ໃນວັນທີ 11 ທັນວາ 2020 ນີ້, ຫ້ອງວ່າການສູນກາງພັກ ຮ່ວມກັບ ສູນກາງແນວລາວສ້າງຊາດ ແລະ ຄອບຄົວ ພົມວິຫານ ໄດ້ຈັດຕັ້ງພິທີ ຍ້າຍເຖົ່າຝຸ່ນອັດຖິ ຂອງ ປະທານ ໄກສອນພົມວິຫານ ຈາກອະນຸສອນສະຖານ ໄປ ສຸສານນັກຮົບປະຕິວັດແຫ່ງຊາດ ຫລັກ 24 ນະ ຄອນຫລວງວຽງຈັນ ເນື່ອງໃນໂອກາດສະຫລອງວັນຄ້າຍວັນເກີດ ຄົບຮອບ 100 ປີ, ໃຫ້ກຽດ ເຂົ້າຮ່ວມ ຂອງທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ, ທີ່ປຶກສາຄະນະບໍລິຫານງານສູນກາງພັກ, ທ່ານ ສັນຕິພາບ ພົມວິຫານ ເຈົ້າແຂວງໆສະຫວັນນະເຂດ, ພ້ອມດ້ວຍຜູ້ຕາງໜ້າຈາກພາກສ່ວນຕ່າງໆ ທີ່ກ່ຽວຂ້ອງ ເຂົ້າຮ່ວມ.
ໃນພິທີ ໄດ້ເລີ່ມຕົ້ນສູດພິທີກໍາທາງສາສະໜາ ເພື່ອຍ້າຍເຖົ່າຝຸ່ນອັດຖິ ຂອງປະທານ ໄກສອນ ພົມວິຫານ, ຫລັງ ຈາກນັ້ນ, ທ່ານ ສັນຕິພາບ ພົມວິຫານ ໄດ້ຕາງໜ້າ ໃຫ້ການນໍາພັກ, ລັດ ແລະ ຄອບຄົວ ພົມວິຫານ ຂຶ້ນໃຕ້ທຽນໄຊ ເພື່ອທໍາພິທີທາງສາສະໜາ ໂດຍ ການສູດ ສັກອານິຈາ ເຊິ່ງຕາງໜ້າພະສົງ ນໍາພາສູດ ໂດຍ ພະຫລັກແກ້ວ ມະຫາສຸເມທາ ທິບໍດີ ມະຫາ ບຸນມາ ສິມມາພົມ ຮັກສາການ , ປະທານສູນກາງອົງການ ພຸດທະສາສະໜາສໍາພັນລາວ ພາຍຫລັງສຳເລັດພິທີ ສູດສັກອານິຈາ ແລ້ວ ກໍໄດ້ ອັນເຊີນຍ້າຍ ເຖົ່າຝຸ່ນອັດຖິ ຂອງປະທານ ໄກສອນ ພົມວິຫານ ລົງສູ່ ສະຖານທີ່ທີ່ກຽມໄວ້.
ປະທານ ໄກສອນ ພົມວິຫານ ໄດ້ປະກອບສ່ວນໃຫ້ແກ່ພາລະກິດປະຕິວັດຂອງຊາດ ເຊິ່ງເພີ່ນແມ່ນນັກຮັກຊາດຜູ້ຍິ່ງໃຫຍ່, ແມ່ນນັກປະຕິວັດຜູ້ດີເລີດ, ເພິ່ນເປັນຜູ້ນໍາສູງສຸດຂອງການປະຕິວັດລາວ ທີ່ມີຄວາມປີຊາສາມາດ ແລະ ມີຄວາມສະຫລາດຫລັກແຫລມ, ມີພິກໄຫວອັນແຫລມຄົມ, ອົງອາດກ້າແກ່ນ ທັງ ມີນໍາໃຈຕໍ່ສູ້ທີ່ເດັດດ່ຽວໜຽວແໜ້ນ ແລະ ເປັນຜູ້ນໍາທີ່ແສນເຄົາລົບຮັກຂອງພັກ, ລັດ ແລະ ປະ ຊາຊົນເຮົາ, ເປັນວິລະບູລຸດ ຂອງຊາດລາວເຮົາ, ຊີວິດ ແລະ ພາລະກິດປະຕິວັດຂອງ ປະທານ ໄກສອນ ພົມວິຫານ ໄດ້ຕິດພັນຢ່າງສະໜິດແໜ້ນກັບຂະບວນວິວັດແຫ່ງການເຕີບໃຫຍ່ຂະຫຍາຍຕົວ, ເພີ່ນໄດ້ອຸທິດຕະລອດຊີວິດຂອງຕົນ ໃຫ້ແກ່ການປະຕິວັດຂອງປະເທດເຮົາ ຈົນສາມາດຍາດໄດ້ໄຊຊະນະ ແລະ ປົດປ່ອຍປະເທດຊາດ ໄດ້ຢ່າງສົມບູນ ແລະ ສະຖາປະນາເປັນ ສາທາລະນະລັດ ປະຊາທິປະໄຕ ປະຊາຊົນລາວ ຈົນມາຮອດປັດຈຸບັນ.
ພາບ: ເກດສະໜາ
