ອາໃສຄວາມລື້ງເຄີຍ ສໍ້ໂກງຊັບມູນຄ່າຫຼາຍລ້ານກີບ

ນາງ ແຂກສະຫວັນ ອາຍຸ 29 ປີ, ອາຊີບຄ້າຂາຍ ຢູ່ບ້ານດົງໂດກ ເມືອງໄຊທານີ ນະຄອນຫຼວງວຽງຈັນ ຖືກການຈັດຕັ້ງບ້ານດົງໂດກເຂົ້າກັກຕົວໃນວັນທີ 09 ຕຸລາ 2020 ຢູ່ເຮືອນຂອງຜູ້ກ່ຽວ ຕາມການແຈ້ງຄວາມຂອງຜູ້ເສຍຫາຍແລ້ວສົ່ງໃຫ້ກອງບັນຊາການ ປກສ ເມືອງໄຊທານີ ດຳເນີນການສອບສວນ. 

ເຈົ້າໜ້າທີ່ ປກສ ເມືອງໄຊທານີ ໃຫ້ຮູ້ວ່າ: ນາງແຂກສະຫວັນ ໄດ້ໃຫ້ການວ່າ: ໃນວັນທີ 04 ຕຸລາ 2020 ຕົນເອງໄດ້ໄປຫາເອື້ອຍຮັກເປັນຄົນບ້ານດຽວກັນແລ້ວໄດ້ຮ່ວມກັນວາງແຜນສໍ້ໂກງຊັບ(ສິ້ນໄໝ) ນຳນາງ ນົງຄານແລ້ວໄດ້ໂທລະສັບສັ່ງຊື້ສິ້ນ ຈຳນວນ 50 ຜືນລວມມູນຄ່າ 3 ລ້ານກວ່າກີບ ຍ້ອນວ່າຕົນເອງເຄີຍໄປຊື້ສິນໄໝນຳນາງ ນົງຄານ ຈື່ງຫຼົງເຊື່ອ ແລ້ວມາວັນທີ 07 ຕຸລາ 2020 ນາງ ນົງຄານ ໄດ້ໂທລະສັບຫາບອກໃຫ້ໄປຮັບເອົາສິ້ນໄໝຈໍານວນດັ່ງກ່າວ ນໍານາງ ເຈັ່ງຊົງ ຢູ່ບ້ານຄຳຮຸ່ງ ເມືອງໄຊທານີ.

ພາຍຫຼັງໄດ້ສິ້ນແລ້ວຕົນເອງ ແລະ ເອື້ອຍຮັກກໍ່ໄດ້ອອກອຸບາຍບອກນາງ ເຈັງຊົງວ່າ:  ຈັກໜ່ອຍຈື່ງຈະເອົາເງິນມາໃຫ້ ເພາະບໍ່ທັນໄດ້ກົດເງິນອອກຈາກຕູ້ ATM; ເຊີ່ງຜູ້ກ່ຽວກໍ່ຫຼົງເຊື່ອ ແລະ ມອບສິ້ນໃຫ້ .

ຫຼັງຈາກໄດ້ສິ້ນກໍ່ພາກັນກັບເຮືອນ ແລະ ຕົກລົງກັນໂດຍໃຫ້ເອື້ອຍຮັກເອົາສິນໄໝໄປຂາຍເອົາເງິນມາແບ່ງກັນໃຊ້ຈ່າຍ,ແຕ່ມື້ນັ້ນຈົນຮອດມືຶ້ນີ້ກໍ່ບໍ່ເຫັນກັບມາຫາ ແລະ ບໍ່ຮູ້ວ່າຜູ້ກ່ຽວໄປຢູ່ໃສ; ເຊີ່ງໃນມື້ດຽວກັນ ນາງ ນົງຄານ(ເຈົ້າຂອງສິ້ນ) ໄດ້ໂທມາທວງຖາມເງິນຄ່າສິ້ນ, ແຕ່ຕົນເອງໄດ້ບ່າຍບ່ຽງ ແລະ ປິດໂທລະສັບ.

ຈາກນັ້ນວັນທີ 09 ຕຸລາ 2020 ການຈັດຕັ້ງບ້ານດົງໂດກ ໄດ້ເຂົ້າກັກຕົວແລ້ວສົ່ງໃຫ້ ປກສ ເມືອງໄຊທານີ. 

ຕໍ່ກັບຄະດີນີ້ ເຈົ້າໜ້າທີ່ ປກສ ເມືອງໄຊທານີ ພວມເລັ່ງສຶບສວນຂະຫຍາຍຜົນ ເພື່ອນຳເອົາຕົວຜູ້ກໍ່ເຫດສໍ້ໂກງຊັບມາດຳເນີນຄະດີຕາມກົດໝາຍ

ຄລິບຂ່າວ:

ທ່ານບໍ່ມີສິດສຳເນົາ ບົດຄວາມນີ້ໄດ້ ສົນໃຈບົດຄວາມຕິດຕໍ່ ຜູ້ດູແລລະບົບຖ້າສົນໃຈບົດຄວາມນີ້