ປັດຈຸບັນລັດຖະບານ ກໍຄື ຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂ ການລະບາດຂອງພະຍາດ ໂຄວິດ-19 ໄດ້ຜ່ອນຜັນບາງມາດຕະການ ແຕ່ເຖິງຢ່າງໃດກໍຕາມຫາກປະຊາ ຊົນລາວບັນເຜົ່າ ໃນຂອບເຂດທົ່ວປະເທດ ຍັງບໍ່ເຂັ້ມງວດ ປະຕິບັດບາງມາດຕະການ ປ້ອງກັນການຕິດເຊື້ອພະຍາດ ໂຄວິດ-19 ຕາມຄຳແນະນຳທີ່ທາງ ຄະນະສະເພາະກິດວາງອອກ ຢ່າງຈິງຈັງ ສປປ ລາວ ອາດມີຄວາມສ່ຽງ ທີ່ຈະເກີດການລະບາດ ຂອງພະຍາດໂຄວິດ-19 ຮອບ 2.
ທ່ານ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ລາຍງານ ໃນພິທີຖະແຫລງຂ່າວ ໃນວັນທີ 26 ພຶດສະພາ 2020 ນີ້ວ່າ: ປັດຈຸບັນ ສປປ ລາວ ຍັງບໍ່ພົບຜູ້ຕິດເຊື້ອພະຍາດ ໂຄວີດ-19 ເພີ່ມ ຕິດຕໍ່ກັນ ເປັນເວລາ 44 ມື້, ເຊິ່ງວັນທີ 25 ພຶດສະພາ ໄດ້ເກັບຕົວຢ່າງມາກວດທັງໝົດ 60 ຄົນ ເຫັນວ່າບໍ່ພົບເຊື້ອ. ໃນຂະນະທີ່ບາງປະເທດໃນກຸ່ມອາຊຽນ ມາຮອດເວລາ 6 ໂມງເຊົ້າ ຂອງວັນທີ 26 ພຶດສະພາ ມີການຢັ້ງຢືນຜູ້ຕິດເຊື້ອ ໂຄວິດ-19 ທັງໝົດ80.298 ຄົນ, ເພີ່ມໃໝ່ 1.284 ຄົນ, ເສຍຊີວິດ 2.466 ຄົນ, ຍັງມີບາງປະເທດ ທີ່ມີອັດຕາການຕິດເຊື້ອໃໝ່ສູງເຖິງ 479 ຄົນຕໍ່ມື້.
ທ່ານ ຣັດຕະນະໄຊ ເພັດສຸວັນ ຍັງຮຽກຮ້ອງໃຫ້ ປະຊາຊົນໃນຂອບເຂດທົ່ວປະເທດ ປະຕິບັດຕາມແຈ້ງການເລກທີ 580/ຫສນຍ ກ່ຽວກັບການຜ່ອນຜັນ ມາດຕະການຕ່າງໆ ເຊິ່ງເປັນໂອກາດໃຫ້ພາກທຸລະກິດ ກໍ່ຄື ພໍ່ແມ່ປະຊາຊົນ ບັນດາເຜົ່າ ພະນັກງານ, ທະຫານ, ຕໍາຫລວດ ໃຫ້ກັບຄືນມາດໍາເນີນຊີວິດແບບປົກກະຕິ, ກິດຈະການກັບຄືນສູ່ ສະພາບເດີມ ເທື່ອລະກ້າວ ໃນນັ້ນພວກເຮົາຈະຕ້ອງ ໄດ້ປະຕິບັດຄວາມຊີນເຄີຍແບບໃໝ່ ເປັນຕົ້ນ ການປະຕິບັດ ໄລຍະຫ່າງທາງສັງຄົມ, ບໍ່ໃຫ້ມີການແອອັດ, ການໃສ່ຜ້າປິດປາກ-ດັງ ເວລາອອກຈາກບ້ານ ຫລື ໄປສະຖານທີ່ ທີ່ມີຄວາມສ່ຽງຕໍ່ການຕິດເຊື້ອ ທັງໝົດນີ້ໃຫ້ກາຍເປັນຄວາມຊິນເຄີຍ ໃນການດຳລົງຊີວິດປະຈຳວັນ ເພື່ອແນໃສ່ບໍ່ໃຫ້ພະຍາດນີ້ ກັບຄືນມາລະບາດອີກເປັນຮອບທີ່ສອງ.
ຂ່າວ: ກິດຕາ ຂປລ
ພາບ: ເກດສະໜາ
