ຍຸກນີ້ບໍ່ວ່າແຕ່ໃຜລູກເກີດມາພ້ອມເຕັກໂນໂລຊີ ທຳອິດລູກອາດຫຼິ້ນບໍເປັນແຕ່ພໍ່ແມ່ເປັນແມ່ພີມໃຫ້ເບິ່ງທຸກວັນ ກໍ່ເຮັດໃຫ້ເດັກໆພາກັນຕິດໂທລະສັບແຕ່ຍັງຍ່າງບໍ່ໄດ້ເວົ້າບໍ່ທັນເປັນ ພໍບໍໄດ້ຈັບກໍ່ດິ້ນແດ່ວໆ ເອົາໃຫ້ພັດເຊົາພໍ່ແມ່ຫຼາຍຄົນຈິ່ງຕາມໃຈລູກໃຫ້ຫຼິ້ນສາຈິ່ງບໍໄດ້ງໍແງ ແຕ່ທ່ານຢ່າລືມວ່າການທີ່ເຮັດແບບນັ້ນເປັນການທຳລາຍລູກນ້ອຍແຕ່ເນີ້ນໆໂດຍທີ່ທ່ານບໍ່ໄດ້ຕັ້ງໃຈ.
ມັນເປັນຍຸກຂອງເຂົາທີ່ເກີດມາຕ້ອງຮູ້ ແລະສາມາດນຳໃຊ້ໃຫ້ເປັນປະໂຫຍດ ແຕ່ຢ່າລືມວ່າ ພໍ່ແມ່ຕ້ອງຝຶກໃຫ້ເວລາລູກສ່ຳໃດສ່ຳໜຶ່ງພໍ ຖ້າບໍ່ດັ່ງນັ້ນຈະເປັນຄືກໍລະນີນີ້ ເຮັດໃຫ້ລູກສູນເສຍຕາແລ້ວຈິ່ງຄິດໄດ້!!!
ແມ່ຂອງນ້ອງວິນນີ່ ຜູ້ໃຊ້ເຟສບຸກຄົນໜຶ່ງໃນເມືອງໄທໄດ້ໂພສເລື່ອງລາວເຕືອນໄພພໍ່ແມ່ຫຼາຍຄົນທີ່ຍັງບໍ່ເຖິງຂັ້ນເສຍສາຍຕາ ໂດຍລະບຸວ່າ: ຝາກເປັນອຸທາຫອນສຳລັບແມ່ໆທັງຫຼາຍທີ່ມີລູກນ້ອຍ ກ້າມເນື້ອຕາເຂົາຍັງບໍ່ແຂງແຮງພໍ ຈິ່ງບໍ່ຄວນປ່ອຍໃຫ້ລູກໆເບິ່ງສະມາດໂຟນເປັນເວລາດົນໆ ຫຼື ເບິ່ງດຸຫຼາຍ ເພາະແສງຈາກໂທລະສັບພາບເຄື່ອນໄຫວຕ່າງໆຈະໄປທຳລາຍກ້າມເນື້ອຫົວຕາ ເຮັດໃຫ້ເດັກຕາເຫຼ່ໂດຍບໍ່ຮູ້ຕົວ ຮ້າຍແຮງໄປກວ່ານັ້ນພາບສາມມິຕິໃນຕາເດັກຈະສູນເສຍຮອດຂັ້ນຕາບອດໄດ້ ເພາະລູກເພິ່ນເອງໄດ້ປະສົບບັນຫານີ້ມາແລ້ວຈິ່ງຝາກເຕືອນທຸກຄົນ.
ສຳລັບຄົນທີ່ເປັນພໍ່ແມ່ຄົນລູກກໍ່ບໍ່ຕ່າງຫຍັງກັບແກ້ວຕາດວງໃຈຂອງຕົນເອງ ສະນັ້ນການຈຳກັດບໍໃຫ້ລູກຫຼິ້ນໂທລະສັບຫຼາຍເກີນໄປກໍ່ເປັນການຊ່ວຍເຂົາຮັກສາໜ່ວຍຕາໃຫ້ໄດ້ນຳໃຊ້ໄປຍາວນານ ອີກຢ່າງກໍ່ຊ່ວຍຫົວໃຈຕົວທ່ານເອງບໍ່ໃຫ້ໃຈສະຫຼາຍເມື່ອຕ້ອງເຫັນລູກໂຕນ້ອຍໆຕ້ອງຖືກສັກຢາສະຫຼົບ ຖືກມີດຜ່າຕັດແຕ່ຍັງນ້ອຍໆ ແລະຖ້າບໍ່ມີເງິນປົວອະນາຄົດລູກຈະເປັນແນວໃດ ນີ້ເບິ່ງຄືເລື່ອງເລັກນ້ອຍແຕ່ຄວາມຈີງຄືບັນຫາໃຫຍ່.
ແລະນີ້ຄືຄຳແນະນຳສຳລັບການໃຫ້ລູກຫຼິ້ນສະມາດໂຟນກັບແທັບເລດ
1 ໃຫ້ລູກຫຼີ້ນບໍ່ເກີນ 2 ຊົ່ວໂມງຕໍ່ມື້ ແລະຕ້ອງພັກສາຍຕາບໍ່ໃຫ້ເບິ່ງຕໍເນື່ອງດົນໆ
2 ຢ່າຈ້ອງໜ້າຈໍໃກ້ເກີນໄປ ໃຫ້ເວັ້ນໄລຍະຫ່າງປະມານ 1 ສອກຂອງຜູ້ໃຫຍ່ເປັນຢ່າງຕ່ຳ
3 ປັບຄວາມສະຫວ່າງຂອງໜ້າຈໍໃຫ້ພໍເໝາະ ແລະຫ້າມປິດໄຟຫຼິ້ນ
4 ໃຫ້ລູກກິນຜັກ, ໝາກໄມ້ທີ່ມີວິຕາມິນເອ ແລະ ລູທີນສູງເພາະມີປະໂຫຍດຕໍ່ສາຍຕາເຊັ່ນ: ໝາກຄີວີ, ແຄຣອດ, ຜັກຫຸມ, ຜັກບົ້ງ, ໝາກອຶ ແລະໝາກນັດ.
