ໃນວັນທີ 5 ມັງກອນ 2021 ສໍານັກພິມໃບໂພ ແລະ ສະມາຄົມນັກປະພັນລາວ ໄດ້ຈັດຕັ້ງພິທີນຳສະເໜີປຶ້ມ “ລາຊີນີ ຄືນສຸດທ້າຍ”, ເຊິ່ງເປັນປຶ້ມເລື່ອງລາວຊີວິດການເຄື່ອນໄຫວປະຕິວັດ ຂອງທ່ານ ສົມສະຫວາດ ເລັ່ງສະຫວັດ ອະດີດກຳມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ ທີ່ຂຽນໂດຍ ທ່ານ ທອງໃບ ໂພທິສານ ນັກປະພັນ, ນັກກະວີ, ສິລະປິນດີເດັ່ນສາຂາວັນນະກຳ, ທັງເປັນນັກກະວີລາງວັນ ວັນນະກຳສ້າງສັນຍອດຢ້ຽມ ແຫ່ງອາຊີຕາເວັນອອກສ່ຽງໃຕ້.
ປຶ້ມ “ລາຊີນີ ຄືນສຸດທ້າຍ” ເປັນປຶ້ມ ທີ່ບັນທຶກຫວນຄືນ ເລື່ອງລາວຄວາມຫລັງໃນອະດີດຂອງ ທ່ານ ສົມສະຫວາດ ເລັ່ງສະຫວັດ ສະໄໝໂຕນເຂົ້າປ່າ ໄປເຂົ້າຮ່ວມຂະບວນການຕໍ່ສູ້ປົດປ່ອຍຊາດຂອງແນວລາວຮັກຊາດ, ເຊິ່ງທ່ານ ທອງໃບ ໂພທິສານ ເປັນຜູ້ຮີມໂຮມ ແລະ ສ້າງສັນ ໃຫ້ເປັນຜົນ ງານດ້ານວັນນະກຳ ສຳລັບຜູ້ອ່ານ ໂດຍເນື້ອໃນສ່ອງແສງໃຫ້ເຫັນ ປະຫວັດສາດຂອງການປະຕິວັດ ຢູ່ໃນຂະບວນການຕໍ່ສູ້ລວມ ຂອງປະຊາຊົນລາວບັນດາເຜົ່າ ພາຍໃຕ້ການນຳພາທີ່ປີຊາສາມາດສະຫລາດສ່ອງໃສຂອງພັກປະຊາຊົນປະຕິວັດລາວ ຈົນໄດ້ຮັບໄຊສະນະ ສາມາດປົດປ່ອຍປະເທດຊາດຢ່າງສົມ ບູນ,
ໂດຍ ທ່ານ ສົມສະຫວາດ ເລັ່ງສະຫວັດ ໄດ້ຜ່ານຜ່າຊີວິດ, ຜ່ານວຽກງານ ແລະ ການເຄື່ອນ ໄຫວຕະຫລອດໄລຍະ 50 ກວ່າປີ, ນັບແຕ່ສະໄໝການປະຕິວັດຊາດປະຊາທິປະໄຕ ມາຈົນເຖິງໄລຍະແຫ່ງການປົກປັກຮັກສາ ແລະ ສ້າງສາປະເທດຊາດ, ການຈັດຕັ້ງຜັນຂະຫຍາຍແນວທາງປ່ຽນແປງ ໃໝ່ຮອບດ້ານ ແລະ ມີຫລັກການຂອງພັກ.
ປຶ້ມ “ລາຊີນີ ຄືນສຸດທ້າຍ” ຈະຊ່ວຍໃຫ້ຄົນລຸ້ນໃໝ່, ໄວໜຸ່ມ, ນັກຮຽນ, ນັກສຶກສາໄດ້ຮຽນຮູ້, ໄດ້ສຶກສາ-ຄົ້ນຄວ້າ ປະຫວັດສາດຂອງຊາດ, ແບບຢ່າງຄຸນສົມບັດທີ່ດີ ແລະ ແບບແຜນວິທີເຮັດວຽກຂອງຜູ້ນຳການປະຕິວັດລຸ້ນກ່ອນ ຜູ້ຕໍ່ສູ້ເອົາຊະນະ ກັບສັດຕູຜູ້ຮຸກຮານ, ຍອມເສຍສະຫລະທຸກສິ່ງທຸກຢ່າງ ເພື່ອອຸທິດໃຫ້ແກ່ພາລະກິດປະຕິວັດ ປົດປ່ອຍຊາດ ແລະ ນຳພາປະຊາຊົນ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຢ່າງສຸດກົກສຸດປາຍ, ໂດຍສະເພາະ ໄດ້ຮຽນຮູ້ ແບບ ແຜນການດຳລົງຊີວິດ, ການເຮັດວຽກ ຂອງທ່ານ ສົມສະຫວາດ ເລັ່ງສະຫວັດ ນັບແຕ່ນ້ອຍ ຈົນເຖິງການເຂົ້າຮ່ວມຂະບວນການຕໍ່ສູ້ປົກປ່ອຍຊາດ ໃນເມື່ອກ່ອນ ທີ່ໄດ້ຂຽນລົງໃນປື້ມຫົວນີ້. ທ່ານໃດມີຄວາມສົນໃຈ ຢາກອ່ານ, ຢາກສຶກສາຮຽນຮູ້ ກ່ຽວກັບການປະຕິວັດ ໃນເມື່ອກອນ ທີ່ຂຽນລົງໃນປຶ້ມຫົວດັ່ງກ່າວ, ສາມາດພົວພັນ ກັບທ່ານ ສົມສະຫວາດ ເລັ່ງສະຫວັດ ໄດ້ໂດຍກົງ.
ຂ່າວ ພາບ: ຂັນໄຊ ຂປລ
