ໃນຕອນເຊົ້າຂອງມື້ນີ້ ( ວັນທີ 29 ພຶດສະພາ 2020 ) ພັທ ສຸລິວັນ ລາດຊະວົງ ຫົວໜ້າຫ້ອງຕຳຫຼວດ ປກສ ນວ ໄດ້ໃຫ້ສຳພາດຕໍ່ທີມງານນັກຂ່າວ ປກສ ນວ ວ່າ: ໃນວັນທີ 27 ພຶດສະພາ ຜ່ານມານີ້ ໄດ້ຮັບການແຈ້ງຄວາມຈາກພົນລະເມືອງດີວ່າ: ມີຄົນຂາຍເລກເຖື່ອນ ( ເລກໄທ ແລະ ເລກຫວຽດນາມ ) ແບບຈົດ ຢູ່ເຂດບ້ານດົງໂດກ ເມືອງໄຊທານີ ນະຄອນຫຼວງວຽງຈັນ ມາຮອດເວລາ 13:30 ໂມງ ເຈົ້າໜ້າທີ່ສະເພາະກິດ ຈິ່ງໄດ້ລົງກວດກາສະຖານທີ່ດັ່ງກ່າວ ພົບເຫັນເປົ້າໝາຍກຳລັງຂາຍເລກເຖື່ອນ ຢູ່ເຂດບ້ານດົງໂດກ ຈິ່ງໄດ້ເຊີນຕົວຄົນຂາຍ ມາຫ້ອງຕຳຫຼວດ ປກສ ນວ ພ້ອມຂອງກາງ ໃບສະຫຼາກກິນແບ່ງຂອງລັດຖະບານໄທ, ກາຈ້ຳ ແລະ ອຸປະກອນໃນການຂາຍ ເພື່ອສືບສວນ-ສອບສວນ.
ໃນການລົງແກ້ໄຂຂາຍເລກເຖື່ອນຄັ້ງນີ້ ທ່ານ ຫົວໜ້າຫ້ອງຕຳຫຼວດ ປກສ ນວ ໃຫ້ຮູ້ອີກວ່າ: ເປົ້າໝາຍທີ່ຂາຍເລກເຖື່ອນທີ່ເຊີນມາຊື່ ນ. ຂັນຄຳ ອາຍຸ 40 ປີ, ອາຊີບຄ້າຂາຍ, ຢູ່ບ້ານດົງໂດກ ເມືອງໄຊທານີ ໄດ້ຍອມຮັບສາລະພາບວ່າ: ຜູ້ກ່ຽວໄດ້ຂາຍເລກຫວຽດນາມແບບຈົດຂາຍ ແລະ ສະຫຼາກກິນແບ່ງລັດຖະບານໄທ ໂດຍໄດ້ສັ່ງຊື້ຢູ່ແຂວງອຸດອນ ( ປະເທດໄທ ) ຈຳນວນ 190 ໃບ; ຂາຍໄປແລ້ວ 47 ໃບ, ຍັງເຫຼືອ 134 ໃບ; ສໍາລັບເລກຫວຽດນາມ ແມ່ນໄດ້ຂຽນເວລາເລກອອກ ໃສ່ບິນໃຫ້ລູກຄ້າພ້ອມ ແລະ ໄດ້ຂຽນຄຳວ່າແດງ ໝາຍເຖິງລາງວັນທາງເທິງ ແລະ ຂຽນຄຳດຳ ໝາຍເຖິງລາງວັນທາງລຸ່ມ ແລະ ໄດ້ຈ້ຳກາ ວັນທີ, ເດືອນ, ປີ ໃສ່ບິນ ແລ້ວຈື່ງໃຫ້ລູກຄ້າ ໂດຍບໍ່ໄດ້ຮັບອະນຸຍາດຈາກລັດຖະບານ.
ຕໍ່ກັບ ນ. ຂັນຄຳ ເຫັນວ່າຜູ້ກ່ຽວມີເຈຕະນາຂາຍເລກເຖື່ອນ ( ສະຫຼາກກິນແບ່ງລັດຖະບານໄທ ແລະເລກຫວຽດນາມ ) ແທ້; ເຊິ່ງຜູ້ກ່ຽວໄດ້ເຄື່ອນໄຫວຂາຍເລກເຖື່ອນມາໄດ້ 2 ປີກວ່າແລ້ວ ແລະ ເຈົ້າໜ້າທີ່ໄດ້ນຳຕົວຜູ້ກ່ຽວມາສຶກສາອົບຮົມແລ້ວ ຈຳນວນ 2 ຄັ້ງຄື: ໃນວັນທີ 15 ຕຸລາ 2019, ໃນວັນທີ 25 ກຸມພາ 2020; ເຊິ່ງການກະທໍາຂອງ ນ. ຂັນຄໍາ ແມ່ນຜິດຕໍ່ກົດໝາຍ ມາດຕາ 141 ຂອງປະມວນກົດໝາຍອາຍາ. ສະນັ້ນ, ເຈົ້າໜ້າທີ່ຈະໄດ້ດໍາເນີນຄະດີຕາມກົດໝາຍ.
ຕໍ່ກັບບັນຫານີ້ ພັທ ສຸລິວັນ ລາດຊະວົງ ຂໍຝາກເຖິງພໍ່-ແມ່ປະຊາຊົນ ຈົ່ງໄດ້ພ້ອມກັນເປັນຫູເປັນຕາຊ່ວຍເຈົ້າໜ້າທີ່ ຖ້າຫາກຍັງເຫັນວ່າມີການຂາຍເລກເຖື່ອນ ແລະ ຫຼີ້ນເກມອອນລາຍ ຂໍໃຫ້ລາຍງານຕໍ່ເຈົ້າໜ້າທີ່; ສ່ວນບຸກຄົນໃດທີ່ຍັງສືບຕໍ່ຂາຍເລກເຖື່ອນ ໂດຍບໍ່ຢ້ານຕໍ່ລະບຽບກົດໝາຍ ເຈົ້າໜ້າທີ່ຈະເອົາໃຈໃສ່ແກ້ໄຂ, ຖ້າພົບເຫັນແມ່ນຈະໄດ້ດຳເນີນຄະດີຕາມລະບຽບກົດໝາຍຢ່າງເຂັມງວດ ເພື່ອເຮັດໃຫ້ປະກົດການຫຍໍ້ທໍ້ໃຫ້ຫຼຸດໜ້ອຍຖອຍລົງເທື່ອລະກ້າວ.
ຂ່າວ: ປ້ອງກັນຄວາມສະຫງົບນະຄອນຫຼວງວຽງຈັນ
