ຊ່ວງຫຼັງໆມານີ້ຂ່າວທາງດ່ວນຈະມາແຮງຫຼາຍ ເພາະເປັນສິ່ງໃໝ່ສຳລັບບ້ານເຮົາ ເຊິ່ງເປັນປະຫວັດສາດໃໝ່ທີ່ປະເທດລາວຈະໄດ້ຂຶ້ນລົດຜ່ານທາງດ່ວນ ສຳລັບບາງຄົນທີ່ໄດ້ໄປຕ່າງປະເທດແນ່ກໍ່ເປັນເລື່ອງທຳມະດາ ແຕ່ກັບອີກຫຼາຍຄົນທີ່ບໍ່ເຄີຍໄປໃສການຂຶ້ນທາງດ່ວນຖືວ່າເປັນເລື່ອງໃໝ່ທີ່ໜ້າຕຶ່ນເຕັ້ນຫຼາຍ.
ແລະແນ່ນອນທາງແບບນີ້ຂຶ້ນໄປແລ້ວຕ້ອງຈ່າຍເງິນ ເພາະແມ່ນບໍລິສັດເປັນຄົນສ້າງຂຶ້ນເພື່ອເປັນທາງເລືອກໃຫ້ກັບຜູ້ໃຊ້ລົດໃຊ້ຖະໜົນ ບໍ່ວ່າບ້ານເຮົາ ຫຼື ປະເທດອື່ນກໍ່ຕ້ອງຈ່າຍເງິນໝົດນັ້ນແລ ສະນັ້ນຢ່າດຣາມ່າວ່າ ຄົນເຫີ່ກັນຫຼາຍແຕ່ຕ້ອງຈ່າຍເງິນແລ້ວປະຊາຊົນຜູ້ບໍມີເງິນເດ? ສຳລັບຜູ້ບໍ່ພ້ອມເສຍເງິນກໍ່ໄປທາງເກົ່າທີ່ເຮົາໃຊ້ຜ່ານມາ ເຂົ້າໃຈຕາມນີ້ນໍ.
ແລ້ວທາງດ່ວນທີ່ກຳລັງຈະເປີດໃໝ່ນີ້ເມື່ອຂຶ້ນໄປແລ້ວຕ້ອງຈ່າຍເງິນເທົ່າໃດ ນີ້ເປັນຄຳຖາມທີ່ສົ່ງມາຫາເພຈຂ່າວສືກສາ-ໄອທີຫຼາຍທີ່ສຸດ ມື້ນີ້ແອັດໄດ້ຄຳຕອບມາແລ້ວ ຍັງບໍ່ທັນຊັດເຈນໃນໃບບິນແຕ່ຕ້ອງຈ່າຍທັງໝົດທັງມວນ65.000 ກີບ ໃນໃນຍະທາງທັງໝົດ 109,9 ກິໂລແມັດ ໂດຍໃນທຸກໆ 14,5 ກີໂລແມັດ ຈະມີດ່ານເກັບເງິນ ສະເລ່ຍແລ້ວຕົກຢູ່ດ່ານລະ 8.000 ກວ່າກີບ ຖ້າໄປບໍສຸດທາງກໍ່ຫຼຸດລົງຕາມຈຳນວນດ່ານ.
ສຳລັບ ເສັ້ນທາງດ່ວນ ນະຄອນຫຼວງວຽງຈັນ-ວັງວຽງ ມີຈຸດເລີ່ມຕົ້ນຢູ່ແຕ່ສາມແຍກສີເກີດ ແລະ ຈຸດສຸດທ້າຍຢູ່ເມືອງວັງວຽງ ແຂວງວຽງຈັນ ມີຄວາມຍາວທັງໝົດ 109,10 ກິໂລແມັດ, ເສັ້ນທາງໄດ້ຕັດຜ່ານ 04 ເມືອງຄື: ເມືອງນາຊາຍທອງ, ເມືອງໂພນໂຮງ, ເມືອງຫີນເຫີບ ແລະ ເມືອງວັງວຽງ.
ການອອກແບບປະກອບມີ: ຄວາມກວ້າງທັງໝົດ 23 ແມັດ , ອອກແບບຕາມມາດຕະຖານເຕັກນິກທາງດ່ວນຂອງ ສປ ຈີນ (JTG Bo1-2014) ແລະ ມາດຕະຖານເຕັກນິກຂອງທາງອາຊຽນ ເປັນພື້ນຖານ, ມີອຸໂມງ 01 ແຫ່ງ ເບື້ອງຊ້າຍຍາວ 875 ແມັດ ແລະ ເບື້ອງຂວາຍາວ 845 ແມັດ ແລະ ຂົວ 45 ແຫ່ງ ຍາວທັງໝົດ 2.408 ແມັດ, ຄວາມໄວອອກແບບ 100 ກມ/ຊມ (80 ກມ/ຊມ) ແລະ ຕອນທາງປະກອບມີ: ຈຸດເຊື່ອມຕໍ່ທັງໝົດຈໍານວນ 07 ແຫ່ງ, ຈຸດເກັບເງີນມີ 08 ແຫ່ງ (ນະຄອນຫຼວງວຽງຈັນ,ບ້ານນາຊອນ, ບ້ານບົວ, ບ້ານສະກ້າ, ບ້ານໂພນໂຮງ, ບ້ານຫີນເຫີບ, ບ້ານທ່າເຮືອ ແລະ ເມືອງວັງວຽງ).
ນອກນັ້ນຍັງມີຈຸດບໍລິການມີ 03 ຈຸດ (ນະຄອນຫຼວງວຽງຈັນ, ເມືອງໂພນໂຮງ ແລະ ເມືອງວັງວຽງ) ແລະ ຈຸດພັກລົດ ມີ 02 ຈຸດ (ບ້ານນາຂ່າ ເມືອງໂພນໂຮງ ແລະ ບ້ານທ່າເຮືອອ່າງນ້ຳງື່ມ, ເມືອງຫີນເຫີບ).
