ປັດຈຸບັນຄົນເຈັບຕິດເຊື້ອພະຍາດໂຄວິດ-19 ຈຳນວນ 6 ຄົນຍັງຕິດຕາມອາການຢູ່ໂຮງໝໍ

ທ່ານ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຕາງໜ້າໃຫ້ກອງ ເລຂາຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ໄດ້ລາຍງານ ສະພາບການລະບາດ​ຂອງ​ພະ​ຍາດ COVID-19 ໃນໂລກ. ປັດຈຸບັນ ທົ່ວໂລກມີລາຍງານການລະບາດຂອງພະຍາດ COVID-19 ທັງໝົດ 219 (ປະເທດ/ເຂດ), ຜູ້ຕິດເຊື້ອສະສົມ 118.606.725 ຄົນ, ເສຍຊີວິດສະສົມ 2.630.897 ຄົນ ແລະ ປິ່ນປົວຫາຍດີ 94.221.177 ຄົນ;

ປະເທດທີ່ມີລາຍງານການຕິດເຊື້ອ ແລະ ເສຍຊີວິດຫຼາຍກວ່າໝູ່ ແມ່ນ ສະຫະລັດອາເມຣິກາ ມີຜູ້ຕິດເຊື້ອສະສົມ 29.857.753 ຄົນ ແລະ ເສຍຊີວິດສະສົມ 542.006 ຄົນ; ອັນດັບ 2 ແມ່ນ ປະເທດ ອິນເດຍ ມີຜູ້ຕິດເຊື້ອສະສົມ 11.284.311 ຄົນ; ສຳລັບບັນດາກຸ່ມປະເທດອາຊຽນ, ປະເທດອິນໂດເນເຊຍ (ອັນດັບທີ 18 ຂອງໂລກ) ມີຜູ້ຕິດເຊື້ອສະສົມສູງກວ່າໝູ່,​ ຖັດລົງມາແມ່ນປະເທດຟີລິບປິນ, ມາເລເຊຍ, ມຽນມາ ຕາມລຳດັບ;

ການເຝົ້າລະວັງ COVID-19 ຢູ່ ສປປ ລາວ ວັນທີ 10 ມີນາ ທົ່ວປະເທດມີຜູ້ເດີນທາງເຂົ້າມາ ມີທັງໝົດ 3.152 ຄົນ: ໃນນັ້ນຈຸດຜ່ານດ່ານ ລາວ – ໄທ ມີ 1.914 ຄົນ; ຈຸດຜ່ານດ່ານ ລາວ – ຈີນ ມີ 69 ຄົນ;​ ຈຸດຜ່ານດ່ານ ລາວ – ຫວຽດນາມ ມີ 945 ຄົນ; ຈຸດຜ່ານດ່ານສະໜາມບິນສາກົນວັັດໄຕ ທັງໝົດ 224 ຄົນ;

ທຸກຄົນທີ່ເຂົ້າມາທາງ ຈຸດຜ່ານແດນ ແມ່ນໄດ້ຜ່ານການວັດແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ໄດ້ເກັບຕົວຢ່າງທຸກ​ໆ ຄົນມາກວດ ຊຶ່ງທັງໝົດແມ່ນບໍ່ພົບຜູ້ຕິດເຊື້ອ COVID-19; ການຕິດຕາມຜູ້​ຖືກຈຳກັດບໍລິເວນ ຢູ່ໃນສະຖານທີ່​ໆກຳ​ນົດ​ໄວ້​ ໃນ​ຂອບ​ເຂດທົ່ວປະເທດ ປັດຈຸບັນ ທົ່ວປະເທດ ມີສູນຈໍາກັດບໍລິເວນທີ່ຍັງເປີດນຳໃຊ້ຢູ່ທັງໝົດ 32 ສູນ, ມີຜູ້ຖືກຈຳກັດ ບໍລິເວນຢູ່ສູນ​ 2.872 ຄົນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ພົບຜູ້ຕິດເຊື້ອ COVID-19.

ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ ໃນວັນທີ 10 ມີນາ 2021 ໄດ້ເກັບຕົວຢ່າງ ມາກວດວິເຄາະທັງໝົດ 423 ຄົນ; ຜົນກວດວິເຄາະທັງໝົດ ພົບຜູ້ຕິດເຊື້ອໃໝ່ 1 ຄົນ (ຜູ້ຕິດເຊື້ອນໍ້າເບີ 48). ສັງລວມການກວດວິເຄາະນັບແຕ່ເດືອນມັງກອນ 2020 ຮອດປັດຈຸບັນ ໄດ້ເກັບຕົວຢ່າງມາກວດທັງໝົດ 120.283 ຕົວຢ່າງ, ກວດພົບເຊື້ອສະສົມ 48 ຄົນ.

ການຕິດຕາມປິ່ນປົວຄົນເຈັບຢູ່ໂຮງໝໍ ມາຮອດປັດຈຸບັນ ຄົນເຈັບຕິດ ເຊື້ອພະຍາດ COVID-19 ຈຳນວນ 6 ຄົນ ແມ່ນສືບຕໍ່ນອນຕິດຕາມອາການ ແລະ ປິ່ນປົວຢູ່ໂຮງໝໍທີ່ຖືກກຳນົດໄວ້ ທັງໝົດແມ່ນສຸຂະພາບແຂງດີ. ສະພາບການລະບາດຂອງພະຍາດໂຄວິດ-19 ໃນທົ່ວໂລກ ສັງເກດເຫັນວ່າ ຫຼາຍປະເທດ ມີການລາຍງານກໍລະນີໃໝ່ຫຼຸດລົງ ແລະ ຈຳນວນຜູ້ຕິດເຊື້ອໃໝ່ໃນແຕ່ລະວັນຈະມີແນວໂນ້ມຄ່ອຍໆຫຼຸດລົງກໍຕາມ ທຸກ ພາກສ່ວນໃນສັງຄົມກໍບໍ່ຄວນປະໝາດ

ຈຳເປັນທີ່ສຸດຕ້ອງໄດ້ຮ່ວມແຮງຮ່ວມໃຈກັນ ຍົກສູງສະຕິຄວາມຮັບຜິດຊອບໃນ ການເຝົ້າລະວັງ ແລະ ປະຕິບັດມາດຕະການທີ່ຄະນະສະເພາະກິດວາງອອກຢ່າງເຄັ່ງຄັດ ກໍຄືແຈ້ງການຂອງຫ້ອງ ວ່າການສຳນັກງານນາຍົກລັດຖະມົນຕີ ແລະ ຄຳແນະນຳຂອງຂະແໜງການກ່ຽວຂ້ອງເພື່ອສະກັດກັ້ນການລະບາດຂອງ ພະຍາດໂຄວິດ-19.

ທ່ານ ຣັດຕະນະໄຊ ເພັດສຸວັນ ໄດ້ລາຍງານສະພາບຂອງພະຍາດໄຂ້ຍຸງລາຍວ່າ: ໃນວັນທີ 10 ມີນາ 2021 ສປປ ລາວ ເຮົາແມ່ນ ມີລາຍງານຜູ້ຕິດເຊື້ອໄຂ້ຍຸງລາຍຈຳນວນ 3 ກໍລະນີ ແລະ ບໍ່ມີຜູ້ເສຍຊີວິດ (ມີລາຍງານຈາກ ນະຄອນຫຼວງວຽງຈັນ ແລະ 11 ແຂວງ) ໂຕເລກໄຂ້ຍຸງລາຍນັບແຕ່ວັນທີ 26/12/2020 ມາຮອດ ວັນທີ 10/3/2021 ມີຜູ້ຕິດເຊື້ອກໍລະນີສະສົມທັງໝົດ 144 ຄົນ (ອັນດັບໜຶ່ງແມ່ນ ນະຄອນຫຼວງ, ຖັດລົງມາ ອັດຕະປື ແລະ ຫຼວງພະບາງ) ແລະ ຍັງບໍ່ມີຜູ້ເສຍຊີວິດ.

ຂ່າວ: ວັນເພັງ

ທ່ານບໍ່ມີສິດສຳເນົາ ບົດຄວາມນີ້ໄດ້ ສົນໃຈບົດຄວາມຕິດຕໍ່ ຜູ້ດູແລລະບົບຖ້າສົນໃຈບົດຄວາມນີ້