ແມ່ບ້ານ ກໍ່ເຫດລັກຊັບເຈົ້າຂອງເຮືອນ

ເຈົ້າໜ້າທີ່ໜ່ວຍງານສຶບສວນ-ສອບສວນ ຄະດີອາຍາ-ເສດຖະກິດ ກອງບັນຊາການ ປກສ ເມືອງໄຊທານີ ໃຫ້ຮູ້ວ່າ: ໃນຕອນເຊົ້າຂອງວັນທີ 23 ກັນຍາ 2020 ຫ້ອງການປົກຄອງບ້ານຕານມີໄຊ ເມືອງໄຊທານີ ນະຄອນຫຼວງວຽງຈັນ ໄດ້ຮັບແຈ້ງຄວາມຈາກ ນາງ ດາລິເບ ຢູ່ບ້ານຕານມີໄຊ ວ່າ: ນາງ ຈູມ ອາຍຸ 42 ປີ, ຢູ່ບ້ານໜອງວຽງຄໍາ ເມືອງໄຊທານີ ນະຄອນຫຼວງວຽງຈັນ; ເຊິ່ງຕົນເອງໄດ້ຈ້າງໃຫ້ມາອະນາໄມເຮືອນ, ແຕ່ຜູ້ກ່ຽວໄດ້ລັກເອົາຊັບສິນຂອງຕົນ ( ສາຍແອວເງິນ ).

ດັ່ງນັ້ນ, ການຈັດຕັ້ງບ້ານຈຶ່ງເຂົ້າກັກຕົວ ນາງ ຈູມ ຢູ່ເຮືອນຂອງຜູ້ກ່ຽວ ແລ້ວມອບໃຫ້ກອງບັນຊາການ ປ້ອງກັນຄວາມສະຫງົບ ເມືອງໄຊທານີ ດໍາເນີນຄະດີ.

ຜ່ານການສອບສວນ ນາງ ຈູມ ຍອມຮັບສາລະພາບ ຕໍ່ເຈົ້າໜ້າທີ່ໜ່ວຍງານສືບສວນ-ສອບສວນ ຄະດີອາຍາ ເສດຖະກິດ ພະແນກຕໍາຫຼວດ ກອງບັນຊາການ ປກສ ເມືອງໄຊທານີວ່າ: ໃນໄລຍະເດືອນ ມັງກອນ 2020 ຕົນໄດ້ໄປເຮັດວຽກອະນາໄມຢູ່ເຮືອນຂອງ ນາງ ດາລິເບ ໂດຍໄດ້ຮັບຄ່າແຮງງານຄັ້ງລະ 50.000 ກີບ. ເຊິ່ງເຮັດວຽກອາທິດລະຄັ້ງ ໃນເວລາອະນາໄມ ແມ່ນໄດ້ພົບເຫັນວັດຖຸມີຄ່າປະໄວ້ຢູ່ໃນເຮືອນ, ຈຶ່ງເກີດມີແນວຄິດຢາກໄດ້ ແລ້ວກໍລົງມືລັກເອົາ.

ຈົນມາຮອດເດືອນກໍລະກົດ 2020 ຕົນເອງໄດ້ເຂົ້າໄປເຮັດວຽກອີກ ແລະ ໃນມື້ນັ້ນ ນາງ ດາລິເບ ໄດ້ລົງໄປໄຂປະຕູຮົ້ວ ຕົນຈຶ່ງໄດ້ລັກເອົາສາຍແອວເງິນ 1 ເສັ້ນ ຢູ່ໃນຕູ້ໃສ່ເຄື່ອງ ແລ້ວກໍເອົາໄປຂາຍໃຫ້ຜູ້ຮັບຊື້ວັດຖຸ ເງິນ-ຄໍາ ຢູ່ເຂດຕະຫຼາດເຊົ້າ ໃນລາຄາ 1.000.000 ກີບ. ຫຼັງຈາກນັ້ນ, ເຈົ້າຂອງເຮືອນຈຶ່ງຮູ້ຕົວວ່າຊັບສິນບໍ່ເຫັນ ແລະ ໄດ້ກວດກາເບີ່ງກ້ອງວົງຈອນປິດທີ່ຕິດຕັ້ງຢູ່ພາຍໃນເຮືອນ, ຈຶ່ງຮູ້ວ່າຕົນເອງເປັນຄົນລັກໄປ.

ນາງ ຈູມ ໃຫ້ການຮັບສາລະພາບອີກວ່າ: ຜ່ານມາຕົນເອງເຄີຍລັກຊັບຂອງ ນາງ ດາລິເບ ມາແລ້ວ 4 ຄັ້ງ ລວມມີຄື: ຕູ້ມຫູຄໍາ 4 ຄູ່, ສາຍຄໍຄໍາ 1 ເສັ້ນ, ສາຍຄໍທອງນາກ 1 ເສັ້ນ, ສາຍແອວເງິນ 1 ເສັ້ນ ແລະ ສາຍແຂນເງິນ 1 ເສັ້ນ, ຊັບສິນທີ່ຕົນເອງລັກມາແມ່ນເອົາຂາຍ ໄດ້ເງິນຈໍານວນ 5000.000 ກີບ, ສ່ວນເງິນແມ່ນເອົາໄປເຊື່ອງໄວ້ຢູ່ເຮືອນຂອງຕົນ. ຫຼັງຈາກທີ່ຖືກກັກຕົວເງິນຈໍານວນທີ່ຕົນເອງໄດ້ເອົາຊັບສິນໄປຂາຍນັ້ນ ແມ່ນໄດ້ສົ່ງຄືນໃຫ້ນາງ ດາລິເບ ແລ້ວ.

ເຈົ້າໜ້າທີ່ ໃຫ້ຮູ້ອີກວ່າ: ສໍາລັບຜູ້ຖືກຫາລາຍນີ້ ແມ່ນຈະດໍາເນີນຄະດີຕາມລະບຽບກົດໝາຍ ຂອງ ສປປ ລາວ.