈາກການດື່ມສິ່ງມືນເມົາລວມທັງຢາເສບຕິດ, ຮອງລົງມາກໍ່ໃຊ້ຄວາມໄວເກີນກໍານົດ ແລະ ການປ່ຽນທິດທາງກະທັນຫັນ, ສະພາບເຕັກນິກບໍ່ຮັບປະກັນນັ້ນກໍ່ມີໂຕເລກຕໍ່າທີ່ສຸດ; ຕໍ່ບັນຫານີ້, ມັນເລັ່ງທວງໃຫ້ຜູ້ໃຊ້ລົດ-ໃຊ້ຖະໜົນຕ້ອງເຄົາລົບກົດຈະລາຈອນຢ່າງເຂັ້ມງວດ, ຫາກພົບເຫັນຜູ້ ຝ່າຝືນຕ້ອງລົງໂທດທັນທີ, ຫາກມີແຕ່ນະໂຍບາຍບັນຫາອຸບັດເຫດຍິ່ງບານປາຍ ແລະບໍ່ສາມາດແກ້ໄຂໄດ້; ຂໍໃຫ້ທຸກຝ່າຍໃນສັງຄົມຄວນເຂົ້າໃຈ ແລະ ຖືເປັນຄວາມຮັບ ຜິດຊອບຂອງຕົນເອງເພາະ ອຸບັດເຫດເກີດຂຶ້ນໄດ້ທຸກຍາມຫາກຂາດ ສະຕິ, ປະໝາດເລີ່ນເລີ້ ແລະຈະນໍາເອົາຄວາມສູນເສຍອັນໃຫຍ່ຫຼວງ ແລະບໍ່ມີຫຍັງຈະມາທຽບໄດ້ຄືຊີວິດຂອງຕົນ ຫຼືຄົນທີ່ເຮົາຮັກໄປ; ຂໍຮຽກຮ້ອງໃຫ້ອົງການກ່ຽວຂ້ອງຊ່ວຍຈັດເອົາບັນຫາອຸບັດເຫດໃນທ້ອງຖະໜົນເຂົ້າເປັນວາລະແຫ່ງຊາດ ແລະ ມີການຈັດຕັ້ງປະຕິບັດໃຫ້ມີຜົນສັກສິດໃນທົ່ວປະເທດ.

ຂ່າວ: ເສດຖະກິດ-ສັງຄົມ

ທ່ານບໍ່ມີສິດສຳເນົາ ບົດຄວາມນີ້ໄດ້ ສົນໃຈບົດຄວາມຕິດຕໍ່ ຜູ້ດູແລລະບົບຖ້າສົນໃຈບົດຄວາມນີ້