ລຸກເປັນໄຟ ການປະທ້ວງຊາວຜິວສີໃນມິນນິແອໂພລິສແຜ່ລາມ

ລາຍງານ 30 ພຶດສະພາ 2020 ໂດຍອ້າງອີງຈາກຂໍ້ໂດຍແຫຼ່ງຂ່າວລະດັບສູງໃນກະຊວງປ້ອງກັນປະເທດ ສ.ອາເມຣິກາ ທີ່ເປີດເຜີຍກັບສຳນັກຂ່າວ AP ວ່າ: ທ່ານ ໂດໂນ ທຣຳ ປະທານປະເທດ ສ.ອາເມຣິກາ ປະຊຸມສຸກເສີນຜ່ານທາງໂທລະສັບ ເມື່ອວັນພະຫັດ (28 ພຶດສະພາ) ທີ່ຜ່ານມາ ກັບທ່ານ ມາກ ເອສເປີ ລັດຖະມົນຕີກະຊວງປ້ອງກັນປະເທດ, ທ່ານ ໂຣເບິດ ໂອໄບອັນ ທີ່ປຶກສາດ້ານຄວາມໝັ້ນຄົງແຫ່ງຊາດ ແລະ ເຈົ້າໜ້າທີ່ລະດັບສູງດ້ານຄວາມໝັ້ນຄົງອີກຫຼາຍທ່ານ ກ່ຽວກັບສະພາບການປະທ້ວງທີ່ຮຸນແຮງເລື່ອງສີຜິວທີ່ເມືອງມິນນີແອໂພລິສໃນລັດມິນນິໂຊຕາ ທີ່ບານປາຍໄປຍັງອີກຫຼາຍລັດໃນປະເທດ.

ແຫຼ່ງຂ່າວກ່າວວ່າ ຜູ້ນຳ ສ.ອາເມຣິກາ ຕັ້ງຄຳຖາມຕໍ່ກອງປະຊຸມວ່າຈະເຮັດແນວໃດຫາກສະຖານະການການປະທ້ວງຮຸນແຮງ ແລະ ບານປາຍຈົນຍາກເກີນຄວບຄຸມ, ເຖິງຈະບໍ່ຊັດເຈນວ່າທ່ານ ໂດໂນ ທຣຳໄດ້ຄຳຕອບແບບໃດ ແຕ່ຫຼັງຈາກນັ້ນບໍ່ດົນທ່ານ ມາກ ເອສເປີ ໄດ້ສັ່ງໄປຍັງຖານທັບຟອດ ແບຼກທີ່ລັດນໍແຄໂຣໄລນາ ແລະ ຖານັທບ ຟອດ ດຼຳ ໃນລັດນິວຢອກໃຫ້ລະດົມກຳລັງພົນທະຫານ ແລະ ຕ້ອງເດີນທາງເຖິງຈຸດໝາຍຄືເມືອງມິນນີແອໂພລິສພາຍໃນ 4 ຊົ່ວໂມງ ຫາກໄດ້ຮັບຄຳສັ່ງ.

ໃນດ້ານແຫຼ່ງຂ່າວ 3 ຄົນ, ໂດຍ 2 ໃນ 3 ເປັນເຈົ້າໜ້າທີ່ໃນກະຊວງປ້ອງກັນປະເທດກ່າວເສີມວ່າ ເມື່ອໃດກໍ່ຕາມ ທີ່ໄດ້ຮັບຄຳສັ່ງທະຫານຈາກຖານທັບຟອດ ດຼຳ ຈະເລັ່ງເດີນທາງໄປກ່ອນເພາະຢູ່ໃກ້ກວ່ານອກຈາກນີ້ຍັງມີການສັ່ງໃຫ້ຖານທັບຟອດ ຄາສັນ ໃນລັດໂຄໂລຣາໂດ ແລະ ຖານທັບຟອດ ໄຣລີ ໃນລັດແຄນຊັສ ກຽມເຈົ້າໜ້າທີ່ພ້ອມອອກປະຕິບັດການພາຍໃນ 24 ຊົ່ວໂມງ ໂດຍການລະດົມພົນຄັ້ງນີ້ອາດໃຊ້ກຳລັງທະຫານຈາກຖານທັບທັງ 4 ແຫ່ງລວມກັນປະທານ 800 ຄົນ.

ສຳລັບການລະດົມກຳລັງພົນທະຫານຄັ້ງນີ້ ທ່ານ ໂດໂນ ທຣຳ ອາໄສອຳນາດຕາມກົດໝາຍການຈະລາຈົນ ສະບັບປີ 1807 ເຊິ່ງຜູ້ນຳ ສ.ອາເມຣິກາຄົນຫຼ້າສຸດກ່ອນໜ້າທ່ານ ໂດໂນ ທຣຳ ທີ່ໃຊ້ອຳນາດຈາກກົດໝາຍດັ່ງກ່າວຄື ທ່ານ ຈອດເອສ ດັບເບີຢູ ບຸດ ລະດົມກຳລັງທະຫານຄວບຄຸມ ແລະ ຍຸຕິສະຖານະການຄວາມຮຸນແຮງທີ່ນະຄອນລອສແອນເຈລິສ ເຊິ່ງສານພິຈາລະນາຍົກຟ້ອງຕຳຫຼວດ 3 ຈາກ 4 ຄົນ ທີ່ຮ່ວມກັນທຳຮ້າຍຮ່າງກາຍທ້າວ ຣັອດນີ ຄິງ ນັກຂຽນ ແລະ ນັກເຄື່ອນໄຫວຜິວສີ ເມື່ອປີ 1992 ໂດຍການຈະລາຈົນຄັ້ງນັ້ນກິນເວລາ 6 ວັນ ມີຜູ້ເສຍຊີວິດ 63 ຄົນ, ໄດ້ຮັບບາດເຈັບຫຼາຍ 2,000 ຄົນ ແລະ ຖືກຈັບຫຼາຍກວ່າ 12,000 ຄົນ.

ໃນດ້ານລັດເຊຍຈໍເຈຍ, ທ່ານ ໄບຣອັນ ເຄມ ເຈົ້າຄອງລັດໄດ້ອອກຄຳສັ່ງລະດັບລັດເມື່ອຕອນເຊົ້າມືດຂອງວັນເສົານີ້ ຕາມເວລາທ້ອງຖິ່ນປະກາດສະຖານະການສຸກເສີນດ້ານຄວາມໝັ້ນຄົງ ແລະ ໄດ້ລະດົມກຳລັງຈາກກອງກຳລັງປົກປ້ອງມາຕຸພູມ 500 ຄົນເພື່ອສະໜັບສະໜູນກຳລັງຕຳຫຼວດໃນການຄວບຄຸມສະຖານະການການປະທ້ວງ.

ເຊິ່ງຊະນວນເຫດຂອງການປະທ້ວງມາຈາກການເສຍຊີວິດຂອງທ້າວ ຈອສ ຟລອຍຊາຍຜິວສີ ອາຍຸ 46 ປີ ໃນເມືອງມິນນີແອໂພລິສ ລັດມິນນິໂຊຕາຈາກການທີ່ຕຳຫຼວດຜິວຂາວຄົນໜຶ່ງກົດເຂົ່າໃສ່ຄໍຂອງທ້າວ ຟລອຍລະຫວ່າງກັບກຸມຈາກການທີ່ທ້າວ ຟລອຍ ພະຍາຍາມໃຊ້ເງິນຟອມເພື່ອຊື້ເຄື່ອງເມື່ອວັນທີ 25 ພຶດສະພາ ທີ່ຜ່ານມາ.

ເຊິ່ງກຸ່ມຜູ້ປະທ້ວງຕ່າງກໍ່ພາກັນໂຮຮ້ອງດ້ວຍຄວາມຄຳວ່າ “I can’t breathe”ເພື່ອຮຽກຮ້ອງຄວາມເປັນທຳໃຫ້ກັບທ້າວ ຟລອຍ ເຊິ່ງເປັນປະໂຫຍກສຸດທ້າຍທີ່ທ້າວ ຟລອຍ ເວົ້າອອກມາກ່ອນເສຍຊີວິດ ຈາກການຖືກເຈົ້າໜ້າທີ່ຕຳຫຼວດໃຊ້ເຂົ່າກົດຄໍຂະນະຈັບກຸມ

ຂ່າວ:​ idsala.com

ທ່ານບໍ່ມີສິດສຳເນົາ ບົດຄວາມນີ້ໄດ້ ສົນໃຈບົດຄວາມຕິດຕໍ່ ຜູ້ດູແລລະບົບຖ້າສົນໃຈບົດຄວາມນີ້