ຕາມຂ່າວຈາກ ເມືອງມິດແລນ, ວັນທີ 21 ພຶດສະພານີ້, ນ້ຳຈາກເຂື່ອນແຕກ 2 ແຫ່ງ ໄຫລເຂົ້າຖ້ວມ ຕົວເມືອງ ໃນລັດມີຊິແກນຂອງ ສ.ອາເມລິກາ ເຮັດໃຫ້ປະຊາຊົນ ຫລາຍພັນຄົນ ຕ້ອງຍົກຍ້າຍ ອອກຈາກເຮືອນ ແລະ ມວນນ້ຳ ພວມຈະເຂົ້າຖ້ວມ ໂຮງງານ ເຄມີ ຂອງ ດາວເຄມີຄໍລ (Dow Chemical Factory) ທີ່ຢູ່ຖັດຈາກ ແຫລ່ງກຳຈັດ ຂີ້ເຫຍື້ອ ອັນຕະລາຍ. ດ້ານສຳນັກງານ ອຸຕຸນິຍົມ ວິທະຍາ ແຫ່ງຊາດ ຂອງ ສ.ອາເມລະກາ ໄດ້ອອກປະກາດ ເຕືອນໄພນ້ຳຖ້ວມ ທີ່ເປັນໄພຂົ່ມຂູ່ ຕໍ່ຊີວິດຂອງປະຊາຊົນ ເມື່ອລະດັບນ້ຳ ຂອງແມ່ນ້ຳ ທິທາບາວາສະຊີ (Thitabawassi River) ໄດ້ເພີ່ມຂຶ້ນສູ່ ລະດັບສູງສຸດ ໃນປະຫວັດສາດ. ຂະນະທີ່ ປະທານ ຄະນະກຳມະການ ບໍລິຫານ ຂອງ ມິດແລນ ເປີດເຜີຍວ່າ: ຍັງບໍ່ມີລາຍງານ ມີຜູ້ບາດເຈັບ. ແຕ່ຢ່າງໃດກໍ່ຕາມ ອຸທົກກະໄພຄັ້ງນີ້ ຖືເປັນ ຄວາມທ້າທາຍ ຄັ້ງສຳຄັນ ຂອງ ທາງການ ທີ່ພວມຮັບມື ກັບ ການລະບາດ ຂອງ ເຊື້ອພະຍາດ ໂຄວິດ-19 ອີກດ້ວຍ. ຜູ້ວ່າການລັດ ມິຊິແກນ ໄດ້ຂໍຄວາມຊ່ວຍເຫລືອ ຈາກ ລັດຖະບານກາງແລ້ວ. ສ່ວນ ທ່ານ ໂດນັນ ທຣຳ ປະທານາທິບໍດີ ສ.ອາເມລິກາ ມີກຳນົດ ຈະໄປ ຢ້ຽມຢາມ ໂຮງງານຜະລິດລົດໃຫຍ່ ຍີ່ຫໍ້ ຟອດ ຢູ່ລັດມິຊິແກນ ໃນມື້ນີ້ ແລະ ໄດ້ສົ່ງໜ່ວຍງານ ຈາກສຳນັກ ຈັດການ ເຫດສຸກເສີນກາງ (FEMA) ແລະ ກອງທັບ ໄປຍັງພື້ນທີ່ ນ້ຳຖ້ວມແລ້ວ ເພື່ອໃຫ້ການຊ່ວຍເຫລືອ ພ້ອມທັງ ຫລຸດຜ່ອນຄຳສັ່ງ ໃຫ້ຢູ່ແຕ່ໃນເຮືອນແລ້ວ.
