ແຂວງຈໍາປາສັກຈະມອບເງິນລາງວັນ ແລະ ເງິນປະກອບສ່ວນຈາກສັງຄົມທັງໝົດ 450 ລ້ານກີບ ໃຫ້ເປັນຂອງຂັວນນັກກິລາ ແລະຄູຝຶກ

ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ,ຫົວໜ້າອົງການໄອຍະການປະຊາຊົນແຂວງ, #ປະທານສະຫະພັນກິລາບານເຕະແຂວງຈໍາປາສັກໃຫ້ສໍາພາດວ່າ:ສະຫະພັນກິລາບານເຕະແຂວງຈໍາປາສັກຈະມອບເງິນລາງວັນຈໍານວນ 100 ລ້ານກີບ ຊຶ່ງແມ່ນເງິນລາງວັນຊະນະເລີດກິລາບານເຕະສະເຫຼີມສະຫຼອງວັນຊາດ ທີ 2 ທັນວາ ຄົບຮອບ 45 ປີ ແລະ ເງິນໄດ້ຈາກການປະກອບສ່ວນຂອງສັງຄົມຈໍານວນ 350 ລ້ານກີບ ລວມເປັນ 450 ລ້ານກີບ ໃຫ້ເປັນຂອງນັກກິລາ ແລະ ຄູຝຶກບານເຕະຊາຍທັງໝົດ ໂດຍທີ່ສະຫະພັນ ບໍ່ໄດ້ແບ່ງປັນເອົານໍາຈັກກີບ.ທັງນີ້ກໍເພື່ອເປັນການປະຕິບັດນະໂຍບາຍ,ຍ້ອງຍໍຊົມເຊີຍ ແລະ ຊຸກຍູ້ກໍາລັງໃຈໃຫ້ແກ່ນັກກິລາບານເຕະຊາຍ ທີ່ສາມາດຍາດໄດ້ #ຊະນະເລີດຄອງຂັນບານເຕະທົ່ວປະເທດນໍາກຽດ ຊື່ສຽງມາສູ່ຊາວແຂວງຈໍາປາສັກ.ແຕ່ສໍາລັບການແບ່ງປັນມອບເງິນຕົວຈິງພ້ອມນະໂຍບາຍດ້ານຕ່າງໆຈະມີຂຶ້ນຢ່າງສົມກຽດໃນພິທີສະຫຼຸບຜົນການເຂົ້າຮ່ວມແຂ່ງຂັນຢ່າງເປັນທາງການ ຊຶ່ງຈະຈັດຂຶ້ນໃນມໍ່ໆນີ້.

.

ເງິນທັງໝົດທີ່ຈະມອບໃຫ້ນັກກິລາ,ຄູຝຶກ ແລະຄະນະມີຈໍານວນທັງໝົດ 27 ຄົນ.ຖ້າສະເລ່ຍຈະໄດ້ຮັບຄົນລະປະມານ 16 ລ້ານ 6 ແສນກີບ.
ສໍາລັບຢູ່ໃນໄລຍະການແຂ່ງຂັນຜ່ານມາທາງສະຫະພັນກິລາບານເຕະກໍໄດ້ມອບເງິນການປະກອບສ່ວນຈາກສັງຄົມໃກ້ແກ່ນັກກິລາໄປແລ້ວຈໍານວນ 2 ຊຸດລວມເປັນເງິນ 66 ລ້ານກີບ.

.

.

ທ່ານ ແກ້ວລັດຕະນະ ສີຫາວົງ ປະທານສະຫະພັນກິລາບານເຕະແຂວງຈໍາປາສັກ ກ່າວອີກວ່າ:ປະຈຸບັນທາງສະຫະພັນກິລາບານເຕະ ໄດ້ຢຸດເຊົາການລະດົມທຶນໃຫ້ແກ່ການແຂ່ງຂັນກິລາບານເຕະແລ້ວ, ແຕ່ຖ້າພາກສ່ວນໃນທີ່ຍັງຢາກປະກອບສ່ວນຊົມເຊີຍຜົນສໍາເລັດຂອງນັກກິລາທີ່ສາມາດຄອງຂັນຊະນະເລີດ ແມ່ນສາມາດມອບໄດ້ທີ່ຫ້ອງວ່າການແຂວງຈໍາປາສັກ.ເພື່ອຈະໄດ້ນໍາໄປມອບຕໍ່ໃຫ້ແກ່ນັກກິລາ ອັນເປັນການປະກອບສ່ວນພັດທະນາກິລາບານເຕະຂອງແຂວງຈໍາປາສັກໃຫ້ດີຂື້ນໄປເລື້ອຍໆ.
ສ່ວນອາການບາດເຈັບຂອງ ທ້າວ ອຸດົມສິດ ສິງລາດສົມບູນ ນໍ້າເບີ 7 ທີ່ບາດເຈັບໃນນັດຊີງຊະນະເລີດກັບແຂວງຫຼວງພະບາງນັ້ນ, ທາງສະຫະພັນກໍໄດ້ຕິດຕາມຢ່າງໃກ້ຊິດຕະຫຼອດມາ.ຊຶ່ງເບື້ອງຕົ້ນໄດ້ປິ່ນປົວຢູ່ໂຮງໝໍ ທີ່ນະຄອນຫຼວງວຽງຈັນ.ປະຈຸບັນອາກາດໄດ້ດີຂື້ນເປັນປົກກະຕິ ແລະ ອອກຈາກໂຮງໝໍກັບຄືນສູ່ບ້ານເກີດແລ້ວ.

ເກດສະໜາ ແກ້ວສຸວັນນະແສງ