ໂຄວິດ-19 ຍັງລະບາດ ແຕ່ເງີນຂາດໃນກະເປົ໋າ ຈັບຄົນລາວ 58 ຄົນ ລັກລອບເຂົ້າໄທແບບຜິດກົດໝາຍ

ເມື່ອເວລາ 05:00 ນາທີ ວັນທີ 7 ທັນວາ 2020 ເຈົ້າໜ້າທີ່ຂອງໄທ ໄດ້ນຳກຳລັງເຂົ້າກວດຄົ້ນທີ່ໂຮງແຮມໂຂງຈຽມ ມາຣີນາ ຣີສອດ ຕຳບົນໂຂງຈຽມ ອຳເພີໂຂງຈຽມ ຈັງຫວັດອຸບົນຣາດຊະທານີ ປະເທດໄທ ພົບເຫັນລົດຍີ່ຫໍ້ໂຕໂຍຕ້າ ສີຂາວ ໝາຍເລກທະບຽນ (ฮฮ-4045 กรุงเทพมหานคร ) ລົດກະບະຍີ່ຫໍ້ Nissan Navara ສີເທົາ ເລກທະບຽນ (ยฉ-8852 นครราชสีมา ) ແລະ ລົດຍີ່ຫໍ້ໂຕໂຍຕ້າ ສີດຳ ທະບຽນ (ฒย-8915 กรุงเทพมหานคร)

ໄດ້ພົບຄົນລາວ ຊາຍ 27 ຄົນ ຍິງ 31 ຄົນ ລວມເປັນ 58 ຄົນ ຂະນະທີ່ກຳລັງກຽມຕົວເພື່ອຈະເດີນທາງເຂົ້າໄປຈຸດໝາຍປາຍທາງຄື ກຣຸງເທບ ແລະ ຕາມຈັງຫວັດໃກ້ຄຽງ ແລະ ຍັງຄວບຄຸມ ຄົນໄທໄດ້ 1 ຄົນ ຮູ້ຊື່ ທ້າວພອນເທບ ຈັນເສນ ອາຍຸ 44 ປີ ເປັນຄົນຂັບລົດຕູ້

ຈາກການສອບສວນເບື້ອງຕົ້ນຮູ້ວ່າຄົນລາວທັງໝົດໄດ້ພາກັນເດີນທາງລັກລອບເຂົ້າເມືອງ ເພື່ອຈະເດີນທາງໄປເຮັດວຽດຢູ່ທີ່ກຣຸງເທບ ແລະ ຈັງຫວັດໃກ້ຄຽງ ໂດຍມີລົດຕູ້ ແລະ ລົດກະບະ ຈະມາຮັບໄປສົ່ງ ທີ່ສະຖານີຂົນສົ່ງຈັງຫວັດອຸບົນ ໂດຍແຕ່ລະຄົນຈະເສຍຄ່າໃຊ້ຈ່າຍ 3,000 ບາດ ແຕ່ມາຖືກເຈົ້າໜ້າທີ່ຈັບໄວ້ໄດ້ກ່ອນ

ແລະເຈົ້າໜ້າທີ່ໄດ້ຄວບຄຸມຜູ້ຕ້ອງຫາທັງໝົດ ມາດຳເນີນການຖ່າຍຮູບເຮັດປະຫວັດ ແລະ ກວດຫາໂລກລະບາດ ພ້ອມກັບແຈ້ງຂໍ້ຫາ ຫຼົບໜີເຂົ້າເມືອງໂດຍຜິດກົດໝາຍ ກ່ອນຈະສົ່ງພະນັກງານສອບສວນ ສະຖານີຕຳຫຼວດພູທອນໂຂງຈຽມ ເພື່ອດຳເນີນການຕາມກົດຫມາຍຕໍ່ໄປ.

ທ່ານບໍ່ມີສິດສຳເນົາ ບົດຄວາມນີ້ໄດ້ ສົນໃຈບົດຄວາມຕິດຕໍ່ ຜູ້ດູແລລະບົບຖ້າສົນໃຈບົດຄວາມນີ້