ເປີດນໍາໃຊ້ສາຍສົ່ງ-ສະຖານີໄຟຟ້າແຮງສູງ 500 ກິໂລໂວນ ບ້ານຫາດ-ຊາຍແດນລາວ-ກໍາປູເຈຍ – ສື່ລາວ.ຄອມ

ເປີດນໍາໃຊ້ສາຍສົ່ງ-ສະຖານີໄຟຟ້າແຮງສູງ 500 ກິໂລໂວນ ບ້ານຫາດ-ຊາຍແດນລາວ-ກໍາປູເຈຍ

ໃນວັນທີ 01 ພະຈິກ 2020 ທີ່ບ້ານຫາດ ເມືອງໂຂງ ແຂວງຈໍາປາສັກ ໄດ້ຈັດພິທີເປີດການນໍາໃຊ້ສາຍສົ່ງ-ສະຖານີໄຟຟ້າແຮງສູງ 500 ກິໂລໂວນ ບ້ານຫາດ ຫາ ຊາຍແດນລາວ/ກໍາປູເຈຍມີ ທ່ານ ປອ ຄໍາມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່ ,

ທ່ານ ວິໄລວົງ ບຸດດາຄໍາ ເຈົ້າແຂວງ ແຂວງຈໍາປາສັກ,ທ່ານ ຮສ,ດຣ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ, ທ່ານຈັນທະບູນ ສຸກອາລຸນ ວ່າການຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ພ້ອມດ້ວຍບຸກຄົນສໍາຄັນ ຈາກກະຊວງທີ່ກ່ຽວຂ້ອງ ແລະ ບໍລິສັດຮັບຜິດ ຊອບ ໂຄງການເຂົ້າຮ່ວມ.

ໂຄງການກໍ່ສ້າງສາຍສົ່ງ 500 ກິໂລໂວນ ເປັນການກໍ່ສ້າງສາຍສົ່ງວົງຈອນຄູ່ເຊື່ອມຕໍ່ສາຍສົ່ງ ເພື່ອສົ່ງອອກໄຟຟ້າຕາມສັນຍາຊື້-ຂາຍລະຫວ່າງ ລັດວິສາຫະກິດໄຟຟ້າລາວ ກັບ ລັດວິສາຫະກິດໄຟຟ້າກໍາປູເຈຍ ເຊີ່ງໂຄງການດັ່ງກ່າວເປັນການລົງທຶນຂອງ ລັດວິສາຫະກິດໄຟຟ້າລາວ ໂດຍບໍລິສັດ YEIG ແລະ ບໍລິສັດ CGGC ປະເທດຈີນ ເປັນຜູ້ຮັບເໝົາກໍ່ສ້າງ, ມີຄວາມຍາວຫລາຍກວ່າ 18 ກິໂລແມັດ

ແຕ່ຈຸດເຊື່ອມຕໍ່ຫາຊາຍແດນລາວ-ກໍາປູເຈຍ, ເປັນການຍົກລະບົບ ແລະ ຂະຫຍາຍສະຖານີໄຟຟ້າ ບ້ານຫາດ 115 ກິໂລໂວນ ມາເປັນ 230 ກິໂລໂວນ ທີ່ສໍາຄັນໂຄງການພັດທະນາສາຍສົ່ງຫາສະຖານີໃຊ້ເວລາ ໃນການກໍ່ສ້າງ 12 ເດືອນ ລະຫວ່າງ ບ້ານຫາດ ຫາ ຊາຍແດນລາວ ກຳປູເຈຍ ໂຄງການຍຸດທະສາດ ເຊື່ອມຕໍ່ກັບການສົ່ງອອກພະລັງງານໄຟຟ້າ, ຜົນສໍາເລັດໃນການກໍ່ສ້າງຄັ້ງນີ້ ເຮັດໃຫ້ລັດວິສາຫະກິດໄຟຟ້າລາວ ສາມາດສົ່ງອອກພະລັງງານໄຟຟ້າ ໃຫ້ກັບ ລັດວິສາຫະກິດໄຟຟ້າ ກໍາປູເຈຍ ທັນຕາມກໍານົດເວລາ.​

ໃນອະນາຄົດ ຈະຂະຫຍາຍສະຖານີແຫ່ງນີ້ເປັນ 500 ກິໂລໂວນ ເພື່ອເຊື່ອມຕໍ່ກັບສະຖານີຢູ່ແຂວງອັດຕະປື ຕາມແຜນພັດທະນາ ພະລັງງານ ແລະ ບໍ່ແຮ່ 2016-2020, ພັດທະນາພະລັງງານ ແລະ ບໍ່ແຮ່ຕາມທິດຫັນເປັນອຸດສາຫະກໍາ ແລະ ທັນສະໄໝ ຂຸດຄົ້ນ ແລະ ນໍາໃຊ້ທ່າແຮງ ຊັບພະຍາກອນທໍາມະຊາດໃຫ້ຮັບປະກັນຄວາມຍືນຍົງ.

Cr: EDL

ທ່ານບໍ່ມີສິດສຳເນົາ ບົດຄວາມນີ້ໄດ້ ສົນໃຈບົດຄວາມຕິດຕໍ່ ຜູ້ດູແລລະບົບຖ້າສົນໃຈບົດຄວາມນີ້