ເຈົ້າໜ້າທີ່ກອງຄະດີອາຍາ ປກສ ເມືອງໄຊເສດ ໃຫ້ຮູ້ວ່າ: ພາຍຫຼັງທີ່ໄດ້ຮັບຮ້ອງຟ້ອງຈາກອົງການຈັດຕັ້ງບ້ານຫົວຂົວ ກ່ຽວກັບກຸ່ມຄົນທີ່ຈອດລົດຂາຍໝາກໄມ້ແຄມເສັ້ນທາງ, ເຊິ່ງກີດຂວາງການຈະລາຈອນທາງບົກ ຈຶ່ງໄດ້ລົງເກັບກໍາຂໍ້ມູນ ເຫັນວ່າ: ການຂາຍເຄື່ອງແຄມທາງສ້າງຄວາມຫຍຸ້ງຍາກສັບສົນໃຫ້ແກ່ການສັນຈອນຂອງຜູ້ຄົນທີ່ໃຊ້ລົດໃຊ້ຖະໜົນ ເເລະ ເເຕະຕ້ອງເຖິງຄວາມບໍ່ເປັນລະບຽບຮຽບຮ້ອຍຂອງສັງຄົມ ອາດພາໃຫ້ເກີດອຸບັດຕິເຫດຕາມມາ; ຈາກນັ້ນ, ຮອດວັນທີ 7 ພະຈິກ 2020 ເຈົ້າໜ້າທີ່ຕໍາຫຼວດກອງຄະດີອາຍາ ຈຶ່ງໄດ້ລົງກວດກາສະຖານທີ່ດັ່ງກ່າວ ພົບເຫັນ ທ້າວ ພູຂັນ ຈອດລົດກະບະຮຸນໄດ ຂາຍໝາກໄມ້ຕາມລະດູການ (ໝາກກ້ຽງ ແລະ ໝາກໂມ) ຢູ່ແຄມທາງໜ້າໂຮງໝໍເມືອງໄຊເສດຖາ ເຂດບ້ານຫົວຂົວ ກ່ອນນຳຕົວຜູ້ກ່ຽວພ້ອມລົດກະບະຮຸນໄດສີປອນ ປ້າຍທະບຽນ ກມ 2406 ກໍາແພງນະຄອນ ໄປສຶກສາອົບຮົມກ່າວເຕືອນ.

ຜ່ານການສືບສວນ-ສອບສວນຂອງເຈົ້າໜ້າທີ່ວິຊາສະເພາະ, ທ້າວ ພູຂັນ ສາລະພາບວ່າ: ໄດ້ມາຂາຍໝາກໄມ້ຕາມລະດູຢູ່ແຄມທາງເຂດບ້ານຫົວຂົວແທ້ ໂດຍສະເພາະຢູ່ໜ້າໂຮງໝໍເມືອງໄຊເສດຖາ ແລະ ໜ້າວັດຫົວຂົວ, ເຊິ່ງເລີ່ມຂາຍມາແຕ່ປີ 2015 ເປັນຕົ້ນມາ, ໂດຍໃຊ້ຮູບການໄປຊື້ ໝາກໄມ້ຕາມລະດູ ເຊັ່ນ: ໝາກກ້ຽງ, ໝາກໂມ ແລະ ໝາກແຕງ ໃສ່ລົດກະບະຮຸນໄດ ແລ້ວມາຈອດຂາຍຕາມແຄມທາງ; ໃນການຈອດລົດນັ້ນ ຜູ້ກ່ຽວໄດ້ເອົາຕີນລົດດ້ານໜຶ່ງຂຶ້ນຟຸດບາດ ແລະ ອີກດ້ານໜຶ່ງແມ່ນຢຽບເສັ້ນທາງກວມເອົາໜ້າທາງປະມານ 60 ຊັງຕີແມັດ ຫາ 1 ແມັດ ໂດຍການຈອດບາງຄັ້ງແມ່ນຈອດລົດຢູ່ທາງເຂົ້າໜ້າໂຮງໝໍເລີຍ ແລະ ຂາຍໃນເວລາປະມານ 7-8 ໂມງ ເຊົ້າ ຫາ 20:00 ໂມງ.

ນອກນັ້ນ, ໄລຍະຜ່ານມາ, ທ້າວ ພູຂັນ ຍັງຍອມຮັບວ່າ: ເຄີຍຖືກສຶກສາອົບຮົມກ່າວເຕືອນ ແລະ ໄດ້ຮັບຮູ້ກ່ຽວກັບຄໍາສັ່ງຂອງເຈົ້າເມືອງເລື່ອງ: ການຫ້າມບໍ່ໃຫ້ຂາຍເຄື່ອງຊະຊາຍຢູ່ຕາມແຄມທາງ, ແລວທາງໃນບໍລິເວນເຂດບ້ານຫົວຂົວ, ແຕ່ຜູ້ກ່ຽວກໍຍັງກັບຄືນມາຈອດລົດຂາຍໝາກໄມ້ຢູ່ສະຖານທີ່ດັ່ງກ່າວຄືເກົ່າ ຍ້ອນວ່າຢູ່ສະຖານທີ່ດັ່ງກ່າວແມ່ນໄດ້ຂາຍດີ ແລະ ກໍຮູ້ດີວ່າ ມັນເປັນການກີດຂວາງການສັນຈອນຂອງລົດ ແລະ ຄົນຍ່າງ ບາງຄັ້ງກໍພາໃຫ້ລົດຕິດຂັດ, ອັ່ງອໍ ແຕ່ຜູ້ກ່ຽວກໍຍັງສືບຕໍ່ມາຈອດລົດຂາຍໝາກໄມ້ຄືເກົ່າ ໂດຍສະເພາະແມ່ນຕອນແລງວັນສຸກ, ວັນເສົາ ແລະ ວັນອາທິດ.

ມາຮອດເວລາ 6:00 ໂມງ ຂອງວັນທີ 7 ພະຈິກ 2020, ທ້າວ ພູຂັນ ໄດ້ໄປຂາຍໝາກໄມ້ຢູ່ຕະຫຼາດປອດສານພິດ (ສູນການຄ້າລາວ-ໄອ ເຕັກ) ພໍຮອດເວລາປະມານ 17:00 ໂມງຂອງວັນດຽວກັນ ຜູ້ກ່ຽວພ້ອມດ້ວຍຄອບຄົວ ໄດ້ເອົາລົດກະບະຮຸນໄດ ທະບຽນ ກມ 2406 ໄປຈອດຂາຍໝາກໂມ ແລະ ໝາກກ້ຽງໃຫຍ່ຢູ່ແຄມທາງ ໜ້າໂຮງໝໍເມືອງໄຊເສດຖາ ກໍຖືກເຈົ້າໜ້າທີ່ຕໍາຫຼວດ ກັກຕົວໄປສຶກສາອົບຮົມ-ກ່າວເຕືອນ.

ເຈົ້າໜ້າທີ່ຕໍາຫຼວດ ຍັງໃຫ້ຮູ້ອີກວ່າ: ການກະທໍາຂອງຜູ້ກ່ຽວມີເຈດຕະນາຈອດລົດຂາຍໝາກໄມ້ຢູ່ໃນບໍລິເວນໜ້າໂຮງໝໍເມືອງໄຊເສດຖາແທ້ ໂດຍຂາຍມາໄດ້ຫຼາຍປີ ແລະ ຖືກສຶກສາອົບຮົມມາແລ້ວຈໍານວນຫຼາຍຄັ້ງ, ເຊິ່ງຂັດຕໍ່ຄໍາສັ່ງຂອງເຈົ້າເມືອງໄຊເສດຖາ ສະບັບເລກທີ 003, ລົງວັນທີ 15 ກັນຍາ 2020. ແຕ່ຜູ້ກ່ຽວກໍບໍ່ປະຕິບັດຍັງດື້ດ້ານຫົວແຂງກັບຄືນມາຈອດລົດຂາຍໝາກໄມ້ຢູ່ບໍລິເວນດັ່ງກ່າວຄືເກົ່າ. ນອກນັ້ນ, ການກະທໍາດັ່ງກ່າວມັນເຮັດໃຫ້ກີດຂວາງການສັນຈອນ ອັນເປັນເຫດທີ່ພາໃຫ້ການສັນຈອນແອອັດ (ລົດຕິດ) ເຮັດໃຫ້ມີຄວາມສັບສົນ ແລະ ສັງຄົມບໍ່ມີຄວາມສະຫງົບ, ເຫັນວ່າ: ຜູ້ກ່ຽວຜິດໃນສະຖານການກີດຂວາງການຈະລາຈອນທາງບົກ ໃນມາດຕາ 144 ຂອງປະມວນກົດໝາຍອາຍາ ແຫ່ງ ສປປ ລາວ ຈຶ່ງໄດ້ເຮັດບົດບັນທຶກກ່າວເຕືອນ ແລະ ປັບໃໝຕາມລະບຽບກົດໝາຍ ຖ້າກໍລະນີກັບໄປລະເມີດອີກ ແມ່ນຈະດຳເນີນຄະດີຕາມກົດໝາຍ.

ສະນັ້ນ, ຂໍຝາກເຕືອນມາຍັງຜູ້ທີ່ຈະມາຂາຍໝາກໄມ້ ແລະ ຂາຍເຄື່ອງຕ່າງໆໃນສະຖານທີ່ດັ່ງກ່າວນີ້ໃຫ້ປະຕິບັດຕາມຂໍ້ກໍານົດກົດລະບຽບທີ່ວາງໄວ້ຢ່າງເຂັ້ມງວດ.