ຍ້ອນຄວາມເຊື່ອໃຈໃຫ້ອ້າຍຮັກຍືມລົດຈັກແລ້ວ ບໍ່ສົ່ງຄືນ

ວັນທີ 13 ຕຸລາ 2020, ເຈົ້າໜ້າທີ່ໜ່ວຍງານສືບສວນ-ສອບສວນຄະດີອາຍາ ປກສ ເມືອງໄຊເສດຖາ ນະຄອນຫຼວງວຽງຈັນ ໄດ້ຮັບແຈ້ງຄວາມຈາກ ທ້າວ ທົງສະຫວັນ ຫຼື ຕີ້ ອາຍຸ 16 ປີ ນັກຮຽນບ້ານໂນນສະຫວ່າງ ເມືອງສີໂຄດຕະບອງ ວ່າ: ໃນຄັ້ງວັນທີ 11 ຕຸລາ 2020, ອ້າຍ ຮັກຊື່ ທ້າວ ສິງສໍາລານ ຫຼື ສິງ ອາຍຸ 35 ປີ ພັກເຊົາຢູ່ບ້ານໂຊກຄໍາ ເມືອງໄຊເສດຖາ ໄດ້ຢືມລົດຈັກ CPX ແລ້ວບໍ່ເອົາມາສົ່ງ.

ພັຕ ສົມສະໜຸກ ເທືອກພິມົນ ຫົວໜ້າໜ່ວຍງານສືບສວນ-ສອບສວນຄະດີອາຍາ ປກສ ເມືອງໄຊເສດຖາ ໃຫ້ຮູ້ວ່າ: ຫຼັງຈາກໄດ້ຮັບແຈ້ງຄວາມຈາກຜູ້ເສຍຫາຍ ກໍໄດ້ແຕ່ງຕັ້ງເຈົ້າ ໜ້າທີ່ວິຊາສະເພາະລົງຕິດຕາມ ຈົນມາຮອດວັນທີ 18 ຕຸລາ 2020 ຈຶ່ງສາມາດຈັບຕົວຜູ້ກໍ່ ເຫດໄດ້ ພ້ອມເກັບກູ້ລົດຈັກທີ່ຖືກລັກ ແລະ ສໍ້ໂກງຄືນມາໄດ້.

ຜ່ານການສືບສວນ, ຜູ້ຖືກຫາສາລະພາບວ່າ: ໄດ້ຮູ້ຈັກກັບຜູ້ເສຍຫາຍໃນນາມນ້ອງຮັກ, ໃນວັນທີ 11 ຕຸລາ 2020 ເວລາປະມານ 10:00 ໂມງ, ທ້າວ ຕີ້ ໄດ້ຂີ່ລົດຈັກ CPX ມາທີ່ໂຕະສະນຸກເກີ້. ຈາກນັ້ນ, ໄດ້ບອກໃຫ້ຂີ່ລົດໄປສົ່ງບ່ອນພັກເຊົາ ( ເຮືອນເອື້ອຍ ) ບ້ານໂຊກຄໍາ ເມືອງໄຊເສດຖາ ຈຸດປະສົງຈະໄປເອົາເຄື່ອງນຸ່ງ, ແຕ່ພໍຂັບຂີ່ມາສົ່ງຮອດປາກຮ່ອມທາງເຂົ້າເຮືອນ ກໍໄດ້ຈອດລົດຈັກ ແລະ ບອກໃຫ້ ທ້າວ ຕີ້ ລໍຖ້າຢູ່ປາກຮ່ອມທາງເຂົ້າ.

ຈາກນັ້ນ, ຕົນໄດ້ຂີ່ລົດຄັນດັ່ງກ່າວ ໄປບ້ານດົງໝາກຄາຍ ເພື່ອຈະເອົາລົດໄປຂາຍ ແຕ່ບໍ່ມີຄົນຊື້ເມື່ອເປັນ ແນວນັ້ນ ກໍໄດ້ຂີ່ລົດໄປເຂດບ້ານໄຜ່ລ້ອມ ເພື່ອເອົາລົດໄປໃຫ້ໝູ່ເພື່ອແລກປ່ຽນກັບຢາບ້າ, ແຕ່ວ່າໃນມື້ນັ້ນໝູ່ບໍ່ຢູ່ເຮືອນ ຈຶ່ງໄດ້ຂີ່ລົດຈັກອອກມາຈາກບ້ານ. ພໍຮອດເສັ້ນທາງເລກ 13 ໃຕ້ ນໍ້າມັນລົດໝົດບໍ່ມີເງິນຊື້ນໍາມັນ ຈຶ່ງໄດ້ນໍາເອົາລົດຝາກໄວ້ຮ້ານສ້ອມແປງ. ຈາກນັ້ນ, ກໍ ຍ່າງຕາມເສັ້ນທາງພໍຮອດໄລຍະໜຶ່ງ ໄດ້ເຫັນເບີຕິດປະກາດຮັບແກ່ເຄື່ອງຢູ່ເສົາໄຟຟ້າ ເມື່ອເປັນແນວນັ້ນກໍໄດ້ໂທຫາຜູ້ຮັບແກ່ເຄື່ອງໃຫ້ມາແກ່ເອົາລົດຈັກເປ່ເພເມືອໄວ້ໃຫ້ສ່ວນຄ່າຈ້າງແມ່ນຈະມາຈ່າຍໃຫ້ພາຍຫຼັງຕອນທີ່ມາພົວພັນເອົາລົດຈັກ.

ຕົກມາຮອດວັນທີ 18 ຕຸລາ 2020 ເວລາ 11:00 ໂມງ, ໄດ້ໄປຫຼິ້ນຢູ່ເຮືອນໝູ່ຢູ່ບ້ານເມືອງນ້ອຍ ເມືອງໄຊເສດຖາ. ຈາກນັ້ນ, ກໍໄດ້ພົບກັບໝູ່ ຊື່ ທ້າວ ພອນ ແລະ ໄດ້ບອກໃຫ້ໄປສົ່ງຢູ່ເຮືອນຂອງໝູ່ອີກຄົນ ຢູ່ບ້ານໂນນສົມບູນ ເມືອງສີໂຄດຕະບອງ ແລະ ທັງສອງກໍພາກັນໄປຫຼິ້ນຢູ່ຮ້ານເກມບ້ານທົ່ງປົ່ງ.

ຫຼັງຈາກນັ້ນ, ກໍໄດ້ຢືມລົດເວບ 100 ຂອງ ທ້າວ ພອນ ທັງບອກໃຫ້ລໍຖ້າໄປວຽກແລ້ວຈະມາຮັບ, ພາຍຫຼັງໄດ້ລົດຈັກກໍໄດ້ຂີ່ໄປແລກປ່ຽນເອົາຢາບ້າຢູ່ເຂດບ້ານນາສາລາ ເມືອງໄຊທານີ. ແຕ່ບໍ່ມີຄົນເອົາ ພໍເມືອເປັນແນວນັ້ນ ກໍໄດ້ຂີ່ລົດມາທາງ ສະ ໜາມກິລາຫຼັກ 16 ເຂດບ້ານດົງສ້າງຫີນ ເຈົ້າໜ້າທີ່ສືບຮູ້ການເຄື່ອນໄຫວຈຶ່ງວາງແຜນຈັບຕົວ ໄດ້ສໍາເລັດ.

ເຈົ້າໜ້າທີ່ໃຫ້ຮູ້ຕື່ມວ່າ: ໃນປີ 2018, ຜູ້ກ່ຽວເຄີຍຖືກດໍາເນີນຄະດີຢູ່ຄ້າຍຄຸມຂັງ ເມືອງໄຊທານີ ໃນຂໍ້ຫາລັກຊັບ ແລະ ສໍ້ໂກງຊັບ ( ລົດຈັກ ) ຖືກສານຕັດສິນ ຈໍາຄຸກ 2 ປີ. ມາຮອດເດືອນ 5 ປີ 2020, ກໍໄດ້ພົ້ນໂທດ.

ຈາກນັ້ນ, ກໍໄດ້ມາພັກເຊົານໍາເອື້ອຍບ້ານໂຊກຄໍາ ແລະ ກໍກັບມາເຄື່ອນໄຫວເສບຢາບ້າອີກ, ແຕ່ລະຄັ້ງແມ່ນໄປຊື້ຢູ່ຮ້ານເກມມາເສບຄັ້ງລະ 1-2 ເມັດ; ມາຮອດເດືອນ 6 ຂອງປີດຽວກັນ, ໄດ້ໄປເຮັດວຽກຢູ່ຮ້ານສະໜຸກເກີ້ບ້ານທົ່ງປົ່ງ ເມືອງສີໂຄດຕະບອງ. ຈາກນັ້ນ, ກໍໄດ້ຮູ້ຈັກກັບ ທ້າວ ຕີ້ ໃນນາມເປັນອ້າຍ-ນ້ອງຮັກ.
ຕົກມາໃນວັນທີ 27 ຕຸລາ 2020, ເຈົ້າໜ້າທີ່ ປກສ ເມືອງໄຊເສດຖາ ໄດ້ມອບລົດຈັກ CPX ຄືນໃຫ້ເຈົ້າຂອງເດີມ.