ອຸດົມໄຊ ສັ່ງໂຈະ ແລະຍົກເລີກ 9 ກິດຈະການຂຸດຄົ້ນ-ປຸງແຕ່ງແຮ່ທາດ

ປີ 2020 ແຂວງອຸດົມໄຊໄດ້ສັ່ງໂຈະ 7 ກິດຈະການ ແລະຍົກເລີກ 2 ກິດຈະການທີ່ບໍ່ປະຕິບັດຕາມສັນຍາສຳປະທານດ້ານການຂຸດຄົ້ນ-ປຸງແຕ່ງແຮ່ທາດ,ປະຈຸບັນທົ່ວແຂວງອຸດົມໄຊຍັງມີ 33 ບໍລິສັດ 36 ກິດຈະການທີ່ຍັງສືບຕໍ່ດຳເນີນກິດຈະການຂຸດຄົ້ນ ແລະປຸງແຕ່ງແຮ່ທາດ.

ທ່ານ ອາລຸນ ບຸນວິໄລ ຫົວໜ້າພະແນກພະລັງງານ ແລະ ບໍ່ແຮ່ແຂວງອຸດົມໄຊເປີດເຜີຍຕໍ່ສື່ມວນຊົນໃນໂອກາດເຂົ້າຮ່ວມກອງປະຊຸມສະຫຼຸບຖອດຖອນບົດຮຽນການເຄື່ອນໄຫວວຽກງານປະຈຳປີຂອງຂະແໜງທໍລະນີສາດ ແລະ ແຮ່ທາດຈັດຂຶ້ນເມື່ອບໍ່ດົນມານີ້ທີ່ເມືອງວັງວຽງໃຫ້ຮູ້ວ່າ: ປະຈຸບັນແຂວງອຸດົມໄຊໄດ້ສຳເລັດການສໍາຫຼວດສ້າງແຜນທີ່ທໍລະນີສາດ-ແຮ່ທາດພື້ນຖານມາດຕາສ່ວນ 1/200.000 ໄດ້ສໍາເລັດ 100% ຂອງເນື້ອທີ່ທົ່ວແຂວງຊຶ່ງສາມາດຄົ້ນພົບຈຸດປະກົດແຮ່ທາດທັງໝົດ 59 ຈຸດ, ມີ 11 ຊະນິດແຮ່ທາດ.

ປະຈຸບັນມີບໍລິສັດດຳເນີນການຂຸດຄົ້ນ ແລະປຸງແຕ່ງແຮ່ທາດຢູ່ແຂວງອຸດົມໄຊທັງໝົດ 33 ບໍລິສັດ, ໃນນັ້ນຂັ້ນແຂວງອະນຸຍາດ 26 ບໍລິສັດ ແລະຂັ້ນສູນກາງອະນຸຍາດຈໍານວນ 7 ບໍລິສັດມີເນື້ອທີ່ສຳປະທານທັງໝົດ 9.844 ກວ່າເຮັກຕາ, ສຳລັບຂັ້ນແຂວງອະນຸມັດສ່ວນຫຼາຍຂຸດຄົ້ນ, ປຸງແຕ່ງແຮ່-ຫີນອຸດສາຫະກໍາກໍ່ສ້າງ (ຫີນປູນ, ຫີນຜາ) ບໍລິການສັງຄົມເພື່ອຮັບໃຊ້ໃຫ້ແກ່ການກໍ່ສ້າງພື້ນຖານໂຄງລ່າງ, ຕຶກ, ອາຄານ ແລະສະຖານທີ່ຕ່າງໆ,ໃນຂະນະທີ 7 ບໍລິສັດທີ່ສູນກາງອະນຸຍາດ,ມີ 11 ຈຸດສຳປະທານເພື່ອຂຸດຄົ້ນ,ໃນນັ້ນປະກອບມີແຮ່ທອງແດງ 1 ຈຸດ,ແຮ່ເກືອ 1 ຈຸດ,ແຮ່ຊືນ-ສັງກະສີ 2 ຈຸດ,ແຮ່ຖ່ານຫີນ 1 ຈຸດ, ແຮ່ເຫຼັກ 3 ຈຸດ, ແຮ່ດິນໜຽວ 1 ຈຸດ, ແຮ່ຫີນປູນ1 ຈຸດ ແລະແຮ່ຄໍາ 1 ຈຸດ, ໃນເນື້ອທີ່ສຳປະທານທັງໝົດ 9.763 ເຮັກຕາ.

ສຳລັບການສົ່ງອອກສ່ວນຫຼາຍຍັງເປັນແຮ່ເຫຼັກຊຶ່ງປີ 2020 ສົ່ງອອກໄປ ສປ ຈີນ ຈຳນວນ 140.000 ໂຕນ ມູນຄ່າ 9,6 ລ້ານກວ່າໂດລາ ແລະແຮ່ຄຳຈຳນວນ 157.889,32 ກຣາມ ມູນຄ່າ 9.6 ລ້ານກວ່າໂດລາ.

ທ່ານ ອາລຸນ ບຸນວິໄລ ກ່າວອີກວ່າ: ພະແນກພະລັງງານ ແລະ ບໍ່ແຮ່ແຂວງໄດ້ສົມທົບກັບກະຊວງພະລັງງານ ແລະ ບໍ່ແຮ່ລົງຕິດຕາມກວດກາບັນດາບໍລິສັດທີ່ກຳລັງຂຸດຄົ້ນ ແລະປຸງແຕ່ງໃຫ້ເຂົ້າສູ່ລະບຽບໂດຍສະເພາະແມ່ນການປະເມີນປະລິມານການຂຸດຄົ້ນ-ການປຸງ ແຕ່ງເພື່ອສົ່ງອອກເພື່ອຫຼີກເວັ້ນການສົ່ງວັດຖຸດິບອອກໄປຕ່າງປະ ເທດຊຶ່ງບັນດາບໍລິສັດຂຸດຄົ້ນຕ້ອງປຸງແຕ່ງເປັນຜະລິດຕະພັນສຳເລັດຮູບ ຫຼື ເຄິ່ງສຳເລັດຮູບກ່ອນສົ່ງອອກຊຶ່ງຜ່ານການປະເມີນເຫັນວ່າຍັງມີບາງບໍລິສັດຍັງຖືເບົາໃນການປະຕິບັດຕາມສັນຍາ ແລະລະບຽບກົດໝາຍໂດຍໄດ້ສັ່ງໂຈະຊົ່ວຄາວ 7 ກິດຈະການ ແລະຍົກເລີກ 2 ກິດຈະການທີ່ບໍ່ປະຕິບັດຕາມສັນຍາ.

ຂ່າວ: ເສດຖະກິດ-ສັງຄົມ

ທ່ານບໍ່ມີສິດສຳເນົາ ບົດຄວາມນີ້ໄດ້ ສົນໃຈບົດຄວາມຕິດຕໍ່ ຜູ້ດູແລລະບົບຖ້າສົນໃຈບົດຄວາມນີ້