ລາຍງານຂ່າວຈາກຮ່າໂນ້ຍ, ຕອນແລງວັນທີ 13 ພຶດສະພາ 2020 ຢູ່ທີ່ສະພາແຫ່ງຊາດຫວຽດນາມ ໄດ້ມີພິທີ ມອບ-ຮັບ ເຄື່ອງຊ່ວຍເຫລືອ ການແພດ ຈາກສະພາແຫ່ງຊາດຫວຽດນາມ ໃຫ້ແກ່ ສປປ ລາວ, ກຳປູເຈຍ, ອິນໂດເນເຊຍ, ມາເລເຊຍ, ຟີລິບປິນ, ສິງກະໂປ ແລະ ຍີ່ປຸ່ນ ຊຶ່ງເຄື່ອງຊ່ວຍເຫລືອດັ່ງກ່າວ ເປັນຜ້າອັດປາກການແພດ ເພື່ອປ້ອງກັນ ພະຍາດອັກເສບປອດ ສາຍພັນໃຫມ່ ຫລືໄວຣັດໂຄວິດ-19 (COVID-19), ກ່າວມອບໂດຍແມ່ນ ສະຫາຍ ຫງວຽນແຫ້ງຟຸກ ກຳມະການສູນກາງພັກ ຫົວໜ້າຫ້ອງວ່າການ ສະພາແຫ່ງຊາດຫວຽດນາມ, ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ຕາງໜ້າໃຫ້ບັນດາ ເອກອັກຄະລັດຖະທູດ ຂອງປະເທດທີ່ໄດ້ຮັບ ເຄື່ອງຊ່ວຍເຫລືອ ແລະ ມີຄຳເຫັນກ່າວຮັບ ໂດຍໄດ້ຍົກໃຫ້ເຫັນຜົນກະທົບ ອັນຮ້າຍແຮງຂອງພະຍາດ ອັກເສບປອດສາຍພັນໃຫມ່ (COVID-19) ທີ່ກຳລັງແພ່ລະບາດ ເປັນວົງກວ້າງໃນທົ່ວໂລກ, ພ້ອມດຽວກັນນັ້ນຍັງໄດ້ ຕີລາຄາສູງຕໍ່ຜົນສຳເລັດອັນໃຫຍ່ ຫລວງຂອງພັກ, ລັດຖະບານ ແລະ ປະຊາຊົນຫວຽດນາມ ຍາດມາໄດ້ໃນການສະກັດກັ້ນ, ຢັບຢັ້ງ, ຈຳກັດພະຍາດທີ່ຮ້າຍແຮງດັ່ງກ່າວ, ຊຶ່ງຫວຽດນາມໄດ້ກາຍເປັນແວ່ນແຍງ ແລະ ໄດ້ຮັບການຍ້ອງຍໍຊົມເຊີຍ ຈາກບັນດາປະເທດໃນໂລກ.
ເຖິງແມ່ນວ່າຫວຽດນາມ ຍັງປະສົບກັບຄວາມຍຸ້ງຍາກ ແລະ ໄດ້ຮັບຜົນກະທົບຈາກ ການລະບາດພະຍາດໂຄວິດ-19 ກໍ່ຕາມ, ແຕ່ຫວຽດນາມ ຍັງໄດ້ບິແບ່ງຊ່ວຍເຫລືອ ທັງວັດຖຸອຸປະກອນການແພດ ແລະ ບົດຮຽນ, ໃນການຕ້ານ ແລະ ສະກັດກັ້ນພະຍາດດັ່ງກ່າວ ໃຫ້ບັນດາປະເທດ ຊຶ່ງໃນນັ້ນມີ ສປປ ລາວ ຂອງພວກເຮົາ.
ໃນໂອກາດນີ້, ສະຫາຍ ແສງເພັດ ຮຸ່ງບຸນຍວງ ໄດ້ສະແດງຄວາມຮູ້ບຸນຄຸນ ແລະ ຂອບໃຈຢ່າງຈິງໃຈ ມາຍັງສະພາແຫ່ງຊາດຫວຽດນາມ, ພັກ, ລັດຖະບານ ແລະ ປະຊາຊົນຫວຽດນາມ ໃນການຊ່ວຍເຫລືອອຸປະກອນ ການແພດໃນຄັ້ງນີ້ ແລະ ໄດ້ຢືນຢັນວ່າອຸປະກອນ ການແພດທີ່ໄດ້ຮັບການຊ່ວຍ ເຫລືອຄັ້ງນີ້ຈະຖຶກນຳໃຊ້ ເຂົ້າໃນການສະກັດກັ້ນ ແລະ ຕ້ານພະຍາດໂຄວິດ – 19 ຢູ່ແຕ່ລະປະເທດທີ່ໄດ້ຮັບ ການຊ່ວຍເຫລືອໃຫ້ມີປະສິດທິຜົນສູງ, ພ້ອມດຽວກັນນີ້ເຊື່ອໝັ້ນວ່າ ພາຍໃຕ້ການນຳພາອັນ ສະຫລາດສ່ອງໃສ ແລະ ຄວາມເປັນ ຈິດໜຶ່ງໃຈດຽວຂອງພັກ, ລັດ ແລະ ປະຊາຊົນຫວຽດນາມ ຈະຟື້ນຟູເສດຖະກິດ ແລະ ຊີວິດການເປັນຢູ່ຂອງປະຊາຊົນໃຫ້ກັບຄືນສູ່ສະພາບປົກກະຕິໂດຍໄວ ແລະ ສືບຕໍ່ຍາດໄດ້ຜົນສຳເລັດ ອັນໃໝ່ໃຫຍ່ຫລວງກວ່າເກົ່າ ໃນພາລະກິດປົກປັກ ຮັກສາ ແລະ ສ້າງສາປະເທດຊາດ.
ຂ່າວ,ຮູບໂດຍ: ໂອລຳ ຈັນທະວິໄລ
