ຕາມຂ່າວຊີອາໄອ ຂອງຈີນ, ເມື່ອບໍ່ດົນມານີ້, ສຳນັກງານ ຄະນະລັດ ຖະມົນຕີ ຈີນ ໄດ້ພີມ ແລະ ແຈກຢາຍ ແຜນການປະຕິບັດ ຊ່ວຍເຫລືອ ຜູ້ສູງອາຍຸ ເພື່ອແກ້ໄຂອຸປະສັກ ໃນການນຳໃຊ້ ເຕັກໂນໂລຊີທ່ີທັນສະໄໝ .ແຜນການດັ່ງກ່າວ ແມ່ນເນັ້ນໃສ່ 7 ບັນຫາ ໃນການດຳລົງຊິວິດປະຈຳວັນຂອງ ຜູ້ສູງອາຍຸ ເຊັ່ນ:
ການອອກ ເດີນທາງ, ການພົບແພດ, ການຊື້ສິນຄ້າ, ການຊົມສະແດງ ງານສີລະປະ ວັດທະນະທຳ ແລະ ຄວາມບັນເທິງ ໂດຍຈະໃຊ້ ລະບົບບໍລິການ ແບບດັ້ງງເດີມ ຄວບຄູ່ກັບ ລະບົບ ອັດສະລິຍະ ສຳລັບ ຜູ້ສູງອາຍຸ. ທ່ານ ຫວັງ ຖັນຫລິງ ຜູ້ອຳນວຍການ ສຳນັກງານສົ່ງເສີມ ປະຊາກອນ ແຫ່ງຄະນະກຳມະການ ພັດທະນາ ແລະ ການປະຕິຮູບ ແຫ່ງຊາດ ຈີນ ລະບຸວ່າ ເນື່ອງຈາກ ເຕັກໂນໂລຊີ ສື່ສານ ໄດ້ພັດທະນາ ຢ່າງກ້າວໜ້າ ໃນຈີນ ເຮັດໃຫ້ ມີການໃຊ້ບໍລິການ ລະບົບ ອັດສະລິຍະ ຢ່າງສະດວກ ສະບາຍ ແລະ ມີປະສິດທິພາບ.
ເພາະວ່າ ຜູ້ສູງອາຍຸ ຈຳນວນຫລວງຫລາຍ ຍັງມີຄວາມຫຍຸ້ງຍາກໃນການນຳໃຊ້ເຕັກໂນໂລຊີ ອັດສະລິຍະ ເນື່ອງຈາກ ການໃຊ້ໂທລະສັບ ສະມາດໂຟນ ບໍ່ວ່ອງໄວ ເຮັດໃຫ້ ການນຳໃຊ້ ລະບົບ ຊຳລະເງິນ ຜ່ານໂທລະສັບ ບໍ່ເປັນ.
ຕໍ່ບັນຫາດັ່ງກ່າວ, ຄະນະກຳ ມະການສູນກາງພັກ ແລະ ຄະນະລັດຖະມົນຕີ ໄດ້ໃຫ້ຄວາມ ສຳຄັນ ເປັນຢ່າງຍິ່ງ ຈຶ່ງປະກາດ ແຜນການດັ່ງກ່າວ ເພື່ອຊ່ວຍໃຫ້ ຜູ້ສູງອາຍຸ ສາມາດປັບຕົວເຂົ້າກັບ ໂທລະສັບ ເຕັກໂນໂລຊີ ແລະ ອື່ນໆໃຫ້ດີຂື້ນ.
