ໂຄງການກໍ່ສ້າງທາງດ່ວນແຕ່ເມືອງວັງວຽງ ແຂວງວຽງຈັນ ຫາ ແຂວງຫຼວງພະບາງ ຊຶ່ງເປັນໄລຍະທີ 2 ຈະມີການກໍ່ສ້າງ ພາຍຫຼັງທີ່ການກໍ່ສ້າງທາງດ່ວນໄລຍະທີ 1 ແຕ່ນະຄອນຫລວງວຽງຈັນ ຫາເມືອງວັງວຽງ (109 ກິໂລແມັດ) ສ້າງສໍາເລັດ ໂດຍຈະມີການເປີດນໍາໃຊ້ຢ່າງເປັນທາງການໃນວັນຊາດທີ 2 ທັນວາ 2020 ນີ້ ເພື່ອເປັນການສະເຫຼີມສະຫຼອງວັນຊາດຂອງ ສປປ ລາວ ຄົບຮອບ 45 ປີ
ໂຄງການກໍ່ສ້າງທາງດ່ວນໄລຍະທີ 2 ແຕ່ເມືອງວັງວຽງ ຫາ ແຂວງຫຼວງພະບາງ ນີ້ໄດ້ຖືກຮັບຮອງຈາກສະພາແຫ່ງຊາດ ຫຼື ຈາກລັດຖະບານລາວ ເມື່ອບໍ່ດົນມານີ້ ຊຶ່ງມີໄລຍະທາງປະມານ 136, 9 ກິໂລແມັດ, ຖ້າສ້າງສໍາເລັດ ແລະ ເປີດໃຊ້ບໍລິການ ຈະໃຊ້ເວລາເດີນທາງປະມານ 90 ນາທີ ແຕ່ເມືອງວັງວຽງ ຫາ ແຂວງຫຼວງພະບາງ
ປັດຈຸບັນນີ້, ບໍລິສັດຮ່ວມທຸລະກິດລາວ – ຈີນທີ່ ກໍາລັງຢູ່ໃນຂັ້ນຕອນກວດກາ ແລະ ສໍາຫຼວດ ແລວທາງ ເພື່ອກ້າວໄປສູ່ການອອກແບບ ແລະ ຄິດໄລ່ມູນຄ່າການກໍ່ສ້າງ ເສັ້ນທາງດ່ວນນະຄອນຫຼວງວຽງຈັນ – ບໍ່ເຕັນ ມີຄວາມຍາວທັງໝົດ 460 ກິໂລແມັດ, ຕາມແຜນແມ່ນຈະເຊື່ອມຕໍ່ນະຄອນຫຼວງວຽງຈັນຫາຊາຍແດນລາວ – ຈີນ ທີ່ແຂວງຫຼວງນໍ້າທາ ໂດຍແບ່ງການກໍ່ສ້າງອອກເປັນ 4 ໄລຍະຄື: ວຽງຈັນ – ວັງວຽງ, ວັງວຽງ – ຫຼວງພະບາງ, ຫຼວງພະບາງ – ອຸດົມໄຊ ແລະ ອຸດົມໄຊ – ບໍ່ເຕັນ
ແຜນການກໍ່ສ້າງທາງດ່ວນ ວັງວຽງ ຫາ ຫຼວງພະບາງ ເພື່ອເຮັດໃຫ້ເວລາ ການເດີນທາງສັ້ນລົງ ລະຫວ່າງ 2 ເມືອງທ່ອງທ່ຽວຊື່ດັງ ຂອງລາວ ໂດຍເວລາ ການເດີນທາງ ຈະຫຼຸດລົງເຫຼືອພຽງ 90 ນາທີ
