ແຂວງອັດຕະປື​ ເລັ່ງການກໍ່ສ້າງ,​ຟື້ນຟູ ແລະ​ສ້ອມແປງ​ ຊົນລະປະທານເຊປຽນ ແລະ​ຊົນລະປະທານຫ້ວຍສະໝອງ ຢູ່ເມືອງສະໜາມໄຊ

ປະຈຸບັນທາງຂະແໜງຊົນລະປະທານ ຂອງພະແນກກະສິກໍາ ແລະ ປ່າໄມ້ ແຂວງອັດຕະປື ແລະ ບໍລິສັດຜູ້ຮັບເໝົາການກໍ່ສ້າງ ຟື້ນຟູ ແລະ ສ້ອມແປງຊົນລະປະທານ ເຊປຽນ ແລະ​ຊົນລະປະທານຫ້ວຍສະໝອງຢູ່ເມືອງສະໜາມ ແຂວງອັດຕະປື ພວມກໍາລັງເລັ່ງມືການກໍ່ສ້າງໃຫ້ສໍາເລັດທັນຕາມແຜນການທີ່ວາງໄວ້.​

ທ່ານ ເກັດສະໜາ ແກ້ວວິໄລວົງ ຫົວໜ້າຂະແໜງຊົນລະປະທານ ພະແນກກະສິກໍາ ແລະ ປ່າໄມ້ ແຂວງອັດຕະປື ໃຫ້ສໍາພາດເມື່ອບໍ່ດົນນີ້ວ່າ: ໂຄງການກໍ່ສ້າງ,ຟື້ນຟູ ແລະ ສ້ອມແປງຊົນລະປະທານເຊປຽນ​ ແລະ​ຊົນລະປະທານຫ້ວຍສະໝອງ ຢູ່ເມືອງສະໜາມໄຊ ປະຈຸບັນມີຄວາມຄືບໜ້າເປັນສ່ວນໃຫຍ່ ເຊິ່ງບັນດາໜ້າວຽກຕ່າງໆໃນການກໍ່ສ້າງ ແມ່ນໄດ້ຮັບການຕິດຕາມ ແລະ ຊຸກຍູ້ຢ່າງໃກ້ຊິດຈາກຄະນະຮັບຜິດຊອບຂັ້ນແຂວງ,ຂັ້ນເມືອງ ເພື່ອໃຫ້ການກໍ່ສ້າງໄດ້ສໍາເລັດຕາມແຜນການ ແລະ ຮັບປະກັນຄວາມຖືກຕ້ອງຕາມສັນຍາ .

ໂດຍທັງ 2 ໂຄງການດັ່ງກ່າວໄດ້ຮັບທຶນຈາກຜູ້ພັດທະນາເຂື່ອນໄຟຟ້າ ເຊປຽນ-ເຊນໍ້ານ້ອຍ,ໃນນີ້ ຊົນລະປະທານເຊປຽນຕັ້ງຢູ່ບ້ານແທມີມູນຄ່າ 30.100.378.045 ກີບ,ໂດຍແມ່ນບໍລິສັດ ເຮືອງຈະເລີນກໍ່ສ້າງຄົບວົງຈອນເປັນຜູ້ຮັບເໝົາ ,ເລີ່ມລົງມືຈັດຕັ້ງປະຕິບັດຕັ້ງ ແຕ່ວັນທີ 15 ພຶດສະພາ 2020 ປະຈຸບັນສໍາເລັດການກໍ່ສ້າງໄປແລ້ວ 50% ຄາດວ່າຈະສຳເລັດ ໃນ ວັນທີ 30 ມິຖຸນາ 2021,ຮູບແບບຄອງເໝືອງເປັນຄອງເບຕົງເສີມເຫຼັກ ຄວາມຍາວ 33.543 ແມັດ,ລະບົບຫົວງານຊົນລະປະທານຝາຍນໍ້າລົ້ນ.

ພາຍຫຼັງສຳເລັດການກໍ່ສ້າງຈະສາມາດຫົດເນື້ອທີ່ໄດ້ 1.500 ເຮັກຕາ,ໂຄງການຊົນລະປະທານຫ້ວຍສະໝອງ ຕັ້ງຢູ່ບ້ານຫີນລາດ,ມູນຄ່າໂຄງການ 27.180.472.889 ກີບ,ມີຊົນລະປະທານສະໝອງ1 ແລະ​ 2,ໂດຍແມ່ນບໍລິສັດ ມະຫາໄຊກໍ່ສ້າງ​ ແລະ​ ບໍລິສັດ ທະວີຊັບກໍ່ສ້າງເປັນຜູ້ຈັດຕັ້ງປະຕິບັດປະຕິບັດທັງສອງໂຄງການສໍາເລັດແລ້ວ 44% ,ເລີ່ມລົງມືຈັດຕັ້ງປະຕິບັດຕັ້ງ ແຕ່ວັນທີ 15 ພຶດສະພາ 2020 ຄາດວ່າຈະສຳເລັດ ໃນວັນທີ 30 ມິຖຸນາ 2021,ຄອງເໝືອງເຮັດດ້ວຍເບຕົງເສີມເຫຼັກ ຄວາມຍາວ​ 20.216 ແມັດ,ເປັນລະບົບຫົວງານຊົນລະປະທານປະຕູນໍ້າ,ພາຍຫຫຼັງສຳເລັດການກໍ່ສ້າງຈະສາມາດຫົດເນື້ອທີ່ໄດ້ 440 ເຮັກຕາ.

ເຊິ່ງທັງສອງໂຄງການດັ່ງກ່າວຈະໃຫ້ທັນການສະໜອງນໍ້າຜະລິດລະດູແລ້ງນີ້ .

ຂ່າວ: ວັດທະນາ

ທ່ານບໍ່ມີສິດສຳເນົາ ບົດຄວາມນີ້ໄດ້ ສົນໃຈບົດຄວາມຕິດຕໍ່ ຜູ້ດູແລລະບົບຖ້າສົນໃຈບົດຄວາມນີ້