ພິທີມອບຫລຽນໄຊພິລະອາດຫານ ແລະ ຊົມເຊີຍຜົນງານດັ່ງກ່າວ ໄດ້ຈັດຂຶ້ນຢ່າງເປັນທາງການ ແລະ ສົມກຽດ ໃນວັນທີ 23 ຕຸລາ 2020 ເຊິ່ງໃຫ້ກຽດມອບ ຫລຽນໄຊພິລະອາດຫານ ຊັ້ນ II ໂດຍ ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີ ກະຊວງປ້ອງກັນປະເທດ ແລະ ມອບຫລຽນໄຊພິລະອາດຫານ ຊັ້ນ III ໂດຍ ທ່່ານ ພົນໂທ ສຸວອນ ເລືອງບຸນມີ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບປະຊາຊົນລາວ. 

ໄດ້ຮັບຫລຽນໄຊພິລະອາດຫານ ຊັ້ນ II ຄັ້ງນີ້ປະກອບມີ 3 ກົມກອງ ແລະ ບຸກຄົນ 47 ສະຫາຍ ແລະ ຫລຽນໄຊພິລະອາດຫານ ຊັ້ນ III ປະກອບມີ 5 ກົມກອງ ແລະ ບຸກຄົນ 37 ສະຫາຍ ເຊິ່ງຜົນງານດັ່ງກ່າວ ເປັນການປະກອບສ່ວນອັນສຳຄັນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອປົກປັກຮັກສາ ແລະ ສ້າງສາພັດທະນາປະເທດຊາດ.  

ໂອກາດດັ່ງກ່າວ, ທ່ານ ພົນເອກ ຈັນສະໝອນ ຈັນຍາລາດ ຕາງໜ້າໃຫ້ຄະນະນຳກະຊວງປ້ອງກັນປະເທດ ກໍຄື ນາຍ ແລະ ພົນທະຫານ ໄດ້ສະແດງຄວາມຍ້ອງຊົມເຊີຍຕໍ່ຜົນງານ ແລະ ຜົນສຳເລັດ ທີ່ບັນດານັກກິລາຍາດມາໄດ້ໃນການແຂ່ງຂັນດັ່ງກ່າວ.

ການເຂົ້າຮ່ວມແຂ່ງຂັນກິລາການທະຫານສາກົນຂອງກອງທັບປະຊາຊົນລາວເຮົາໃນຄັ້ງນີ້ ແມ່ນເປັນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມ ລະຫວ່າງສອງຊາດ, ສອງກອງທັບ ລາວ-ຣັດເຊຍ ໃຫ້ນັບມື້ເກີດດອກອອກຜົນ ແລະ ງອກງາມຍິ່ງໆຂຶ້ນ ແລະ ທັງເປັນການຫັດແອບດ້ານສີນລະປະຍຸດທະວິທີ, ຝຶກແອບຍາດແຍ່ງເອົາບົດຮຽນ, ປະສົບການ, ຄວາມຮູ້, ຄວາມສາມາດຕົວຈິງໃຫ້ແກ່ພະນັກງານນັກຮົບເຮົາໃຫ້ຄວາມຊຳນິຊຳນານ ແລະ ເຂັ້ມແຂງຂຶ້ນເລື້ອຍໆ, ສຳຄັນຍິ່ງກວ່ານັ້ນ ແມ່ນເປັນການນຳເອົາບົດບາດຊື່ສຽງຂອງປະເທດຊາດ ກໍຄືຂອງກອງທັບປະຊາຊົນລາວ ສູງຂຶ້ນໃນເວທີສາກົນ. 

ການແຂ່ງຂັນກິລາການທະຫາສາກົນ ຄັ້ງທີ 6 ຈັດຂຶ້ນລະຫວ່າງວັນທີ 23 ສິງຫາ – 5 ກັນຍາ 2020 ທີ ສ. ຣັດເຊຍ ໂດຍມີທັງໝົດ 32 ປະເທດເຂົ້າຮ່ວມ ແລະ ມີ 30 ປະເພດກິລາ ລວມທັງໝົດ 156 ທີມ, ເຊິ່ງກອງທັບປະຊາຊົນລາວ ສົ່ງເຂົ້າຮ່ວມທັງໝົດ 7 ປະເພດ, ໃນນັ້ນ ເດີນທາງຈາກ ສປປ ລາວ ໄປຮ່ວມມີ 2 ປະເພດ ຄື: ທີມລົດຕັງ ແລະ ທີມເຕັກນິກຊ່າງແສງ ເຊິ່ງສາມາດຍາດໄດ້ທີ 2 ທັງສອງທີມ.

ນອກນັ້ນ, ແມ່ນເອົານັກສຶກສາທີ່ກໍາລັງສຶກສາຢູ່ ສ. ຣັດເຊຍເຂົ້າຮ່ວມໂດຍມີ 5 ປະເພດ ຄື: ທີມປ້ອງກັນອາກາດ (ຍາດໄດ້ທີ 2), ທີມເຄມີ-ລັງສີ ແລະ ຊີວະພາບ (ອັນດັບ 2), ທີມທະຫານອາກາດກູ້ໄພສູກເສີນ (ຍາດໄດ້ທີ 4), ທີມສືບຂ່າວ (ອັນດັບ 5) ແລະ ທີມເຕັກນິກຊ່ຽວຊານອາວຸດປືນ (ອັນດັບ 5). ສັງລວມແລ້ວ ທີມນັກກິລາກອງທັບປະຊາຊົນລາວ ຈັດເປັນອັນດັບທີ 5 ຮ່ວມກັບກອງທັບ ສປ ຈີນ ໃນຈຳນວນ 32 ປະເທດເຂົ້າຮ່ວມ.

ຂ່າວ: ສິງຄຳ, ພາບ: ຂັນໄຊ