ພັກປະຊາຊົນ ປະຕິວັດລາວ ດຳເນີນກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຢ່າງສະຫງ່າຜ່າເຜີຍ

ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງ ພັກປະຊາຊົນ ປະຕິວັດລາວ ໄຂຂຶ້ນຢ່າງສະຫງ່າຜ່າເຜີຍ ໃນຕອນເຊົ້າວັນທີ 13 ມັງກອນ 2021 ທີ່ນະຄອນຫລວງວຽງຈັນ ໂດຍມີ ສະຫາຍ ບຸນຍັງ ວໍລະຈິດ ເລຂາ ທິການໃຫຍ່ຄະນະບໍລິຫານງານສູນກາງພັກ, ມີກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ກຳມະການສູນກາງພັກ, ນັກປະຕິວັດອາວຸໂສ, ວິລະຊົນແຫ່ງຊາດ ພ້ອມດ້ວຍບັນດາສະມາຊິກພັກສົມບູນ ຈຳນວນ 768 ກວ່າສະຫາຍ, ຍິງ 116 ສະຫາຍ

ທີ່ໄດ້ຖືກຄັດເລືອກໃຫ້ຕາງໜ້າອົງຄະນະພັກຂະແໜງການ, ອົງການ ແລະ ທ້ອງຖິ່ນ ໃນຂອບເຂດທົ່ວປະເທດ ແລະ ແຂກຖືກເຊີນ ຈຳນວນ 147 ສະຫາຍ ທີ່ຕາງໜ້າໃຫ້ແກ່ພາກສ່ວນຕ່າງໆ ທັງພາກລັດ ແລະ ເອກະຊົນ ກໍຄື ປະຊາຊົນລາວບັນດາເຜົ່າ ເຂົ້າຮ່ວມ.  

ກອງປະຊຸມຈະໄດ້ດຳເນີນເປັນເວລາ 3 ວັນ ໂດຍຜູ້ເຂົ້າຮ່ວມຈະໄດ້ຮັບຟັງການສະເໜີຮ່າງບົດລາຍງານການເມືອງ, ຮ່າງແຜນພັດທະນາເສດຖະ ກິດ-ສັງຄົມ 5 ປີ ຄັ້ງທີ  IX, ລາຍງານການປັບປຸງກົດລະບຽບພັກສະໄໝທີ XI.

ຈາກນັ້ນ, ຕາງໜ້າອົງຄະນະພັກ ບັນດາກະຊວງ, ແຂວງ, ອົງການ ແລະ ພາກສ່ວນອື່ນໆທີ່ກ່ຽວຂ້ອງ ຈະໄດ້ພ້ອມກັນປະກອບຄຳເຫັນໃນຫົວຂໍ້ຕ່າງໆທີ່ພົ້ນເດັ່ນໃນຂະແໜງການທີ່ຕົນເອງຮັບຜິດຊອບ, ກ່ອນຈະລົງມະຕິຮັບຮອງເອົາ 3 ເອກະສານສຳຄັນດັ່ງກ່າວ.

ພ້ອມນີ້, ກອງປະຊຸມຈະໄດ້ສະເໜີຮ່າງບົດສຳຫລວດການນຳພາລວມຂອງ ຄະນະບໍລິຫານງານສູນກາງພັກ ສະໄໝທີ X, ສະເໜີມາດຖານ, ເງື່ອນໄຂ ແລະ ລາຍຊື່ຜູ້ສະໝັກຮັບເລືອກຕັ້ງ ແລະ ດຳເນີນການປ່ອນບັດເລືອກຕັ້ງເອົາຄະນະບໍລິຫານສູນກາງພັກປະຊາຊົນ ປະຕິວັດລາວ ສະໄໝທີ XI.