ການຈັດຫາງົບປະມານເພື່ອບູລະນະສ້ອມແປງ-ກໍ່ສ້າງເສັ້ນທາງ ໃນຕົວເມືອງ ແລະ ຊານເມືອງ ຂອງນະຄອນຫລວງບໍ່ໄດ້ຕາມຄວາມຮຽກຮ້ອງຕ້ອງການຕົວຈິງ

ການພັດທະນາເສດຖະກິດ ຂອງນະຄອນຫລວງວຽງຈັນ (ນວ) ເຖິງວ່າຈະປະເຊີນກັບຄວາມຫຍຸ້ງຍາກອັນໜັກໜ່ວງ ແຕ່ເສດຖະກິດ ນວ ຍັງສາມາດປະຄັບປະຄອງຢູ່ໃນສະພາບໝັ້ນທ່ຽງ, ສືບຕໍ່ຂະຫຍາຍຕົວດ້ວຍຈັງຫວະເຕີບໂຕສູງ ສະເລ່ຍ 5 ປີຜ່ານມາ 9,15%, ມູນຄ່າ GDP ບັນລຸ 224.654 ຕື້ກີບ. ຄຽງຄູ່ກັນນັ້ນ, ຍັງມີບາງຈຸດອ່ອນ ແລະ ຂໍ້ຄົງຄ້າງ ທີ່ນະຄອນຫລວງວຽງຈັນ ຈະຕ້ອງໄດ້ເລັ່ງປັບປຸງແກ້ໄຂ ເພື່ອສ້າງເຮັດໃຫ້ເສດຖະກິດ ຂອງ ນວ ສືບຕໍ່ຂະຫຍາຍຕົວຢ່າງຕໍ່ເນື່ອງ.

ສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ເລຂາຄະນະພັກ, ເຈົ້າຄອງນະຄອນຫລວງວຽງຈັນ ໄດ້ລາຍງານໃຫ້ຮູ້ໃນກອງປະຊຸມໃຫຍ່ ຄັ້ງທີ VII ຂອງອົງຄະນະພັກນະຄອນຫລວງວຽງຈັນ ໃນວັນທີ 28 ຕຸລາ 2020 ນີ້ວ່າ: ເສດຖະກິດນະຄອນຫລວງວຽງຈັນ ເຖິງວ່າເຕີບໂຕໃນລະດັບສູງ, ແຕ່ການຈັດຕັ້ງປະຕິບັດບາງໂຄງການ ຍັງບໍ່ທັນໄດ້ດີເທົ່າທີ່ຄວນ, ເປັນບັນຫາທີ່ຈະຕ້ອງໄດ້ເລັ່ງລົງມືແກ້ໄຂ ເປັນຕົ້ນ ໂຄງການບຸກທະລຸສ້າງຖານະການເງິນ ຍັງເຮັດໄດ້ໜ້ອຍ, ໜີ້ສິນສາທາລະນະ ຍັງຫລາຍສົມຄວນ, ຂັ້ນເມືອງ ແລະ ບ້ານ ບໍ່ທັນສາມາດສ້າງລາຍຮັບພູດທ້ອງຖີ່ນ

ເພື່ອດູນລາຍຈ່າຍຂອງຕົນເອງໄດ້, ການຈັດຫາງົບປະມານເພື່ອບູລະນະສ້ອມແປງ-ກໍ່ສ້າງເສັ້ນທາງ ໃນຕົວເມືອງ ແລະ ຊານເມືອງ ບໍ່ໄດ້ຕາມຄວາມຮຽກຮ້ອງຕ້ອງການຕົວຈິງ, ການຊີ້ນຳ-ບັນຊາ ແກ້ໄຂບັນຫາຊ່ວຍພາກທຸລະກິດ ບໍ່ທັນໂຫລ່ງລ່ຽນວ່ອງໄວ, ວິສາຫະກິດ ຈຳນວນໜຶ່ງພົບຄວາມຫຍຸ້ງຍາກ ເປັນຕົ້ນໃນເງື່ອນໄຂຜົນກະທົບພະຍາດໂຄວິດ-19 ຈຳເປັນຕ້ອງໄດ້ປົດຄົນງານອອກ ຫລື ໂຈະ, ປິດກິດຈະການ; ການນຳໃຊ້ທ່າແຮງ ດ້ານທີ່ຕັ້ງເປັນໃຈກາງເມືອງຫລວງ ແລະ ພື້ນຖານໂຄງລ່າງທີ່ເອື້ອອຳນວຍ ບໍ່ທັນດີເທົ່າທີ່ຄວນ.

ຕົວເມືອງເຖິງວ່າມີການພັດທະນາ ແຕ່ພື້ນຖານໂຄງລ່າງເສັ້ນທາງ, ສາທາລະນຸປະໂຫຍດ ແລະ ການບໍລິການຮັບໃຊ້ປະຊາຊົນ ຍັງພົບຄວາມຫຍຸ້ງຍາກຫລາຍອັນ; ສາລະບານງົບປະມານຮັບໃຊ້ການບໍລິການຕົວເມືອງບໍ່ທັນມີ, ການຄຸ້ມຄອງ ແລະ ບໍລິຫານຈັດການຕົວເມືອງ ປະສິດທິພາບບໍ່ທັນສູງ, ການສ້າງເມືອງສີຂຽວບໍ່ທັນເຮັດໄດ້ດີ; ການຂຸດຄົ້ນຊັບພະຍາກອນທໍາມະຊາດ, ພັດທະນາທີ່ດິນ ບໍ່ທັນມີມາດຕະການກວດກາແກ້ໄຂທີ່ເຂັ້ມງວດ.

ຢ່າງໃດກໍຕາມ ອີກ 5 ປີ ໃນຕໍ່ໜ້າ ນະຄອນຫລວງ ຈະສູ້ຊົນ ເຮັດໃຫ້ເສດຖະກິດຂະຫຍາຍຕົວເພີ່ມຂຶ້ນ ສະເລ່ຍໃນລະດັບ 7-8% ຕໍ່ປີ, ລວມຍອດຜະລິດຕະພັນພາຍໃນ (GDP) ຮອດປີ 2025 ບັນລຸໄດ້ 84.916 ຕື້ກີບ, ລວມຍອດຜະລິດຕະພັນສະເລ່ຍຕໍ່ຫົວຄົນໃຫ້ບັນລຸ 8.750 ໂດລາສະຫະລັດ; ໃນນັ້ນຂະແໜງກະສິກຳ ກວມເອົາ 4-4,5% ຕໍ່ປີ, ຂະແໜງອຸດສາຫະກຳ ກວມເອົາ 11,5% ຕໍ່ປີ ແລະ ຂະແໜງບໍລິການ ກວມເອົາ 6,5% ຕໍ່ປີ ຂອງ GDP.

ຂ່າວ: ທະນູທອງ